އެމެރިކާގެ ފައުޖުތައް އަނެއްކާވެސް މެދުއިރުމައްޗަށް

އިސްރާއީލުން ލުބުނާނަށް ހަމަލާތައް ހަރުކަށިކުރުމާއެކު އެމެރިކާއިން އިތުރު ސިފައިން މެދުއިރުމައްޗަށް ފޮނުވަން ނިންމާފައިވާކަން ޕެންޓަގަނުން ބުނެފިއެވެ.

އެމެރިކާގެ ދިފާއީ ވުޒާރާ، ޕެންޓަގަނުން ބުނި ގޮތުން އިޒުރޭލަށް އެއްބާރުުން ދިނުމުގައި އެމެރިކާ އުމުރަށް ދެމިއޮންނާނެ އެވެ.

މިހާރުވެސް މެދުއިރުމަތީގައި އެމެރިކާގެ 40،000 އަށްވުރެ ގިނަ ސިފައިން ތިބިއިރު، އިތުރަށް ފޮނުވާ ސިފައިންގެ އަދަދު ޕެންޓަގަނުން ހާމަކޮށްފައެއް ނުވެއެވެ. ޕެންޓަގަނުގެ ތަރުޖަމާނު މޭޖަރ ޖެނެރަލް ޕެޓްރިކް ރައިޑަރ ބުނި ގޮތުގައި، މެދުއިރުމަތީގެ ހަލަބޮލިކަން އިތުރުވެފައިވާތީ، މިހާރު އެ ސަރަހައްދުގައި ތިބި އެމެރިކާގެ ބާރުތަކަށް އިތުރު ބާރު ލިބިދިނުމަށްޓަކައި މަދު އަދަދެއްގެ އިތުރު ސިފައިން ފޮނުވަނީކަމަށްށެވެ.

ލުބްނާނަށް ދޭ ހަމަލާތަކުގައި 490 އަށް ވުރެ ގިނަ މީހުން މިހާރު ވެސް ވަނީ މަރުވެފަ އެވެ. މީގެ ތެރޭގައި ކުޑަކުދިންނާއި އަންހެނުން ވެސް ހިމެނެ އެވެ.

ލުބްނާންގެ ބޮޑުވަޒީރު ނަޖީމު މީގާތީ ވިދާޅުވި ގޮތުގައި އިޒުރޭލުގެ ވިސްނުމަކީ ޣައްޒާއަށް ހެދި ގޮތް ލުބްނާނަށް ހަދައި، މުޅި ތަން ފަޅުކޮށްލުންކަމަށާއި މިއީ ބައިނަލްއަގްވާމީ އިދާރާތަކުން ހުއްޓުވައި މަނާކުރަން ޖެހޭ ކަމެއް ކަމަށްވެސް އޭނާ ވިދާޅުވި އެވެ.

އިޒުރޭލުގެ އަސްކަރިއްޔާގެ ތަރުޖަމާން ދަނިއަލް ހަގާރީ ބުނީ އިޒުރޭލު ބޯޑަރުން ފެށިގެން 80 ކިލޯ މީޓަރު ރައްކާތެރި ނުވާނެ ކަމަށެވެ. އަދު އާންމު ރައްޔިތުންނަށް ގެއްލުމެން ސަލާމަތް ވާނީ ރައްކާތެރި ތަނަކަށް ދިއުމުން ކަމަށް އޭނާ ވަނީ ބުނެފަ އެވެ.

ހިޒްބުﷲއިން ވެސް އިސްރާއީލުގެ ގިނަ އަސްކަރީ ތަންތަނަށް ރޮކެޓް ހަމަލާ ދަނީ ދެމުންނެވެ. މީގެ ތެރޭގައި ހައިފާގެ އުތުރުގައި ހުންނަ ރަފައެލް އިލެކްޓްރޯނިކްސް ކުންފުނި ހިމެނެއެވެ. މިއީ ހިޒްބުﷲއިން ހައިފާގެ އަސްކަރީ ތަންތަނަށް ހަމަލާދިން ދެވަނަ ފަހަރެވެ.

މީގެ ތެރެއިން ގިނަ މިސައިލްތައް އިޒުރޭލުގެ އަޔަން ޑޯމުން ވައްޓާލި ނަމަވެސް ބައެއް މިސައިލްތައް އިޒުރޭލުގެ އަވަށްތަކަށް ވެއްޓި ވަނީ ގެއްލުންތަކެއް ލިބިފަ އެވެ.