ފަހަތުން އަރައި ބިރާގަން ބަލިކޮށް އެލްކިއު ލުއްޗާޒް ޗެންޕިއަންކަން ހޯދައިފި

ވިލިމާލޭގައި މިހާރު ކުރިއަށްދާ "އޮބިއަން ޓީއެފްޓީ 11 ވަނަ ރަމަޟާން ފުޓްސަލް ޗެލެންޖު 2024" ގެ ފައިނަލުގައި ހޯމަ ދުވަހުގެ ރޭ އެލްކިއު ލުއްޗާޒް އާއި ބިރާގަން އެސްސީ ކުޅުނު މެޗު ވާދަވެރި ކުޅުމަކަށްފަހު 2-1 ގެ ނަތީޖާއަކުން ކާމިޔާބުކޮށް ލުއްޗާޒް އިން މުބާރާތްގެ ޗެންޕިއަންކަން ހޯދައިފި އެވެ.

އެލްކިއު ލުއްޗާޒް މުބާރާތުގެ ފައިނަލުން ޖާގަ ހޯދީ ސެމީ ފައިނަލުގައި ފަސޭހަކަމާއި އެކު 4-1 ގެ ނަތީޖާއަކުން އޮޑި ބަދަވީސް ބަލިކުރުމަށްފަހު އެވެ. އަދި ބިރާގަން އެސްސީ އިން މުބާރާތުގެ ފައިނަލުން ޖާގަ ހޯދައިފި ސެމީ ފައިނަލުގައި ވާދަވެރި ކުޅުމަކަށްފަހު 1-0 ގެ ނަތީޖާއަކުން ވައިޑީ ސްޕޯޓްސް ކުލަބު ބަލިކުރުމަށްފަހު އެވެ.

ވިލިމާލޭ ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ބިރާގަން އެސްސީ އިންނެވެ. މިލަނޑު އެޓީމުގެ ކެޕްޓަން އިސްމާޢިލް މުނީޒް ކާމިޔާބުކޮށްދިންއިރު، ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ބިރާގަން އެސްސީ ކުރީގައި އޮވެގެންނެވެ.

މެޗުގެ ދެވަަނަ ހާފުގައި އެލްކިއު ލުއްޗާޒް އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ދެވަނަ ހާފުގައިި އެޓީމުން ވަނީ ދެލަނޑު ކާމިޔާބުކޮށްފައެވެ. އަދި މިދެލަނޑު ވެސް އެޓީމަށް ކާމިޔާބުކޮށްދިނީ އަބްދުﷲ ވިސާމް އެވެ. މިއާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން އެލްކިއު ލުއްޗާޒް ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ އެލްކިއު ލުއްޗާޒްގެ އަބްދުﷲ ވިސާމް އެވެ.

މުބާރާތުގެ އެންމެ މޮޅު ފަސް ކުޅުންތެރިންނަކީ އިސްމާއިލް ވިފާގު (އެލްކިއު ލުއްޗާޒް), އަހުމަދު މަހްދީ (އެލްކިއު ލުއްޗާޒް), މުހައްމަދު ޒުހާލް (އެލްކިއު ލުއްޗާޒް), އިސްމާއިލް މުނީޒް (ބިރާގަން އެސްސީ) އަދި އިބްރާހިމް ސިނާހް (ބިރާގަން އެސްސީ) އެވެ.

މުބާރާތުގެ ފެއާޕްލޭ ޓީމަކަށް އެލްކިއު އެސްސީ ހޮވުނު އިރު، އެންމެ އުންމީދީ ކުޅުންތެރިއަކަށް ހޮވުނީ ބިރާގަން އެސްސީގެ އަހުމަދު އަފްލާޒް އެވެ. އަދި މުބާރާތްގެ އެންމެ ގިނަ ލަނޑުޖެހި ކުޅުންތެރިޔާގެ މަގާމު ހޯދީ ކުލަބު ލިއޮންސްގެ ހަސަން ސަމީއު އެވެ.

މީގެ އިތުރުން މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ އެލްކިއު ލުއްޗާޒްގެ އިސްމާއިލް ވިފާގު އެވެ.

ޗެންޕިއަން ޓީމަށް 50,000 އަދި ރަނަރަޕް ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު 32 ޓީމަކުން ބައިވެރިވެފައިވާއިރު މުބާރާތް ކުރިއަށް ދަނީ ބައިވެރިވި 32 ޓީމު 8 ގުރޫޕަކަށް ބަހާލައިގެންނެވެ.

މިމުބާރާތުގެ މެއިން ސްޕޮންސަރ އަކީ އޮބިއަން އެވެ. އަދި މުބާރާތުގެ މީޑިއާ ޕާޓްނަރަކަށް ހަމަޖައްސާފައި ވަނީ ވޮއިސް އެވެ.