އިސްރާއީލުން ޣައްޒާގެ ޚާން ޔޫނުސް އަށް ހަމަލާދީ 11 މީހުން ޝަހީދުކޮށްލައިފި

އިޒްރާއީލުގެ ހައްދުފަހަނަ އަޅާފައިވާ ސިފައިން ފަލަސްތީނުގެ ހާން ޔޫނުސްގެ ހުޅަނގުން އޮންނަ އަލްއަމަލް އަވަށުގެ ގެއަކަށްދިން ހަމަލާތަކެއްގައި ފަލަސްތީނުގެ 11 މީހުން ޝަހީދުކޮށް ލައިފިއެވެ.

ހައްދުފަހަނަ އަޅާފައިވާ ޔަހޫދީ ސިފައިން މި ހަމަލާ އަމާޒުކޮށްފައިނީ މިޔަދު ފަތިހުގެ ވަގުތެއްގައެވެ. އަލްޖަޒީރާއިން ބުނިގޮތުގައި މި ހަމަލާގައި ގިނައިން ޝަހީދުވެފައިވަނީ ކުޑަކުދިންނާއި އަންހެނުންނެވެ.

މީގެ އިތުރުން މިއަދު ހެނދުނު ޣައްޒާގެ މެދުތެރޭގައި ހުންނަ ނުސައިރިއާ ކޭމްޕަށް ދިން ނިރުބަވެރި ހަމަލާގައި ވަނީ، ފަލަސްތީނުގެ 3 މީހުން ޝަހީދުކޮށްލާފައެވެ.

މިދިޔަ އަހަރު އޮކްޓޯބަރު މަހުން ފެށިގެ މިއަދާހަމައަށް ހައްދުފަހަނަ އަޅާފައިވާ ޔަގ=ހޫދީ ސިފައިން ދިން ހަމަކާތަކުގައި 40,265 އަށް ވުރެ ގިނަމީހުންވަނީ ޝަހީދުކޮށްލާފައެވެ. މީގެ އިތުރުން އެކިދުވަސްމަތިން ދިން ހަމަލާތަކުގައި ޒަހަމްވި މީހުންގެ އަދަދު 93,144 އަށްވުރެ ގިނަކަމަށް މީޑިއާގެ ރިޕޯޓްތައް ބުނެއެވެ.

އިޒްރާއީލުން ފަލަސްތީނަށް އަމާޒުކޮށް ކުރިއަށްގެންދާ ނަސްލު ނައްތާލުމުގެ މި ހަމަލާތައް ބައިނަލްއަޤްވާމީ މުޖުތަމައުން ކުށްވެރިކުރަމުން ދިޔަނަމަވެސް ޔަހޫދީ ސިފައިން ހިންގަމުންދާ ގަތުލު އާއްމުތައް ހުއްޓުވާފައެއް ނުވެއެވެ.