ޕެނަލްޓީގައި ހޯރަފުށި ބަލިކޮށް މާރަންދޫ ސެމީފައިނަލަށް

ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް، ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024 ގެ ހއ. އަތޮޅު ބުރުގެ ކުއާޓާ ފައިނަލުގެ ފުރަތަަމަ މެޗުގައި މާރަންދޫ އާއި ހޯރަފުށި ވާދަކުރި މެޗު 2-2 ގެ ނަތީޖާއަކުން އެއްވަރުވެ، ޕެނަލްޓީގައި 6-3 ގެ ނަތީޖާއަކުން މޮޅުވެ މާރަންދޫ އިން މުބާރަތުގެ ސެމީ ފައިނަލުން ޖާގަ ހޯދައިފި އެވެ.

ހުޅުމާލޭ ރެހެންދި އެއް ނަންބަރު ފުޓްސަލް ދަނޑުގައި ކުޅެވުނު މި މެޗުގެ ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިމެޗުގައި ފުރަތަަމަ ލަނޑުޖަހައި ކުރިހޯދީ ހޯރަފުށިން ނެވެ. މިލަނޑު ފުރަތަމަ ހާފު ފެށިގެން ފަސްވަނަ މިނެޓްގައި ކާމިޔާބުކޮށްދިނީ އެޓީމުގެ ހުސެއިން އިރުޝާދު އެވެ.

މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ހޯރަފުށި ކުރީގައި އޮވެގެންނެވެ.

މެޗުގެ ދެވަަނަ ހާފު މާރަންދޫ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ 32 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ހަމްދޫން އަބްދުއް ލަތީފު އެވެ. ނަމަވެސް އޭގެ ފަސް މިނެޓު ފަހުން ހޯރަފުށިން ވަނީ ލަނޑެއް ކާމިޔާބުކޮށް ދެވަނަ ފަހަރަށް މެޗުގެ ލީޑު ހޯދާފައެވެ.

މިލަނޑު އެޓީމަށް ކާމިޔާބުކޮށްދިނީ ހޯރަފުށީގެ ކެޕްޓަން އަބްދުﷲ ޔަމީން އެވެ. މިއީ މާރަންދޫގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާ ގޯލްގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ހޯރަފުށި ކުރީގައި އޮވެގެން މެޗު ނިމެން ދަނިކޮށް މެޗުގެ އިތުރު ވަގުތުގެ ތެރޭގައި މާރަންދުއަށް މެޗުގެ ނަތީޖާ އެއްވަރުކޮށްދިނީ ހަމްދޫން އަބްދުއް ލަތީފު އެވެ.

މިއީ ހޯރަފުށީގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމެއްގައި ތިރިތިރިން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މިލަނޑާއެކު މެޗުގެ ފުރަތަަމަ ވަގުތުގެ ކުޅުން ހަމަވިއިރު، ދެޓީމު އޮތީ 2-2 ގެ ނަތީޖާއަކުން އެއްވަރުވެފައެވެ.

މިއާއެކު ނަތީޖާ ނެރުމަށްޓަކައި ޖެހި ޕެނަލްޓީގައި މާރަންދޫ އިން ކުރިހޯދީ 6-3 ގެ ނަތީޖާއަކުންނެވެ. މާރަންދޫ ޓީމުން މުހައްމަދު ތަހުސީނު، މުހައްމަދު އާދަމް، ހަމްދޫން އަބްދުއް ލަތީފު އަދި އަހުމަދު މުހައްމަދު ކުރިއަށް ފޮނުވާލި ޕެނަލްޓީތައް މިކުޅުންތެރިން ކަމިޔާބުކުރި އިރު، ހޯރަފުށީގެ ތިން ޕެނަލްޓީގެ ތެރެއިިން އެޓީމަށް ކާމިޔާބުކުރެވުނީ ކެޕްޓަން އަބްދުﷲ ޔާމީން ޖެހި ޕެނަލްޓީ އެކަންޏެވެ.

ހޯރަފުށީގެ އާދަމް މާހިލް ކުރިއަށް ފޮނުވާލި ޕެނަލްޓީ ގޯލުގެ ހުރަސް ދަނޑިއަށް އަމާޒުވިއިރު، އެޓީމުގެ އިބްރާހިމް ބިޝާރު ކުރިއަށް ފޮނުވާލި ޕެނަލްޓީ މާރަންދޫގެ ކީޕަރު ނައުފަލް މޫސާ ވަނީ ދިފާއުކޮށްފައެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ މާރަންދޫ ޓީމުގެ ހަމްދޫން އަބްދުއް ލަތީފު އެވެ.