"10 ވަނަ ކިކާޒް ފުޓްބޯލް ކާނިވަލް"ގެ 12 އަހަރުން ދަށުގެ ޗެންޕިއަންކަން ހޯދި ޓީމުގައި އޭމްޖީ ސްޕޯޓްސް ސެކަޑަމީގެ ތިން ކުޅުންތެރިން

ސްރީ ލަންކާގެ ކިކާޒް އެކެޑެމީން އިންތިޒާމުކޮށްގެން ކުރިއަށްގެންދިޔަ 10 ވަނަ ކިކާޒް ފުޓްބޯލް ކާނިވަލްގައި ވާދަކޮށް 12 އަހަރުން ދަށުގެ ޗެންޕިއަންކަން ހޯދި ވިލިމާލެ ޔުނައިޓެޑުގެ ޓީމުގައި އެމްޖީ ސްޕޯޓްސް އެކަޑަމީގެ ތިން ކުޅުންތެރިޔަކު ހިމެނިއްޖެއެވެ.

މި މަހުގެ 21 އިން 22 އަށް ކުރިއަށްގެންދިޔަ މިމުބާރާތުގައި ވާދަކުރި ވިލިމާލޭ ޔުނައިޓެޑުގެ ޓީމުގައި ހިމެނުނު އެމްޖީ ސްޕޯޓްސް އެކަޑަމީގެ ތިން ކުޅުންތެރިންނަކީ ކައިޝް އަނިލް އާދަމް، އަޙްމަދު ޝަމަލް ސާލިމް އަދި އާކިން ސާޖިދު ސަމީރު އެވެ.

މި މުބާރާތަކީ ބައިނަލްއަގުވާމީ ޓީމުތަކަށް ހުޅުވާލައިގެން ކުރިއަށް ގެންގޮސްފައިވާ މުބާރާތެކެވެ. ޖުމްލަ ހަތަރު އުމުރުފުރާއަކުން މި މުބާރާތުގައި ވާދަކޮށްފަވާއިރު ރާއްޖޭގެ ވިލިމާލެ ޔުނައިޓެޑުން މުބާރާތުގައި ވާދަކޮށްފައިވަނީ 14 އަހަރުން ދަށުގެ އުމުރުފުރާ އާއި 12 އަހަރުން ދަށުގެ އުމުރުފުރާގައެވެ. އަދި ދެ އުމުރުފުރައިން ވެސް އެޓީމު ވަނީ ޗެންޕިއަންކަން ހޯދާފައެވެ.

މި މުބާރާތުގެ ފައިނަލް މެޗުތައް މިމަހުގެ 22 ވަނަ ދުވަހު ކުޅެފަވާއިރު، 14 އަހަރުން ދަށުގެ އުމުރުފުރައިގެ ޗެންޕިއަންކަން ވިލިމާލެ ޔުނައިޓެޑުން ހޯދީ ފައިނަލުގައި ވާދަވެރި ކުޅުމަކަށްފަހު 1-0 ގެ ނަތީޖާއަކުންހިލްސް އެފްސީ ބަލިކުރުމަށްފަހު އެވެ. އަދި މި މެޗުގެ މޮޅު ކުޅުންތެރިއަކަށް ހޮވިފައިވަނީ ވިލިމާލެ ޓީމުގެ މުޙައްމަދު އާކިލް ޔަމީންއެވެ.

މުބާރާތުގެ 12 އަހަރުން ދަށުގެ އުމުރުފުރާގެ ޗެންޕިއަންކަން ވިލިމާލެ ޔުނައިޓެޑުން ހޯދީ ގޭޓްވޭ ވަންއާއި ވާދަކޮށް 1-0 ގެ ނަތީޖާއަކުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ މޮޅު ކުޅުންތެރިޔަކަށް ހޮވުނީ ވިލިމާލެ ޔުނައިޓެޑުގެ އަޙްމަދު ޔުމާން އަމީންއެވެ.

ލަންކާގެ ވެރިރަށް ކޮލޮމްބޯގެ ރޭސްކޯސް ފުޓްބޯޅަ ދަނޑުގައި ކުރިއަށްދިޔަ މި މުބާރާތުގައި ހަތަރު އުމުރުފުރާއަކުން 15 އެކަޑަމީއަކުން 56 ޓީމު ވާދަކޮށްފައިވާއިރު މިއީ ބައިނަލްއަގުވާމީ ޓީމުތަކަށް ހުޅުވާލައިގެން މިމުބާރާތް ބޭއްވި ފުރަތަމަ ފަހަރެވެ.