ޣައްޒާއަށް ސިއްހީ ސާމާނު ނުލިބޭތާ 10 ދުވަސް!
ހައްދުފަހަނައަޅާފައިވާ އިސްރާއީލުން ޣައްޒާ އަށް އެހީވެއްދުމަށްޓަކައި އެކޮ ގޮތްގޮތުން ދަތިކުރަމުންދާތީ، ޣައްޒާގެ ރައްޔިތުންނަށް ބޭނުންވާ ސިއްހީ ސާމާނު ނުލިބޭތާ 10 ދުވަސްވެފައިވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފިއެވެ.
ޑަބްލިއުއެޗްއޯގެ ތަރުޖަމާނު ތާރިކް ޖަސާރެވިޗް ވިދާޅުވީ، ޔަހޫދީ ފައުޖުން ރަފާހް އަށް އަރައިގަނެ، އެ ސަރަހައްދުގައި ހުރި ޣައްޒާ އަށް އެހީވެއްދުމަށް ބޭނުންކުރާ ބޯޑަރެއްގެ ކޮންޓްރޯލް ނެގުމާއި ގުޅިގެން ދިމާވެފައިވަނީ ވަރަށް ދަތި ހާލަތެއް ކަމަށާއި، ޣައްޒާގައި މިހާރު ހުރީ މޭ މަހުގެ 6 ވަނަ ދުވަހުގެ ކުރިން ލިބުނު ސިއްހީ ސާމާނު ކަމަށެވެ.
ޖަސާރެވިޗް ވިދާޅުވީ، އެންމެ ބޮޑު ގޮންޖެހުމަކީ ޣައްޒާގެ ހޮސްޕިޓަލްތަކާއި ކްލިނިކްތައް ހިންގާނެ ވަރަށް ތެޔޮ ނުލިބުން ކަމަށާއި، ޣައްޒާގެ ސިއްހީ މަރުކަޒުތައް ހިންގަމުން ގެންދިއުމަށް މަހަކު 1.8 މިލިއަން ލީޓަރާއި ހަމައަށް ތެޔޮ ބޭނުންވާ ކަމަށެވެ.
އެހެންނަމަވެސް، ބޯޑަރު ބަންދުކުރުމާއި ގުޅިގެން މިހާތަނަށް ލިބިފައިވަނީ 159,000 ލިޓަރުގެ ތެޔޮ ކަމަށާއި، މީގެ ސަބަބުން ޣައްޒާގައި ހުރި 36 ހޮސްޕިޓަލުގެ ތެރެއިން 13 ހޮސްޕިޓަލެއްގައި އެކަށީގެންވާ ވަރަށް ސިއްހީ ހިދުމަތްތައް ފޯރުނުކޮށްދެވޭކަން ޖަސާރެވިޗް ފާހަގަކުރެއްވިއެވެ.
ޔަހޫދީ ފައުޖުން މޭމަހުގެ 7 ވަނަ ދުވަހު ރަފާހް އަށް އަރައިގަނެ ލާއިންސާނީ އެތައް ޖަރީމާތަކެއް ހިންގަމުންދާއިރު، ޣައްޒާގެ ސިއްހީ ވުޒާރާއިން ވެސް ވަނީ ބޭނުންވާވަރަށް ތެޔޮ ނުލިބޭނަމަ ޣައްޒާގެ ސިއްހީ ނިޒާމް ހުއްޓޭނެ ކަމުގެ އިންޒާރު ދީފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
