އެމްޖޭއެސް ރާބަދި ޗެލެންޖް 2025 ގެ މީޑިއާ ޕާޓްނަރަކަށް ވޮއިސް ސްޕޯޓްސް

ރާއްޖޭގައި ބާއްވާ އެންމެ ބޮޑު އިންޓާ ރިސޯޓް ފުޓްސަލް ޗެލެންޖު "ރާބަދި ޗެލެންޖް 2025" އޮފިޝަލް މިޑިއާ ޕާޓްނަރަކަށް ވޮއިސް ސްޕޯޓްސް ހަމަޖައްސައިފިއެވެ.

މުބާރާތުގެ މީޑިއާ ޕާޓްނަރާއެކު އާދިއްތަ ދުވަހު ވޮއިސް އެމްވީގެ އޮފީހުގައި ބޭއްވި ސޮއިކުރުމުގެ ރަސްމިޔާތުގައި ވޮއިސް ސްޕޯޓްސްގެ ފަރާތުން ސޮއިކުރެއްވީ ވޮއިސް އެމްވީގެ ސީއީއޯ މުހައްމަދު ސައުޒަމް އެވެ. އަދި މިއެއްބަސްވުމުގައި މީދޫ ޖަމްޢިއްޔަތުއް ޞަލާޙުގެ ފަރާތުން ސޮއިކުރެއްވީ އެޖަމުއިއްޔާގެ ސްޕޯޓްސް ކޯޑިނޭޓަރު އަބްދުލް ބާސިތު އެވެ.

މިމުބާރާތަކީ މީދޫ ޖަމްޢިއްޔަތުއް ޞަލާޙުގެ ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވަމާލައިގެން 2019 ވަނަ އަހަރު ބާއްވަން ފެއްޓި މުބާރާތެކެވެ. ނަމަވެސް އެކި ސަބަބުތަކާ ހުރެ 2020 އަދި 2021 ވަނަ އަހަރު މުބާރާތް ނުބޭއްވި ދިއުމަށް ފަހު 2022 ވަނަ އަހަރު ފެށުގެން އަލުން މިމުބާރާތް ވަނީ ބާއްވަން ފަށާފައެވެ.

އެގޮތުން މިއަހަރުގެ މުބާރާތް 25 އެޕްރީލް 2025 އިން 10 މެއި 2025 ގެ ނިޔަލަށް ކުރިއަށް ގެންދިމަށް ހަމަޖެހިފައިވާއިރު، މި އަހަރުގެ މުބާރާތުގައި ޖުމްލަ 15 ރިސޯޓަކުން ވަނީ ބައިވެރިވެފައެވެ.

މީގެ އިތުރުން މި އަހަރުގެ މުބާރާތް ކުރިއަށް ގެންދިއުމަށް ހަމަޖެހިފައި ވަނީ ބައިވެރިވި 15 ޓީމު ހަތަރު ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ކުއާޓާ ފައިނަލަށް ހޮވޭގޮތަށެވެ.