ތަފާތުބޮޑު ނަތީޖާއަކުން ކަނޑިތީމު އަތުން ބަލިވެ، މަރޮށި މުބާރަތުން ކަޓައިފި

ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް، ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024 ގެ ށ. އަތޮޅު ބުރުގެ ގުރޫޕް އެކެއްގައި 8-1 ގެ ތަފާތުބޮޑު ނަތީޖާއަކުން ކަނޑިތީމު އަތުން ބަލިވެ، މަރޮށި މުބާރަތުން ކަޓައިފި އެވެ.

މުބާރާތުގައި މަރޮށިން ކުޅުނު ފުރަތަމަ މެޗުގައި 3-2 ގެ ނަތީޖާއަކުން ފޯކައިދޫ އަތުން އެޓީމު ބަލިވެފައިވާއިރު، މިއީ ކަނޑިތީމުން މުބާރާތުގައި ކުޅުނު ފުރަތަަމަ މެޗެވެ.

ހުޅުމާލޭ ރެހެންދި އެއް ނަންބަރު ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފުގައި ކަނޑިތީމުން ހަތަރު ލަނޑުގެ ލީޑެއް ނެގިއިރު، މެޗުގެ ދެވަަނަ ހާފުގައި އެޓީމުން ވަނީ އިތުރު ހަތަރު ލަނޑު ކާމިޔާބުކޮށްފައެވެ. އަދި މިހާފުގައި މަރޮށިން ވެސް ވަނީ އެއް ލަނޑު ކާމިޔާބުކޮށްފައެވެ. މިއާއެކު މެޗުގެ ކުޅުން ނިމިގެންދިޔައީ 8-1 ގެ ތަފާތުބޮޑު ނަތީޖާއަކުން ކަނޑިތީމު ކުރީގައި އޮވެގެންނެވެ.

މުޅި މެޗުގައި ވެސް ކަނޑިތީމުގެ ފަރާތުން ތަފާތު މޮޅު ކުޅުމެއް ފެނިގެންދިޔަ އިރު، މިމެޗުގައި އެޓީމުގެ މުހައްމަދު ޝާމް އަދި ރައުލް ނިޔާޒު މިއިން ކޮންމެ ކުޅުންތެރިއެއް ވަނީ ދެލަނޑު ކާމިޔާބުކޮށްފައެވެ. މީގެއިތުރުން އެޓީމުގެ އިބްރާހިމް ނަދާދު، އިސްމާއިލް ނިހާން އަދި އަހުމަދު ޒަމީން މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. އަދި އެޓީމުގެ އަނެއް ލަނޑަކީ މަރޮށީގެ އިސްމާއިލް ނަސީރު އަތުން ބައިކޮޅަށް ވަން ލަނޑެކެވެ.

މިމެޗުގައި މަރޮށިން ކާމިޔާބުކުރި ހަމައެކަނި ލަނޑު ދެވަނަ ހާފުގައިި އެޓީމަށް ކާމިޔާބުކޮށްދިނީ ޝައިބާން އުސްމާން އެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ކަނޑިތީމުގެ ރައުލް ނިޔާޒު އެވެ.

މި ނަތީޖާއެކު ބާކީ އެއް މެޗު އޮއްވައި ކަނޑިތީމުގެ އިތުރުން ފޯކައިދޫ އަށް ވެސް ވަނީ ސެމީ ފައިނަލުގެ ޖާގައެއް ކަށަވަރުވެފައެވެ. ނަމަވެސް މިގުރޫޕްގެ އެއްވަނަ ލިބިގެންދާނީ ގުރޫޕްގެ ފަހުމެޗުގައި ފޯކައިދޫ އާއި ކަނޑިތީމް ވާދަކުރާ މެޗުން މޮޅުވާ ޓީމަކަށެވެ.

މިއަހަރުގެ މުބާރާތުގައި ޖުމްލަ 129 ޓީމު ބައިވެރިވެފައިވާއިރު، މުބާރާތުގައި 320 މެޗު ކުޅުމަށް ވަނީ ހަމަޖެހިފައެވެ. އަދި މިއަހަރުގެ މުބާރާތުގައި ށ. އަތޮޅުން 6 ޓީމު ބައިވެރިވެފައިވާއިރު، މިއަތޮޅުގެ އަތޮޅުބުރު ކުރިއަށް ގެންދިއުމަށް ހަމަޖެހިފައިވަނީ 2 ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން އެންމެ ރަގަޅު ނަތީޖާއެއް ހޯދާ ދެޓީމު ސެމީއަށް ހޮވޭއިރު، ފައިނަލުގައި ވާދަކުރާ ދެޓީމަށް މުބާރާތުގެ ޒޯނު ބުރުން ފުރުސަތު ލިބިގެންދާނެ އެވެ.