ބާޒާރުގެ އަގުތައް އެނގޭނެ އަގުމަގު ޕޯޓަލް: އާންމުންނަށް ބޮޑު ފަސޭހައެއް
މިއަހަރުގެ ރޯދަ މަހު ބާޒާރުގައި ތަކެތީގެ އަގު ފަސޭހައިން ބަލާލެވޭނެ ގޮތް ހެދުމަށް އިކޮނޮމިކް މިނިސްޓްރީން ފަރުމާކުރި "އަގުމަގު" ޕޯޓަލުން އާންމުންނަށް ބޮޑު ފަސޭހައެއް ލިބިދީފި އެވެ.
ރަމަޟާން މަހުގެ ފުރަތަމަ ދުވަހު އެ ޕޯޓަލް އިފްތިތާހު ކޮށްދެއްވީ އިކޮނޮމިކް މިނިސްޓަރު މުހައްމަދު ސައީދެވެ. އެ ޕޯޓަލް އިފްތިތާހު ކުރައްވާ ވާހަކަ ދައްކަވަމުން މިނިސްޓަރު ސައީދު ވިދާޅުވީ މިފަދަ ޕޯޓަލެއްގެ ބޭނުމަކީ ރައްޔިތުންނަށް ފަސޭހަކޮށް ދިނުން ކަމަށެވެ. ރޯދަ މަހަކީ ގިނަ އަދަދަކަށް ކާބޯތަކެތި ގަންނަ ދުވަސްވަރެއްކަން ފާހަގަކޮށް މިނިސްޓަރު ވިދާޅުވީ އެންމެ ހެޔޮ އަގުގައި ކާބޯތަކެތި ލިބެން ހުންނަ ތަންތަން އެނގުމަކީ ރައްޔިތުންނަށް ލިބޭނެ ބޮޑު ފަސޭހައެއް ކަމަށެވެ.
"މި އެޕްލިކޭޝަންއިން ލިބޭނެ ފައިދާތަކުގެ ތެރޭގައި ވިޔަފަރިވެރިންނަށް އަޅުގަނޑުމެން ދޫކޮށްލާނަން އެ ބޭފުޅުން އަމިއްލަ އަށް އެޕްލިކޭޝަންގައި އަގު ޕޯސްޓްކުރަން ފުރުސަތު. ދެން އޮތް މަރުހަލާއަކީ އެއީ،" މިނިސްޓަރު ވިދާޅުވި އެވެ.
މި އެޕްލިކޭޝަންގެ ބޭނުމަކީ އަސާސީ ކާބޯތަކެތި ރައްޔިތުންނަށް އަގުހެޔޮކޮށް ގަނެވޭނެ މަގު ފަހިކޮށް ދިނުމެވެ. ހާއްސަކޮށް އަސާސީ ކާބޯތަކެތީގެ ހެޔޮ އަގުތައް އެއް ތަނަކުން ފެންނާނެ ގޮތް މެދުވެރިވާނެ އެވެ. މި ޕޯޓަލުން އަގުތައް ފެންނަން ހުންނާނީ އިކޮނޮމިކް މިނިސްޓްރީ އާއި ވުޒާރާގެ އިންސްޕެކްޝަން ޓީމްތަކުން ކޮންމެ ހަފްތާއަކު ފިހާރަތަކަށާއި ބާޒާރުތަކަށްގޮސް އެއްކުރާ މައުލޫމާތުގެ މައްޗަށް ކަމަށް އެ މިނިސްޓްރީން ބުންޏެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
