ސްޓެލްކޯ މަހިބަދޫ އިންޓަ-އޮފީސް ވޮލީބޯޅަ މުބާރާތް: ފޯރިގަދަ މެޗުތަކަކަށްފަހު ފެނަކަ އަދި ޕޮލިސް މޮޅުވެއްޖެ

އދ. މަހިބަދޫގައި ފޯރިއާއެކު ކުރިއަށްދާ "ސްޓެލްކޯ މަހިބަދޫ އިންޓަ-އޮފީސް ވޮލީބޯޅަ މުބާރާތް 2026" ގެ ފަސްވަނަ އަދި ހަވަނަ މެޗު ވާދަވެރި ކުޅުމަކަށްފަހު ފެނަކަ އަދި ޕޮލިސް ޓީމުން ކާމިޔާބުކޮށްފިއެވެ.

މުބާރާތުގެ ފަސްވަނަ މެޗުގައި ބައްދަލުކުރީ މަހިބަދޫ ކައުންސިލްގެ ޓީމާއި ފެނަކަ ޓީމެވެ. މި މެޗު ސީދާ ދެ ސެޓުން ކާމިޔާބުކުރީ ފެނަކަ ޓީމެވެ. ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ސެޓު 20-25 އިން ފެނަކަ ގެންދިޔައިރު، ދެވަނަ ސެޓު ވާދަވެރި ކުޅުމަކަށްފަހު އެ ޓީމުން ކާމިޔާބުކުރީ 22-25 އިންނެވެ.

މި މެޗުގެ މޮޅު ކުޅުންތެރިޔާގެ މަގާމު ހޯދީ ފެނަކަ ޓީމުގެ ޖާޒީ ނަންބަރު 14، އާދަމް ނައުފަލްއެވެ.

މުބާރާތުގެ ހަވަނަ މެޗުގައި ވާދަކުރީ ޕޮލިސް ޓީމާއި ސްޓެލްކޯ ޑީ-16 ގެ ޓީމެވެ. މި މެޗު ސީދާ ދެ ސެޓުން ކާމިޔާބުކުރީ ޕޮލިސް ޓީމެވެ. މެޗުގެ ފުރަތަމަ ސެޓު 22-25 އިން ޕޮލިސް ޓީމު ކާމިޔާބުކުރިއިރު، ދެވަނަ ސެޓު އެ ޓީމުން ގެންދިޔައީ ފަސޭހަކަމާއެކު 15-25 އިންނެވެ.

މި މެޗުގެ މޭން އޮފް ދަ މެޗަކަށް ހޮވިފައިވަނީ މޮޅު ކުޅުމެއް ދެއްކި ޕޮލިސް ޓީމުގެ ޖާޒީ ނަންބަރު 19، މަހުދީ މުޙައްމަދެވެ.

މަހިބަދޫ ސްޓެލްކޯ އިންޖީނުގެއިން އިސްނަގައިގެން މި މުބާރާތް ބާއްވާ މިއީ ތިންވަނަ އަހަރެވެ. މުއައްސަސާތަކުގެ މެދުގައި އެކުވެރިކަން ބަދަހިކުރުމުގެ މަގްސަދުގައި ބާއްވާ މި މުބާރާތް، ވޭތުވެދިޔަ އަހަރުތަކާ ޚިލާފަށް މި އަހަރު ކުރިއަށް ގެންދަނީ ފިރިހެން އަދި އަންހެން ޑިވިޝަން ވެސް ހިމަނައިގެންނެވެ.

މި ފަހަރުގެ މުބާރާތުގައި މަހިބަދޫގެ 14 މުއައްސަސާއަކުން ޖުމްލަ 19 ޓީމަކުން ވަނީ ބައިވެރިވެފައެވެ. އޭގެ ތެރޭގައި ހިމެނެނީ ފިރިހެން 10 ޓީމާއި އަންހެން 9 ޓީމެވެ. މީގެއިތުރުން، 222 ކުޅުންތެރިންނާއި 86 އޮފިޝަލުންނާއެކު ޖުމްލަ 308 ފަރާތަކުން މި މުބާރާތުގައި ހަރަކާތްތެރިވާއިރު، މުޅި މުބާރާތުގައި ޖުމްލަ 42 މެޗު ކުޅުމަށް ވަނީ ތާވަލުކުރެވިފައެވެ.