އެމެރިކާއިން ދުއްތުރާ ކުރާނަމަ، ހުރްމުޒް ކަނޑުއޮޅި ބަންދުކުރަން ޖެހިދާނެ: އީރާން

އެމެރިކާއި އީރާނުގެ ބަނދަރުތަކަށް ދުއްތުރާކުރާނަމަ، ހުރްމުޒް ކަނޑުއޮޅިން ދަތުރުކުރުމަށް ދީފައިވާ ލުއިތަށް އަނބުރާ ގެންނަން ޖެހިދާނޭކަމަށް އީރާނުން ބުނެފިއެވެ.

އޭއެފްޕީ ނިއުސް އެޖެންސީއަށް ދެއްވި ބަސްދީގަތުމެއްގައި އީރާނުގެ ޤާނޫނު ހަދާ މަޖިލީހުގެ ރައީސް މުޙައްމަދު ބާޤިރު ޤާލީބާފް ވިދާޅުވީ، އީރާނާ ގުޅޭގޮތުން އެމެރިކާގެ ރައީސް ޑޮނާލްޑް ޓްރަމްޕް ދައްކަވަމުން ގެންދަނީ ހަގީގަތާ ހިލާފް ވާހަކަތަކެއް ކަމަށާއި، ހެދިފައިވާ އެއްބަސްވުންތަކާއެކު އީރާނުން ދެމިއޮތްކަމަށެވެ. އެހެނެއްކަމަކު އެމެރިކާއިން އީރާނުގެ ބަނދަރުތަކަށް އަމާޒުކޮށް ހަރަކާތްތައް ހިންގަމުންދާކަން ފާހަގަކުރައްވަމުން ބާޤިރު ވިދާޅުވީ އެ ބީދައިން ކަންކަން ކުރާނަމަ އީރާނުންވެސް ކަންކަން ކުރަމުންދާނޭކަމަށެވެ.

ހަނގުރާމަ ހުއްޓާލުމުގެ އެއްބަސްވުމުގެ ތެރެއިން އީރާނުން ވަނީ ބޯޓުތަކަށް ހުރުމުޒް ކަނޑުއޮޅިން ދަތުރުކުރެވޭނޭމަގު ތަނަވަސްކޮށްދީފައެވެ. ނަމަވެސް އަސްކަރީ އުޅަނދުތަކަށް އެއްވެސް ސިފައެއްގައި އެ ހިސާބުން ދަތުރު ނުކުރެވޭނޭކަމަށް އީރާނުން ވަނީ ބުނެފައެވެ. ދެފަރާތުގެ ދެމެދުގައި ކަންބޮޑުވުން އިތުރުވީ، އެމެރިކާގެ އަސްކަރިއްޔާއިން ހުރްމުޒް ކަނޑުއޮޅި ކައިރީ ހަރަކާތްތެރިވާން އުޅުމުންނެވެ. މިކަމާ ގުޅިގެން އީރާނުން ވަނީ އެމެރިކާއަށް އިންޒާރު ދީފައެވެ.

އިސްރާއީލްގެ މީޑިއާތަކުން ބުނެފައިވަނީ، ހުރްމުޒް އީރާން ސަރަހައްދުގައި ތާށިވެފައި އޮތް 21 ބޯޓެއް މިއަދު އެކަނިވެސް ނިކުމެ ދަތުރަށް ފަށާފައިވާކަމަށެވެ.

ހަމަލާތައް ބަދަލުކުރުން ވަގުތީގޮތުން މެދުކަނޑާލުމުގެ އެއްބަސްވުމުގެ ދަށުން އިސްރާއީލުން ލުބްނާނަށް ބޮންއެޅުން ހުއްޓާލާފައިވާކަމަށް ޓްރަމްޕް ޔަގީންކޮށްދީފައިވާއިރު، އިސްރާއީލުގެ ހަމަލާތަކުގެ ސަބަބުން ލުބްނާނުގެ ގެދޮރު ދޫކޮށްދާން މަޖުބޫރުވި އެތައް ހާސް ބަޔަކު ވަނީ އެނބުރި ގެދޮރަށް ދާން ފަށާފައެވެ.