ކަޕްވިނާސްކަޕްގެ ޗެމްޕިއަންކަން މާޒިޔާ ހޯދައިފި

ކަޕްވިނާސްކަޕްގެ ޗެމްޕިއަންކަން ނިއުރޭޑިއަންޓް ސްޕޯޓްސް ކްލަބް ބަލިކުރުމަށްފަހު މާޒިޔާ ސްޕޯޓްސް ކްލަބް ހޯދައިފިއެވެ.

ގަލޮޅު ރަސްމީ ބޯލަ ދަނޑުގައި ކުޅުނު މިމެޗް ނިއު ބަލިކޮށް މާޒިޔާ މެޗް ކާމިޔާބުކުރީ، ޕެނަލްޓީ ޖަހައިގެން 6-4 ގެ ނަތީޖާއިންނެވެ. ޕެނަލްޓީ ޖަހައިގެން މެޗްގެ ނަތީޖާ ނެރެފައިވަނީ މެޗްގެ ކުޅުމުގެ ވަގުތު ނިމުނުއިރު 2-2 ގެ ނަތީޖާއިން ދެޓީމް އެއްވަރުވުމުންނެވެ.

މެޗްގައި އެންމެ ފުރަތަމަ ލަނޑެއް ޖަހައި ލީޑް ނެގީ މާޒިއާ އެވެ. އެއީ މެޗް ފެށިގެން ހަތަރުވަނަ މިނެޓް ތެރޭގައި އިލާން އެވެ. މާޒިޔާއިން ލީޑް ނަގާފައިވަނިކޮށް ނިއުގެ އަލީ ފާސިރު، ސެންޓޭ ވަނީ 16 ވަނަ މިނެޓް ތެރޭގައި ލަނޑެއް ޖަހައި އެއްވަރުކޮށްފައެވެ. ދެވަނަ ފަހަރަށް މާޒިޔާއިން ވަނީ 28 ވަނަ މިނެޓް ތެރޭގައި އަމްދާން ޖަހައިދިން ލަނޑުން ލީޑް ނަގާފައެވެ. ނަމަޗެސް 35 ވަނަ މިނެޓް ތެރޭގައި ސެންޓޭ ވަނީ އަނެއްކާވެސް ލަނޑެއް ޖަހައި މެޗް އެއްވަރުކޮށްދީފައެވެ.

މެޗްގައި ނިއުގެ ބްރެޒިލްގެ ފޯވަޑް ޑޯރިއެލްޓަން ގޯމޭޒް އަށް މާބޮޑު ކަމެއް ނުކުރެވުނެވެ. އެގޮތުން ޕެނަލްޓީ ޝޫޓްއައުޓްގައި އޭނާ ޖެހި ޕެނަލްޓީވެސް ދިޔައީ ދަނޑިކައިރިން ބޭރަށެވެ.

މާޒިޔާއިން ކަޕްވިނާސްކަޕް ކާމިޔާބުކުރިއިރު، އެޓީމުން ވަނީ ސީޒަން ހުޅުވި ޗެރިޓީ ޝީލްޑްވެސް ކާމިޔާބުކޮށްފައެވެ. މާޒިޔާ ޗެރިޓީ ޝީލްޑް ގެންގޮސްފައިވަނީވެސް ނިއު ބަލިކުރުމަށްފަހުގައެވެ.