އަނިޔާވެރިންނަށް ﷲ ދެއްވާ ޢުޤޫބާތުން ސަލާމަތެއް ނުވެވޭނެ: ޚުތުބާ

އަނިޔާވެރިންނަށް ﷲ ދެއްވާ ޢުޤޫބާތުން ސަލާމަތެއް ނުވެވޭނެ ކަމަށާ، މި ޢުޤޫބާތް ދުނިޔޭގައި ވެސް އަދި އާޚިރަތުގައި ވެސް ލިބިދާނެ ކަމަށް މިއަދުގެ ޚުތުބާގައި ބުނެފިއެވެ.

"އަނިޔާވެރިންނަށް މާތްﷲ މުހުލަތު ދެއްވައެވެ" މި މައުޟޫއަށް ހާއްސަކޮށްގެން މިއަދު ދިން ހުތުބާގައި ބުނީ އިސްލާމްދީނުގައި ހުރިހާ މާނައެއްގައިވެސް އަނިޔާވެރިކަން ހަރާމްކުރައްވާފައިވާ ކަމަށެވެ.

އަދި ބައެއްފަހަރު އަނިޔާވެރިންނަށް، އެ އަނިޔާވެރިވާ ވަގުތުގައި މާތް ﷲ އުގޫބާތް ނުދެއްވަނީ އޭނާ އިސްލާހުވެ ތައުބާވުމަށް ނުވަތަ އޭނާއަށް އިތުރަށް ދެއްކޭނެ ބަހަނާއެއް ތަނަވަސްކޮށް ނުދެއްވުމަށްޓަކައި ކަމަށް ހުތުބާގައި ބުންޏެވެ.

"މާތް ﷲ އެކަލާނގެއަށް އުރެދޭ މީހުންގެ ކިބައިން ބަދަލުހިއްޕެވުމުގައި އަވަސްވެ ވޮޑިއެއް ނުގަންނަވަތެވެ. އެހެނަސް އެކަލާނގެ ވަކި މުއްދަތަކަށް އެކަން ފަސްކުރައްވަތެވެ،" ހުތުބާގައި ބުންޏެވެ.

މީގެ އިތުރުން ޚުތުބާގައި ބުނީ، އަނިޔާވެރިންނަށް މުހުލަތު ދެއްވަނީ އެމީހުން އެ އަނިޔާވެރިކަމުގައި އިތުރަށް ކުރިއަށް ދިއުމަށްޓަކައޖ ކަމަށާ، އެމީހަކު އޫޅޭ ތަނެއްގެ ނުވަތަ ރަށެއްގެ ނުވަތަ ގައުމެއްގެ މީހުންނަށް އެކަން ފެނި އެނގިދެނި ވުމަށްޓަކައި ކަމަށެވެ. އަދި އެއީ އެމީހަކާ ދެކޮޅަށް އާޚިރަތް ދުވަހު ހިސާބު ބެލެވޭއިރު، ހެކިވެރީންގެ ގޮތުގައި ތިބުމަށްޓަކައި ކަމަށްވެސް ބުނެފައިވެއެވެ.

"މާތްﷲ ކަންހިންގަވާ ގޮތަށް ބަލާއިރު، އަނިޔާވެރިން މަޑުމަޑުން ހަލާކުގެ ތެރެއަށް ވައްޓައިލެއްވުން ވެއެވެ. އަނިޔާވެރިންނަށް ﷲ ދެއްވާ ޢުޤޫބާތުން ސަލާމަތެއް ނުވެވޭނެއެވެ. މި ޢުޤޫބާތް ދުނިޔޭގައި ވެސް ލިބިދާނެއެވެ. އަދި އާޚިރަތުގައި ވެސް ލިބިދާނެއެވެ. އަދި ދެ ދުނިޔޭގައި ވެސް ލިބިދާނެއެވެ. މާތްﷲވަނީ އަނިޔާވެރިކަމުގެ ސަބަބުން އެތައްއެތައް ޤައުމެއް ހަލާކުކުރައްވައިފައެވެ." ޚުތުބާގައި ބުނެފައިވެއެވެ.