އެމެރިކާއިން ޣައްޒާގައި ހެދި ވަގުތީ ބަނދަރު މެދުވެރިކޮށް އެހީގެ ތަކެތި ފޯރުކޮށްދޭން ފަށައިފި

ކަނޑުމަގުން ފަލަސްތީނުގެ ޣައްޒާ އަށް އިންސާނީ އެހީ ފޯރުކޮށްދިނުމަށްޓަކައި އެމެރިކާއިން ޣައްޒާގައި ހެދި ވަގުތީ ބަނދަރު މެދުވެރިކޮށް ޣައްޒާ އަށް އެހީގެ ތަކެތި އެތެރެކުރަން ފަށައިފިއެވެ.

ފެނުމަތީގައި އޮންނަ ގޮތަށް ހެދި މި ބަނދަރު އިސްރާއީލުގެ އަޝްދޮދު ގައި ރޭވުމަށްފަހު ޣައްޒާ އަށް ގެނެސްފައިވަނީ މިދިޔަ ހަފްތާގެ ބުރާސްފަތި ދުވަހުއެވެ.

މިކަމާއި ގުޅިގެން އެމެރިކާގެ އަސްކަރިއްޔާއިން ބުނީ ބަނދަރު ބޭނުންކުރަން ފެށިނަމަވެސް ބަނދަރުގެ އިންފްރާސްޓްރަކްޗަރ އަދިވެސް ފުރިހަމަނުވާ ކަމަށާއި، މި ބަނދަރުގެ ސަބަބުން ގައުމު ތަކުންނާއި އިންސާނީ އެހީތެރިކަމުގެ ޖަމިއްޔާތަކުން ޣައްޒާގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް ފަސޭހަ ވެގެންދާނެ ކަމަށެވެ.

މި ބަނދަރު މެދުވެރިކޮށް ޣައްޒާ އަށް ފޯރުކޮށްދޭ އެހީ އަންނަނީ ސައިޕްރަސް އިން ކަނޑުގެ މަގުން ކަމަށްވާއިރު، އެ ބަނދަރު މެދުވެރިކޮށް އެތެރެކުރި ފުރަތަމަ އެހީގެ ތަކެތި އިއްޔެ ލިބިފައިވާކަމަށް ވެސް އެމެރިކާގެ އަސްކަރިއްޔާ އިން މައުލޫމާތުދެއެވެ.

އެމެރިކާއިން ހެދި މި ބަނދަރު މެދުވެރިކޮށް ޣައްޒާ އަށް އެހީ އެތެރެކުރަމުން ދިޔަ ނަމަވެސް އެއްގަމު މަގުން އެހީ އެތެރެކުރުމަކީ މުހިންމު ކަމެއް ކަމަށާއި އެއްގަމާއި ޚިލާފަށް ކަނޑުމަގުން އެހީ ވެއްދުމުގައި ބޮޑެތި ގޮންޖެހުންތަކެއް ހުންނާނެ ކަމަށް އެމެރިކާގެ އެއިޑް ޗީފް ވަނީ ބުނެފައެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ހުއްޓުމެއްނެތި ޔަހޫދީން ޣައްޒާ އަށް ދެމުން އަންނަ ހަމަލާތަކާއި އަޅަމުންދާ ދަތިކުރުމުގެ ފިޔަވަޅު ތަކުގެ ސަބަބުން ޣައްޒާގެ ރައްޔިތުން ވަނީ ފެނާއި ކާބޯތަކެއްޗާއި ރަނގަޅު ސިއްހީ ފަރުވާ ފަދަ އެތައް އިންސާނީ ބޭނުންތަކުން މަހުރޫމް ވެފައެވެ.

ޣައްޒާގެ ރައްޔިތުންނަށް ބޭނުންވާ އެހީތެރިކަން ފޯރުކޮށްދިނުމަށް ދުވާލަކު 500 ޓްރަކް ޣައްޒާ އަށް ވަންނަން ޖެހޭ ކަމަށް އދ އިން ބުނެފައިވާއިރު، ގަތުލުއާއްމު ފެށުނީއްސުރެ ވެސް އެންމެ ދުވަހެއްގެ ތެރޭގައި އެންމެ ގިނަ އަދަދަކަށް ޣައްޒާ އަށް ވަދެފައިވަނީ 189 ޓްރަކެވެ.

ޣައްޒާގެ އާއްމުންނަށް ބޭނުންވާ އެހީތެރިކަން ފޯރުކޮށްދެވޭނެ ފަދައިން ބޯޑަރުތައް ހުޅުވާލުމަށް މުޅި ދުނިޔެއިން ގޮވާލަމުން ދަނިކޮށް ޔަހޫދީ ފައުޖުން ވަނީ ރަފާހަށް އަރައިގަނެ އެ ސަރަހައްދުގައިވާ، ޣައްޒާ އަށް އެހީ ވެއްދުމަށް ބޭނުންކުރާ މައި ބޯޑަރެއްގެ ކޮންޓްރޯލް ވެސް ނަގާފައެވެ.