ޑިއޭގޯ ގާސިއާއަށް ހަމަލާދޭ ވާހަކަ ގަދަވެފައިވަނިކޮށް، އިނގިރޭސިންގެ ނިއުކްލިއާ ސަބްމެރިން އަރަބި ކަނޑަށް

އިނގިރޭސިވިލާތުގެ ނިއުކްލިއާ ބާރުގައި ދުވާ، އެންމެ ޒަމާނީ ސަބްމެރިން 'އެޗްއެމްއެސް އެންސަން' އަރަބި ކަނޑަށް ހިނގައްޖެ ކަމަށް އިނގިރޭސިވިލާތުގެ 'ޑެއިލީ މެއިލް' ނޫހުން ރިޕޯޓްކޮށްފިއެވެ.

އަސްކަރީ މަސްދަރުތަކާ ހަވާލާދީ އެ ނޫހުން ބުނެފައިވާ ގޮތުގައި، މި ސަބްމެރިން މިހާރު އޮތީ އަރަބި ކަނޑުގެ އުތުރު ސަރަހައްދުގައި އިރާނަށް ހަމަލާދޭން ޖެހިއްޖެ ކޮންމެ ހިނދެއްގައި އެކަމަށް ފުރިހަމައަށް ތައްޔާރުވެގެންނެވެ.

މި ސަބްމެރިންއަކީ ނިއުކްލިއާ ހަތިޔާރު އުފުލުމުގެ ގާބިލުކަން ލިބިފައިވާ، އަދި ގާތްގަނޑަކަށް 1،600 ކިލޯމީޓަރު ދުރުގައި ހުންނަ އަމާޒުފަތްތަކަށް ހަމަލާދެވޭ 'ޓޮމަހޯކް' މަރުކާގެ ކްރޫޒް މިސައިލް ހަރުކޮށްފައިވާ އުޅަނދެކެވެ. 'ޑެއިލީ މެއިލް' އިން ފާހަގަކޮށްފައިވާ ގޮތުގައި، މި އުޅަނދު އަރަބި ކަނޑަށް ފޮނުވުމުގެ މައިގަނޑު ބޭނުމަކީ، މެދުއިރުމަތީގެ މަސްރަހު އިތުރަށް ގޯސްވެއްޖެ ހާލަތެއްގައި އިރާނަށް ވަރުގަދަ ހަމަލާތަކެއް ދިނުމުގެ ފުރުސަތު އިނގިރޭސި އަސްކަރިއްޔާއަށް ފަހިކޮށްދިނުމެވެ.

މި އުޅަނދު ދަތުރު ފަށާފައިވަނީ މި މަހުގެ ކުރީކޮޅު އޮސްޓްރޭލިއާގެ ޕާތުން ކަމަށްވާއިރު، މިއީ ގާތްގަނޑަކަށް 5،500 މޭލުގެ ދިގު ދަތުރެކެވެ. ރިޕޯޓްތައް ބުނާ ގޮތުގައި މި ސަބްމެރިން ކޮންމެ 24 ގަޑިއިރަކުން އެއްފަހަރު ފެނުން މައްޗަށް އެރުމަށްފަހު އިނގިރޭސިވިލާތުގެ އަސްކަރީ މަރުކަޒާ މުވާސަލާތީ ގުޅުން ބާއްވައެވެ. މިއީ އިރާނަށް ހަމަލާދޭން ޖެހިއްޖެ ހާލަތެއްގައި ބޮޑުވަޒީރު ކިއަރ ސްޓާމަރ ދެއްވާ އަމުރު ވަގުތުން ތަންފީޒު ކުރުމަށްޓަކައި ކުރާ ކަމެކެވެ.

އަރަބި ކަނޑަށް އިނގިރޭސިންގެ އެންމެބޮޑު ސަބްމެރިން ގގޮސްފައިމިވަނީ، އިރާނުން ދާދިފަހުން އިންޑިއާ ކަނޑުގައި އޮންނަ އިނގިރޭސި އަސްކަރީ މަރުކަޒު 'ޑިއޭގޯ ގާސިއާ' އަށް އަމާޒުކޮށް ހަމަލާދީފާނެ ކަމުގެ ވާހަކަތަކެއް ދެކެވިފައި ވަނިކޮށެވެ. މީގެ އިތުރުން ހުރުމުޒް ކަނޑުއޮޅި ބަންދުކޮށް، ބައިނަލްއަގުވާމީ ތެޔޮ ސަޕްލައިއަށް އިރާނުން ހުރަސްއަޅަމުންދާތީ، އެމެރިކާއާއެކު ގުޅިގެން އިރާނުގެ މިސައިލް މަރުކަޒުތަކަށް ހަމަލާދިނުމަކީވެސް އިނގިރޭސިންގެ ސަބްމެރިން އެހިސާބަށް ދަތުރުކުރުމުގެ އެއް މަޤްސަދެވެ.

'އެސްޓިއުޓް ކްލާސް' ގެ މި ސަބްމެރިންއަކީ އިނގިރޭސި ކަނޑުގެ ސިފައިންގެ އަތުގައި އޮތް އެންމެ ބާރުގަދަ ހަމަލާދޭ އުޅަނދެވެ. މިއީ ކަނޑުގެ އަޑީގައި އޮވެގެން ދުޝްމަނުންނަށް ނޭނގި، އެއްގަމުގައި ހުންނަ އަމާޒުފަތްތަކަށް ނުރައްކާތެރި ހަމަލާތަކެއް ފޮނުވާލުމުގެ ފުރިހަމަ ގާބިލުކަން ލިބިފައިވާ އުޅަނދެކެވެ. މި ސަބްމެރިން އަރަބި ކަނޑުގައި މަގާމު ހޯދުމަކީ، އިރާނަށް ދެވޭ ވަރުގަދަ އިންޒާރެއް ކަމަށް 'ޑެއިލީ މެއިލް' އިން ސިފަކޮށްފައިވެއެވެ.