ކުޑަހުވަދޫ ބޮޑުޢީދު ފުޓްސަލް ޗެލެންޖްގެ ގުރުނެގުން ބާއްވައިފި؛ މުބާރާތުގައި 8 ޓީމެއް ވާދަކުރާނެ

ދ. ކުޑަހުވަދޫގައި ބޮޑުޢީދާ ދިމާކޮށް ބްރަދާސް އެކަޑަމީން އިންތިޒާމުކޮށްގެން ބާއްވާ "ކުޑަހުވަދޫ ބޮޑުޢީދު ފުޓްސަލް ޗެލެންޖް 1447" ގެ ގުރުނެގުމުގެ ރަސްމިއްޔާތު ބާއްވައިފިއެވެ.

މިއީ ކުޑަހުވަދޫގައި ބޮޑުޢީދާ ދިމާކޮށް މިހާރު ކުރިއަށް ގެންދާ އެންމެ ބޮޑު ފުޓްސަލް މުބާރާތެވެ.

މި މުބާރާތުގައި މިއަހަރު ޖުމްލަ 8 ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ދެ ގްރޫޕަކަށް ބަހާލައިގެންނެވެ. މުބާރާތުގައި ބައިވެރިވެފައިވާ ޓީމުތަކަކީ:

މައިދާން ސްޕޯޓްސް ކުލަބް (މިދިޔަ އަހަރުގެ ޗެމްޕިއަން)

ރުއްދަށް ސްޕޯޓްސް ކުލަބް

ޔުނައިޓެޑު ރޯޔަލްސް

ރޯޔަސް ސިޓީ

ޑްރީމް އެފްސީ

ގުޅުން ކަންމަތި އެސްސީ

އައްކަން އެސްސީ

އައްސޭރި އެއްސީ

ކުޑަހުވަދޫ ކައުސިލްގެ ސެމިނަރ ރޫމް ގައި ކުރިޔަށް ގެންދިޔަ މި ހަފްލާ ޝަރަފްވެރި ކޮށްދެއްވީ ކުޑަހުވަދޫ ކައުންސިލްގެ ރައީސް މުޙައްމަދު ސަލީމެވެ.

މި މުބާރާތުގެ ގުރުނެގުމުގެ ހަފުލާގައި ވާހަކަދައްކަވަމުން، މުބާރާތް އިންތިޒާމްކުރާ ބްރަދާސް އެކަޑަމީގެ ޗެއަރ އަލްފާޟިލް އިސްމާޢީލް ޢާދިލް ވިދާޅުވީ، މި މުބާރާތް ބޭއްވުމުގެ މައިގަނޑު މަޤުޞަދަކީ ކުޑަހުވަދޫގެ ފުޓްސަލްއަށް އިތުރު ކުރިއެރުން ހޯދައިދީ، ރަށުގެ ކުޅިވަރުގެ ފެންވަރު މަތިކުރުން ކަމަށެވެ.

މީގެ އިތުރުން، ހުރިހާ ޓީމުތަކަކުންވެސް ކުޅިވަރުގެ ރޫޙާ އެއްގޮތަށް، އެކުވެރިކަމާއެކު މުބާރާތުގައި ވާދަކުރުމަށް އޭނާ ވަނީ އިލްތިމާސްކުރައްވާފައެވެ.

ފޯރިގަދަ ކުޅުމެއް ފެނިގެންދާނެ ކަމަށް ބެލެވޭ މި މުބާރާތް ފެށުމަށް ހަމަޖެހިފައިވަނީ 2026 މެއި 27 ވާ ބުދަ ދުވަހުގެ ރޭ 21:30 ގައެވެ. ބޮޑުޢީދުގެ ފޯރިއާއެކު ބާއްވާ މި މުބާރާތަކީ ކުޑަހުވަދޫގެ ޒުވާނުންނާއި ކުޅިވަރަށް ލޯބިކުރާ ފަރާތްތަކުގެ މެދުގައި ވަރަށް ބޮޑު މަޤުބޫލުކަމެއް ލިބެމުން އަންނަ މުބާރާތެކެވެ.