މަކުނުދޫން މި ފަހަރުވެސް ތަފާތު, ދައްކައިދިނީ ޣައްޒާގެ ހާލަތު

ފަލަސްތީނުގެ މައްސަލާ ގައި މުޅި ދުނިޔޭގައި ވެސް އެންމެ ގަދަ އަޑަކީ ދިވެހީންގެ އަޑެވެ. ފަލަސްތީނުގެ މިނިވަން ކަމަށް އެންމެ ބޮޑަށް ވަކާލާތު ކުރާ އެއް ގައުމަކީ ރާއްޖެ އެވެ. އިޒްރޭލްގެ ހައްދުފަހަނައަޅާފައިވާ ސިފައިން ޣައްޒާގައި މިހާރު ހިނގަމުންދާ ނަސްލު ނައްތާލުމުގެ ޖަރީމާއާ ދެކޮޅަށް ވެސް ދިވެހީން ދަނީ އަޑުއުފުލަމުންނެވެ.

ތަފާތު އެކި ހަރަކާތްތައް ދަނީ ބާއްވަމުންނެވެ. ހުކުރު ދުވަހު ހަވީރު މާލޭގައި ސައިކަލު ބުރެއް އޮތެވެ. އަތޮޅުތެރޭގެ އެކި ރަށްރަށުގައި ވެސް ދަނީ އެކި ހަރަކާތްތައް ބާއްވަމުންނެވެ. ފަލަސްތީނުގެ ހާލަތާއި އެ ބިމުގެ ހަގީގީ ވަޒަންވެރީންގެ ވާހަކަތައް ހިއްސާ ކުރުމަށް ފޯރަމްތަކާއި ދަރުސްތައް ދަނީ ބާއްވަމުންނެވެ.

އެ ހުރިހާ ހަރަކާތްތަކެއްގެ ތެރެއިން އިއްޔެ ހދ. މަކުނުދޫގައި ބޭއްވި ހަރަކާތް ވަނީ އިތުރަށް ފާހަގަ ވެފަ އެވެ. އެއީ އެ ހަރަކާތް ތަފާތުވީމަ އެވެ.

މަކުނުދޫ ގައި ބާއްވާ މިފަދަ ކޮންމެ ހަރަކާތަކީ ވެސް ތަފާތު ހަރަކާތެކެވެ. މުނާސަބަތަކާއި ގުޅިގެން ހަރަކާތެއް ބޭއްވި ނަމަވެސް މުޅި ރާއްޖޭގެ ސަމާލުކަން ހޯދަ އެވެ. މަކުނުދޫގައި އޮންނަ ކޮންމެ ހަރަކާތެއް ވެސް އެހާމެ ތަފާތީ އެވެ.

އިއްޔެ އެ ރަަށުގެ ބަނދަރު މަތީ އޮތް ހަރަކާތަކީ ކައުންސިލާއި ޖަމިއްޔާތަކާއި އާންމުންގެ ބޮޑު އެހީތެރިކަމަކާއެކު ބޭއްވި ހަރަކާތެކެވެ. މި ހަރަކާތަށް މުޅި ސަރަހައްދު ތައްޔާރު ކޮށްފައި ވަނީ ޣައްޒާގެ މިހާރުގެ ހާލަތު ސިފަވާ ގޮތަށެވެ.

ޣައްޒާގެ ހާލަތު ސިފަކޮށްދޭން އެ ރަށުގެ ކުރެހުންތެރީންނާއި ހުނަރުވެރީން ކޮށްފައިވަނީ ތައުރީފު ހައްގު މަސައްކަތެކެވެ. ބާރުގަދަ ގޮވުންތަކުގައި ހަލާކުވެފައިވާ ޣައްޒާގެ އިމާރާތްތައް ސިފަވާ ގޮތަށް އިމާރާތެއް ހަދާފައިވެ އެވެ. އެ ތަނުގައި ތިބި ކުދީން ތިބީ ލެއިން ތަތްތެޅިފަ އެވެ. ގާކުޑިތަކުގެ ތެރޭގައި އެ ކުދީން ތިބީ ގާކުޑީގެ ހިރަފުހުން އެ ކުދީންގެ ސިފަ ވަކިނުވާ ވަރުގަ އެވެ.

އެ ސަރަހައްދު ތައްޔާރު ކޮށްފައި އޮތީ ޣައްޒާގެ ޗާޓް ފެންނަ ގޮތަށެވެ. ނަމަވެސް މުޅި ފަލަސްތީނު މިހާރު ބަދަލުވެފައި ވަނީ ގަބުރުސްތާނަކަށް ކަމަށް ސިފަވާ ގޮތް ދައްކާފައިވެ އެވެ.

ޗާޓްގެ ގޮތުގައި ކަނޑައަޅާފައިވާ ސަރަހައްދު ގައި އެތައް ބަޔަކު ވަޅުލާފައިވާތަން ފެންނަ ގޮތަށް ހަދާފައިވެ އެވެ.

މި ހަރަކާތް ކުރިއަށް ގެންދިޔައީ ވެސް "'ދެން ނުފެނިދާނެ" މި ނަމުގަ އެވެ.

އިއްޔެ އޮތް ހަރަކާތް އިތުރަށް ފުރިހަމަ ކުރުމުގެ ގޮތުން މުޅި ހަރަކާތް ރާވާ އިންތިޒާމުކޮށްފައި ވަނީ ވެސް ތަފާތު ގޮތަކަށެވެ. ފަލަސްތީން ބިމުގެ ތާރީހު ކިޔައި ދިނެވެ. އިޒްރޭލަށް ނުސީދާކޮށް ނަމަވެސް މަދަދުދެވޭ ހުރިހާ ގޮތެއް ބުނެދިނެ އެވެ. އެ މީހުންގެ އުފެއްދުންތަކުގެ މައުލޫމާތު ދިނެވެ.

މަކުނުދޫން ވެސް ލިބެން ހުންނަ އިޒްރޭލްގެ ކުންފުނިތަކާއި ގުޅުންހުރި އުފެއްދުންތައް ދައްކާލި އެވެ. އަދި ކުދީންނާއި އެ ތަނަަށް އެއްވި މީހުންގެ ކިބައިން އެފަދަ އުފެއްދުންތައް ބޮއިކޮޓް ކުރަން އެއްބަސް ކުުރުވި އެވެ.

އިއްޔެގެ ހަރަކާތަށް ފަހު މަކުނުދޫ ޒުވާނުން ވަނީ ޣައްޒާއަށް އެހީތެރިވުމަށް މަސްވެރިކަމަށް ނިކުމެފަ އެވެ. ރޭގަނޑުގެ ފަރުމަސްވެރިކަމާއި އިއްސާއި ހުއިފިލަނޑާ ނެގުން ކުރިއަށް ގެންދިޔަ އެވެ.

ބޭނުމަކީ ޣައްޒާއަށް އެހީވުމަށް ފައިސާ ހޯދުމަށެވެ. އެ ހަރަކާތުގަައި އެ ރަށުގެ ގިނަ އަދަދެއްގެ ޒުވާނުން ބައިވެރިވި އެވެ.

މި ހުރިހާ ސަބަބުތަކާއެކު އިއްޔެ މަކުނުދޫގައި އޮތް "'ދެން ނުފެނިދާނެ" ހަރަކާތަކީ ޣައްޒާގެ ދިފާއުގައި ރާއްޖޭގައި ބޭއްވި އެންމެ ތަފާތު ހަރަކާތަށް ވަނީ ވެފަ އެވެ. މިއީ މަކުނުދޫ އިން އަބަދުވެސް ދައްކާ ނަމޫނާއަށް އިތުރުވީ ބޮޅެކެވެ.

އަދި މިއީ ރާއްޖޭގެ އެކި ކަންކޮޅުތަކުގައި ޣައްޒާގެ ދިފާއުގައި ބާއްވަމުންދާ ހަރަކާތްތައް އިތުރަށް ފުޅާާކޮށް ހިތްވަރާއެކު ކުރިއަށް ގެންދިއުމަށް ލިބުނު އިތުރު ބާރެކެވެ.