ސްޓެލްކޯ މަހިބަދޫ އިންޓަ އޮފީސް ވޮލީ މުބާރާތް: ފެނަކަ އަދި ހޮސްޕިޓަލް އޭ އަށް ވިދިވިދިގެން ތިންވަނަ މޮޅު

އދ. މަހިބަދޫގައި ކުރިއަށްދާ "ސްޓެލްކޯ މަހިބަދޫ އިންޓަ އޮފީސް ވޮލީ މުބާރާތް" ގައި އިއްޔެ ކުޅުނު ފޯރިގަދަ މެޗުތަކުން ފެނަކަ އަދި ހޮސްޕިޓަލް އޭ ޓީމު މޮޅުވެއްޖެއެވެ.

މި މުބާރާތުގެ 29 ވަނަ މެޗުގައި ބައްދަލުކުރީ ހޮސްޕިޓަލް ބީ ޓީމާއި ފެނަކަ އެވެ. ފެށުނީއްސުރެ މޮޅު ކުޅުމެއް ދައްކަމުން ދިޔަ ފެނަކަ ޓީމުން ވަނީ ސީދާ ދެ ސެޓުން މި މެޗު ކާމިޔާބުކޮށްފައެވެ.

އެގޮތުން ފުރަތަމަ ސެޓު 10-25 އިން ފެނަކަ ގެންދިޔައިރު، ދެވަނަ ސެޓު އެ ޓީމުން ކާމިޔާބުކުރީ 9-25 ގެ ބޮޑު ތަފާތަކުންނެވެ.

މި މެޗުގެ މޮޅު ކުޅުންތެރިޔާ (މޭން އޮފް ދަ މެޗު) ގެ މަގާމު ހޯދީ ފެނަކަ ޓީމުގެ ޖާޒީ ނަންބަރު 17، އިސްމާޢީލް ނަޒީރު އެވެ.

މުބާރާތުގެ 30 ވަނަ މެޗުގައި ހޮސްޕިޓަލް އޭ އާއި ސްޓެލްކޯ ޑީ-16 ބައްދަލުކުރި މެޗުވެސް ނިމުނީ ސީދާ ދެ ސެޓުން ހޮސްޕިޓަލް އޭ ކާމިޔާބުކޮށްގެންނެވެ. ފޯރިގަދަ ކުޅުމެއް ފެނިގެންދިޔަ މި މެޗުގެ ސެޓުތައް ހޮސްޕިޓަލް އޭ އިން ގެންދިޔައީ 16-25 އަދި 19-25 އިންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ މޮޅު ކުޅުމެއް ދެއްކި ހޮސްޕިޓަލް އޭ ޓީމުގެ ޖާޒީ ނަންބަރު 4، މުޙައްމަދު ޖަޒީލް އެވެ.

މި މެޗުތަކަށްފަހު މުބާރާތުގެ ޕޮއިންޓް ޓޭބަލްގެ ތަރުތީބަށް ބަލާއިރު، ގްރޫޕް އޭގެ އެއްވަނައިގައި އޮތީ މިހާތަނަށް ކުޅުނު އެއްވެސް މެޗަކުން ބަލިނުވެ ހޮސްޕިޓަލް އޭ ޓީމެވެ. އަދި މި ގްރޫޕުގެ ދެވަނައިގައި އޮތީ ރޯޑް އެސްއެސްއޭ އެވެ.

ގްރޫޕް ބީގެ އެއްވަނައިގައި އެއްވެސް ޓީމެއް އަތުން ބަލިނުވެ އޮތީ ސްޓެލްކޯ-ކޭ38 އެވެ. މި ގްރޫޕުގެ ދެވަނައިގައި އޮތީ އަދި މިހާތަނަށް އެއްވެސް މެޗަކުން ބަލިނުވެ އޮތް ފެނަކަ ޓީމެވެ.

މަހިބަދޫގެ މުއައްސަސާތަކުގެ މެދުގައި އެކުވެރިކަން އާލާކޮށް، ކުޅިވަރުގެ ރޫޙު އާލާކުރުމުގެ މަގުސަދުގައި ކުރިއަށްގެންދާ މި މުބާރާތުގެ ފޯރި މިހާރު ދަނީ ދުވަހެއް ދުވަހަކަށް ގަދަވަމުންނެވެ.