އެމެރިކާއިން އީރާނަށް ހަމަލާދިނީ އިސްރާއިލުން ޕްރެޝަރުކޮށްގެން: އެމެރިކާގެ ކައުންޓާ ޓެރަރިޒަމް ޑިރެކްޓަރު

އެމެރިކާގެ ރައީސް ޑޮނަލްޑް ޓްރަމްޕަށާއި ޑިރެކްޓާ އޮފް ނެޝަނަލް އިންޓެލިޖެންސަށް ޓެރަރިޒަމްގެ ނުރައްކާތަކާ ގުޅޭ ގޮތުން ލަފާ ދޭ އެމެރިކާގެ ނެޝަނަލް ކައުންޓާ ޓެރަރިޒަމް ސެންޓަރުގެ ޑިރެކްޓަރު ޖޯ ކެންޓް، އީރާނާ ދެކޮޅަށް ކުރާ ހަނގުރާމައާ މެދު ހިތްހަމަނުޖެހުން ފާޅުކޮށް މަޤާމުން އިސްތިއުފާ ދީފިއެވެ.

އެކްސްގައި ކުރި ޕޯސްޓެއްގައި ކެންޓް ވަނީ އިސްތިއުފާގެ ސިޓީ އާއްމުކޮށްފައެވެ.

އޭގައި ކެންޓް ބުނީ ކުރިއަށްދާ ހަނގުރާމައަށް ތާއީދު ނުކުރެވޭނެ ކަމަށެވެ.

"އީރާނުން އެމެރިކާއަށް އެއްވެސް ނުރައްކަލެއް ކުރިމަތިއެއް ނުކުރޭ، އަދި މި ހަނގުރާމަ ފެށީ އިސްރާއީލާއި އެ ޖަމާޢަތުގެ ބާރުގަދަ އެމެރިކާގެ ލޮބީގެ ޕްރެޝަރަށް ކަން ސާފު" އޭނާ ބުންޏެވެ.

ޓްރަމްޕް ސަރުކާރުގެ އިސް އޮފިޝަލުންގެ ތެރެއިން އީރާނު ހަނގުރާމައާ ގުޅިގެން އިސްތިއުފާ ދިން ފުރަތަމަ ސީނިއާ އޮފިޝަލަކީ ކެންޓެވެ. އޭނާގެ ސިޓީގައި ބުނެފައި ވަނީ ޓްރަމްޕް ސަރުކާރުގެ ކުރީކޮޅު އިސްރާއީލުގެ އިސް އޮފިޝަލުންނާއި އެމެރިކާގެ ނޫސްވެރިކަމުގެ ދާއިރާގެ ނުފޫޒު ގަދަ ބައެއް ފަރާތްތަކުން ޓްރަމްޕްގެ "އެމެރިކާ ފަސްޓް" ސިޔާސަތު ހަލާކުކޮށް، އީރާނާ ދެކޮޅަށް ހަނގުރާމައަށް ހިތްވަރު ދިނުމުގެ ގޮތުން ދޮގު މަޢުލޫމާތު ފެތުރުމުގެ ކެމްޕެއިނެއް ހިންގި ކަމަށެވެ.

ކެންޓް ބުނީ 11 ފަހަރު ހަނގުރާމައިގެ މައިދާނަށް ނުކުތް ކުރީގެ ސިފައިންގެ މީހެއްގެ ހައިސިއްޔަތުންނާއި، "އިސްރާއީލު އުފެއްދި އެ ހަނގުރާމައެއްގައި" އަނބިމީހާ ޝެނޮން ގެއްލުނު ފިރިއެއްގެ ހައިސިއްޔަތުން، އެމެރިކާ ރައްޔިތުންނަށް އެއްވެސް ފައިދާއެއް ނެތް ހަނގުރާމައެއްގައި ޒުވާނުން ފޮނުވައިގެން މަރުވާން ދޫކޮށްލުމަށް ތާއީދު ނުކުރެވޭނެ ކަމަށެވެ.

މިކަމާ ގުޅިގެން ރައީސް ޓްރަމްޕް ބުނީ ކެންޓް އިސްތިއުފާ ދިނީ "ރަނގަޅަށް" ކަމަށާއި، އޭނާ އަކީ "ސެކިއުރިޓީ ކަންކަމުގައި ވަރަށް ބަލިކަށި" މީހެއް ކަމަށެވެ. "އީރާނަކީ ނުރައްކަލެއް ނޫނޭ ބުނާ މީހުން އަހަރެމެން ބޭނުމެއް ނޫން" ކަމަށާއި "އެއީ ވިސްނުންތެރި ބައެއް ނޫން" ކަމަށް ޓްރަމްޕް ބުންޏެވެ.

ވައިޓް ހައުސްގެ ތަރުޖަމާނު ކެރޮލައިން ލެވިޓް ވެސް ކެންޓްގެ ވާހަކަތައް ދޮގުކޮށް، އީރާނުން ނުރައްކަލެއް ނެތް ކަމަށް ބުނި ބުނުމަށް ރައްދުދީ، އިސްރާއީލުން ޓްރަމްޕް ލައްވައި ހަނގުރާމަ ފެށީ ކަމަށް ބުނުމަކީ "މޮޔަކަމެއް ކަމަށާ އަދި ފުރައްސާރައެއް" ކަމަށް ބުންޏެވެ.

މި ހަނގުރާމަ ފެށުނީއްސުރެ މިހާތަނަށް 13 އެމެރިކާ ސިފައިން މަރުވެފައިވާ އިރު، އީރާނުން މަދުވެގެން 1،444 މީހުން، ގަލްފް ސަރަޙައްދުން 20 މީހުން، އަދި އިސްރާއީލުން މަދުވެގެން 15 މީހުން މަރުވެފައިވެއެވެ.

ކެންޓް އަކީ އެމެރިކާ ސިފައިންގެ ސްޕެޝަލް ފޯސަސްގެ ކުރީގެ ސިފައިންގެ މީހެކެވެ. އޭނާ ވަނީ 11 ފަހަރު ހަނގުރާމައިގެ މައިދާނަށް ފޮނުވައިފައެވެ. 2019 ވަނަ އަހަރު ޖެނުއަރީ މަހު ސީރިއާގެ މަންބިޖުގައި ދިން ޖާނުން ފިދާވެގެން ދިން ބޮމުގެ ހަމަލާގައި ކެންޓްގެ އަނބިމީހާ ޝެނޮން މަރުވިއެވެ. ޓްރަމްޕް 2025 ވަނަ އަހަރު ފެބްރުއަރީ މަހު ކެންޓް ނެޝަނަލް ކައުންޓާ ޓެރަރިޒަމް ސެންޓަރުގެ ޑިރެކްޓަރު ކަމަށް ނޮމިނޭޓް ކުރި އިރު، ސެނެޓުން 52-44 ވޯޓުން ޖުލައި 2025 ގައި އޭނާ އެ މަޤާމަށް ކޮންފާމް ކުރިއެވެ.