އިސްރާއީލުން ފޮނުވާލި މިސައިލެއް، އީރާންގެ އަންހެންކުދިންގެ ސްކޫލަކަށް އަމާޒުވެއްޖެ

އިސްރާއީލާ އެމެރިކާއިން އީރާނަށް ހަމަލާ ދިނުމަށް ފޮނުވާލި މިސައިލެއް ތެހެރާނުގައި ހުންނަ އަންހެންކުދިންނަށް ހާއްސަ ސްކޫލަކަށް އަމާޒުވެފައިވާކަމަށް އަލް ޖަޒީރާއިން ބުނެފިއެވެ.

އަލްޖަޒީރާއިން ބުނެފައިވަނީ އަންހެންކުދިންގެ ސްކޫލަށް ދިން ވައިގެ ހަމަލާގައި ފަސް ދަރިވަރަކު ޝަހީދުވެފައިވާކަމަށެވެ. މިކަން އީރާނުގެ ސަރުކާރުގެ ރަސްމީ މީޑިއާ އިރްނާއިން ވަނީ ޔަގީންކޮށްދީފައެވެ. މީގެ އިތުރުން ގިނަ ހަމަލާތައް އަމާޒުވެފައިވަނީ އާންމުން ދިރިއުޅޭ ތަންތަނަށްކަމަށްވެސް އަލްޖަޒީރާއިން ވަނީ ރިޕޯޓްކޮށްފައެވެ.

އެމެރިކާ އަދި އިސްރާއީލް އިސްވެ އޮވެ، ދިން ހަމަލާތަކުގައި ލިބުނު ގެއްލުންތަކުގައި މިހާތަނަށް ފުރާނަ ގެއްލުނު މީހުންގެ އަދަދެއް އަދި ސާފެއް ނުވެއެވެ.

އެމެރިކާ އަދި އިސްރާއީލުން ބުނާ ގޮތުގައި ތެހެރާނަށް ދިން ވައިގެ ހަމަލާތައް އަމާޒުކޮށްފައިވަނީ އަސްކަރީ މަރުކަޒުތަކުގެ އިތުރުން އީރާނުގެ ލީޑަރުން ދިރިއުޅުއްވާ ތަންތަނަށެވެ. އީރާނުން ދިން މި ހަމަލާތަކާ ގުޅިގެން އެމެރިކާގެ ރައީސް ޑޮނާލްޑް ޓްރަމްޕް މީގެ ކުޑައިރުކޮޅެއް ކުރިން ދިން ސްޓޭޓްމަންޓެއްގައި ވަނީ، އީރާނަށް ހަމަލާދޭން ފަށާފައިވާކަމަށް ވިދާޅުވެފައެވެ.

މި ސްޓޭޓްމަންޓުގައި އީރާނަށް ހަމަލާދިނުމުގެ ހުއްޖަތަކަށް ދައްކަވާފައިވަނީ، މާ ކުރީޒަމާނުގައި ހިނގާފައިވާ ހަނގުރާމައިގެ ހާދިސާތަކެވެ. މީގެ އިތުރުން 2023 ވަަ އަހަރުގެ އޮކްޓޯބަރުމަހުގެ 7 ވަނަ ދުވަހު އިސްރާއީލަށް ދިން ހަމަލާއަކީވެސް އެއް ސަބަބު ކަމަށް ޓްރަމްޕް ވިދާޅުވިއެވެ. ޓްރަމްޕް އެހެން ވިދާޅުވިއިރު، އެމެރިކާ އަދި އިސްރާއީލްގެ ބޮޑުވަޒީރު ކުރިން ބުނެފައިވަނީ އެ ހަމަލާ ދީފައިވަނީ ހަމާސް ކަމަށެވެ. އަދި އެކަމުގެ ބަދަލެއްގެ ގޮތުން އިސްރާއީލުން ވަނީ ޣައްޒާއަށް ވައިގެ މަގުން ހަމަލާދީ މުޅި ޣައްޒާ ސުންނާފަތިކޮށް އެތައް ހާސްބަޔަކު ޝަހީދުކޮށްލާފައެވެ.