ބޭރިއަންސް ބަލިކޮށް ހޭވައްލާ އިން މުބާރާތުގެ ފެށުން ރަނގަޅުކޮށްފި

ރ.އަތޮޅު ކިނޮޅަސްގައި މިހާރު ކުރިއަށްދާ "23 ވަނަ ޖަމިއްޔަތުލް އިއްތިހާދު ވޮލީބޯޅަ ޓޯނަމަންޓް 2024" ގެ ދެވަނަ މެޗުގައި މިރޭ ބޭރިއަންސް އާއި ހޭވައްލާ ވާދަކުރި މެޗު ތިން ސެޓުން އެއް ސެޓުން ކާމިޔާބުކޮށް ހޭވައްލާ އިން މުބާރާތުގެ ފެށުން ރަނގަޅުކޮށްފި އެވެ.

މިރޭގެ މެޗުގެ ފުރަތަަމަ ސެޓުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ސެޓް 25-22 އިން ކާމިޔާބުކުރީ ހޭވައްލާ އިންނެވެ. ނަމަވެސް ޖެހިގެންއައި ދެވަނަ ސެޓުގައި ބޭރިއަންސް އިން ވަނީ އެޓީމުގެ ކުޅުން ރަނގަޅުކޮށް ޑިފެންސާއި އެޓޭކުތައް ވެސް ވަރުގަދަކޮށްފައެވެ. ނަތީޖާއެއްގެ ގޮތުން މި ސެޓު އެޓީމުން ކާމިޔާބުކުރީ 17-25 އިންނެވެ.

މެޗުގެ ތިންވަނަ ސެޓްގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު މިސެޓް ހޭވައްލާ އިން ކާމިޔާބުކުރީ 20-25 އިންނެވެ. އަދި މެޗުގެ ހަތަރުވަނަ ސެޓު ވާދަވެރި ކުޅުމަކަށްފަހު 21-25 އިން ކާމިޔާބުކުރީ ހޭވައްލާ އެވެ. މިއާއެކު މެޗުގެ ކުޅުން ނިމިގެންދިޔައީ ތިން ސެޓު އެއް ސެޓުން ހޭވައްލާ ކުރީގައި އޮވެގެންނެވެ.

މިމެޗުގެ މޭން އޮފް ދަ މެޗަކަށް ހޮވުނީ ހޭވައްލާ ޓީމުގެ މުހައްމަދު ރިމާޒު އެވެ.

26 ޖެނުއަރީ 2024 އިން 03 ފެބުރުއަރީ 2024 ގެ ނިޔަލަށް ކުރިޔަށް ގެންދިއުމަށް ހަމަޖެހިފައިވާ މިއަހަރުގެ މުބާރާތުގައި ހަތަރު ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްފަހަރު ކުޅެ އެންމެ ގިނަ ޕޮއިންޓް ހޯދާ ޓީމަކަށް މުބާރާތުގެ ފައިނަލުން ޖާގަ ލިބޭގޮތަށެވެ. އަދި ފައިނަލްގެ ދެވަނަ ޖާގަ ލިބިގެންދާނީ ލީގު ބުރުގެ ދެވަނަ ޓީމާއި ތިންވަނަ ޓީމުގެ މެދުގައި ސެމީ ފައިނަލް މެޗެއް ކުޅެ އެމެޗުން މޮޅުވާ ޓީމަކަށެވެ.