ބާޒާރުގައި އެންމެ އަގުބޮޑީ ފަނިގިރުމަށް ބޭނުންކުރާ ތަކެތި

އަޅުކަމުގެ މައްސަރެއް ނަމަވެސް ރޯދަމަސް ފާހަގަކުރެވެނީ، މުޅި އަހަރުގެ ތެރޭގައިވެސް ކާބޯތަކެތީގެ ބާވަތްތަކުގެ އަގުތަކަށް އެންމެ ބޮޑު ބަދަލެއް އަންނަ މަހެއްގެ ގޮތުގައެވެ. ދުވާލު އެއްކޮށް ކެއިން ބުއިމާ ދުރުހެލިވެގެން ތިބިނަމަވެސް ރޯދަމަސް ފާހަގަކުރެވެނީ މާލޭ ބާޒާރުގައި ކާބޯތަކެތީގެ ޑިމާންޑު އެންމެ މައްޗަށްދާ މަހުގެ ގޮތުގައެވެ. ރޯދަމަހު ކާބޯތަކެއްޗަށް އޮންނަ ބޮޑު ޑިމާންޑާއެކު ބާޒާރުގައި އެތަކެތީގެ އަގުތައްވެސް އުފުލިގެން ދެއެވެ.

ރޯދަމަހުގެ ފުރަތަމަ ދުވަހު ބާޒާރުގެ އަގުތަކަށް ބަލާއިރު، އަގުތައް އެންމެ މައްޗަށް ގޮސްފައިވަނީ ފަނިގިރުމަށް ބޭނުންކުރާ ތަކެއްޗެވެ. ރޯދަމަސް ފެށެން ހަފްތާއަކަށް ވީއިރު، ދަތުރުވެރިންގެ މާރުކޭޓުގައި ދިވެހި ކަރާކިލޯއެއްގެ އަގު 20 ރުފިޔާ އާއި 18 ރުފިޔާ އާ ދެމެދުގެ އަގެއްގައި ހުރިއިރު، އިންޑިއާ ކަރާ ކިލޯއެއް އެންމެ ބޮޑުވެގެންވެސް 15 ރުފިޔާއަށް ލިބެންހުއްޓެވެ. އަދި ބާޒާރުމަތީ ބައެއް ފިހާރަތަކުގައި ކަރާ ކިލޯއެއް 12 ރުފިޔާއަށްވެސް ލިބެން ހުއްޓެވެ.

ދަތުރުވެރިންގެ މާރުކޭޓުގައި މިއަދު ތޮއްޑޫ އަދި ކަނޑޫދޫން ގެނައި ކަރާ ކިލޯއެއްގެ އަގުހުރީ 22 ރުފިޔާ އާއި 25 ރުފިޔާ އާ ދެމެދުގެ އަގުތަކެއްގައެވެ. ހުޅުމާލޭގައި ކަރާ ކިލޯއެއްގެ އަގު ހުރީ 25 ރުފިޔާއިން މަތީގައެވެ. ދެވަނަ ފިޔަވަހީގެ ބައެއް ފިހާރަތަކުން ދިވެހި ކަރާ ކިލޯއެއް 39 ރުފިޔާއަށްވެސް ލިބެން އެބަހުއްޓެވެ.

ކަރާގެ އިތުރުން މާލޭ ބާޒާރުގައި ދެން އެންމެ އަގު އުފުލިގެން ދިޔައީ ފެޝަންފުރުޓެވެ. ރޯދަމަސް ފެށުމުގެ ކުރިން 85 ރުފިޔާއަށް ވިއްކި ފުރުުޓު ކިލޯއެއްގެ އަގު މިއަދު ހުރީ 130 ރުފިޔާ އާއި 150 ރުފިޔާ އާ ދެމެދުގެ އަގުތަކެއްގައެވެ.

ރޯދަމަސް އައުމުގެ ކުރިންވެސް މާލޭ ބާޒާރުގައި އޮރެންޖު ލިބުން ދަތިވެ، އޮރެޖެއްގެ އަގު ވަނީ 12 ރުފިޔާއަށް އަރާފައެވެ. ދަތުރުވެރިްނގެ އިތުރުން ބާޒާރުމަތީ ފިހާރަތަކުގައި މިއަދު އޮރެންޖެއް ލިބެންހުރީ 10 ރުފިޔާ އާއި 12 ރުފިޔާ އާ ދެމެދުގެ އަގެއްގައެވެ.

ބާޒާރުގައި އަގުބޮޑުވި އިތުރު ބާވަތްތަކުގެ ތެރޭގައި ފޭރު، އަދި އަނބު ފާހަގަކޮށްލެވެއެވެ.

ފަނިގިރުމަށް ބޭނުންކުރާ ތަކެތީގެ އަގުތައް މައްޗަށްދިޔައިރު، ތަރުކާރޫގެ ބާވަތްތަކުގެ ތެރެއިން އަގުތައް އެންމެ ބޮޑަށް މައްޗަށްދިޔަ ބާވަތްތަކުގެ ތެރޭގައި ކެރެޓް އަދި ލުނބޯ ފާހަގަކޮށްލެވެއެވެ.

ރޯދަ އައުމުގެ ކުރިން 25 ރުފިޔާއަށް ކެރެޓް ކިލޯއެއް ލިބުނު ނަމަވެސް، މިއަދު ބާޒާރުގައި ކެރެޓް ކިލޯއެއްގެ އަގު ހުރީ 55 ރުފިޔާ އާ ގާތްކުރާ އަގުތަކެއްގައެވެ. އަދި ބާޒާރުމަތިން 60 ރުފިޔާ އާ ގާތްކުރާ އަގަކަށް ލުނބޯ ކިލޯއެއްގެ އަގުހުރިއިރު، ހުޅުމާލޭގެ ބައެއް ފިހާރަތަކުން ލުނބޯ ކިލޯއެއް ވިއްކަނީ 80 ރުފިޔާއަށެވެ.

ވިޔަފާރިވެރިން ބުނާގޮތުގައި ފަނިގިރުމަށް ބޭނުންކުރާ ތަކެތި، މިހާރު އަގުބޮޑުކޮށް ހުރި ނަމަވެސް ކުރިއަށްއޮތް ދުވަސްތަކުގައި އެ ބާވަތްތައް އިތުރަށް ގެނައުމުން އަގުތައް ތިރިވެގެން ދާނޭކަމަށެވެ.