ޕެނަމާ ކެނަލް ކޮންޓްރޯލްކުރުމުގެ ފުރުސަތު ޗައިނާއަށް ނުދޭނަން: ޓްރަމްޕް

ޕެނަމާ ކެނަލްގެ ކޮންޓްރޯލް ޕެނަމާއާ ހަވާލުކުރުމަކީ އެމެރިކާއިން ހެދި ވަރަށް ބޮޑު ގޯހެއްކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ނޯތު ޑަކޯޓާގެ މެޑޯރާގައި ހުންނަ ތިއޮޑޯރ ރޫޒަވެލްޓް ޕްރެޒިޑެންޝަލް ލައިބްރަރީ ހުޅުވުމުގެ ރަސްމިއްޔާތުގައި ވާހަކަދައްކަވަމުން ޓްރަމްޕް ވަނީ، 1977 ވަނަ އަހަރުގެ މުއާހަދާގެ ދަށުން އެމެރިކާއިން ޕެނަމާ ކެނަލްގެ ކޮންޓްރޯލް ދޫކޮށްލުމަށް ނިންމި ނިންމުމަށް ވަރަށް ބޮޑަށް ފާޑުވިދާޅުވެފައެވެ. ޓްރަމްޕް ތުހުމަތު ކުރެއްވި ގޮތުގައި ޕެނަމާއިން އެ ކެނަލްގެ ކޮންޓްރޯލް ނެގުމަށްފަހު، އެތަން ހުރަސްކުރާ އުޅަނދުފަހަރުން ނަގާ ފީ ހަތަރު ގުނައަށް ބޮޑުކޮށް، އޭގެއިން ބޮޑު ފައިދާއެއް ހޯދާފައިވެއެވެ. މީގެ އިތުރުން، ދުނިޔޭގެ ވިޔަފާރީގެ މުހިންމު މި ކަނޑުގެ މަގުގެ ނުފޫޒު ހޯދުމަށް ޗައިނާއިން މިހާރު މަސައްކަތް ކުރަމުންދާ ކަމަށާއި، ނަމަވެސް އެމެރިކާއިން އެ ފުރުސަތު ބެއިޖިންއަށް ނުދޭނެ ކަމަށް ޓްރަމްޕް ވައުދުވެވަޑައިގެންނެވިއެވެ.

ދުނިޔޭގެ ކަނޑުގެ ވިޔަފާރީގެ ގާތްގަނޑަކަށް %5 ހިއްސާކުރާ މި ޕެނަމާ ކެނަލްއަކީ އެމެރިކާގެ އިގްތިސާދަށް ނުހަނު މުހިންމު ތަނެކެވެ. ސަބަބަކީ އެމެރިކާގެ ކޮންޓޭނަރުތަކުގެ %40 އަށްވުރެ ގިނަ މުދާ ކޮންމެ އަހަރަކުވެސް މި ކެނަލް މެދުވެރިކޮށް ދަތުރުކުރާތީއެވެ. ޓްރަމްޕްގެ މި ވާހަކަތަކަކީ ޕެނަމާ ކެނަލްގެ މިލްކުވެރިކަން އަލުން އެމެރިކާއަށް ހޯދުމަށް އޭނާ ގެންގުޅުއްވާ ވިސްނުން އަނެއްކާވެސް ހާމަކޮށްދޭ ކަމެއް ކަމަށް މާހިރުން ބުނެއެވެ. ނަމަވެސް، މިއަހަރުގެ ކުރީކޮޅު ޗައިނާގެ ޚާރިޖީ ވަޒީރު ވަންގް ޔީ ވަނީ ޕެނަމާއާއެކު އޮންނަ ގުޅުން އިތުރަށް ބަދަހިކުރަން ބޭނުންވާކަން ހާމަކޮށް، ދެ ގައުމުގެ ދެމެދުގައި އޮންނަ ގުޅުމުގެ ތެރެއަށް ތިންވަނަ ފަރާތަކުން، ޚާއްޞަކޮށް އެމެރިކާއިން،ނުފޫޒު ފޯރުވުމާ ދެކޮޅަށް ވާހަކަދައްކަވާފައެވެ.