އީރާނުގެ ކަރަންޓު އުފައްދާ މަރުކަޒުތަކާއި ބަރިޖުތަކަށް އަންނަ ހަފުތާގައި ހަމަލާދޭނަން: ޓްރަމްޕް

އެމެރިކާއާއެކު މަޝްވަރާގެ މޭޒަށް އީރާނުން ނައިސްފިނަމަ، އަންނަ ހަފުތާއިން ފެށިގެން އެ ގައުމުގެ ކަރަންޓު އުފައްދާ މަރުކަޒުތަކާއި ފާލަންތަކަށް އަމާޒުކޮށް ވަރުގަދަ ހަމަލާތަކެއް ދޭނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދީފިއެވެ.

ފޮކްސް ނިއުސްއަށް ދިން ބަސްދީގަތުމެއްގައި ޓްރަމްޕް ބުނީ، އީރާނަށް މިހާރު ދެމުންދާ ހަމަލާތައް ކުރިއަށް އޮތް ދުވަސްތަކުގައި އިތުރަށް ވަރުގަދަ ކުރާނެ ކަމަށެވެ.

"އަހަރެމެން އެމީހުންނަށް ވަރަށް ވަރުގަދަ ހަމަލާތަކެއް ދެމުން މިދަނީ. އައްސޭރިފަށުގައި ހުރި ހުރިހާ ތަނަކަށް މިދަނީ ހަމަލާދެމުން. އަދި އަހަރެން ފުދިއްޖެއޭ ބުނަންދެން މި ހަމަލާތައް ކުރިއަށްދާނެ،" ޓްރަމްޕް ބުންޏެވެ.

ހަކަތައާ ގުޅޭ މަރުކަޒުތަކަށް ހަމަލާދިނުމާ ގުޅޭގޮތުން ކުރި ސުވާލަކަށް ޖަވާބު ދެމުން ޓްރަމްޕް ބުނީ، ހަކަތައިގެ މަރުކަޒުތަކަށް ހަމަލާދިނުން ބާއްވާނީ އެންމެ ފަހަށް ކަމަށާއި، ނަމަވެސް އެންމެ ފަހުން އެ ތަންތަނަށްވެސް ހަމަލާދޭނެ ކަމަށެވެ.

"މިރެއާއި މާދަމާ ރޭވެސް އަދި އޭގެ އަނެއް ރޭވެސް ވަރުގަދަ ހަމަލާތަކެއް ދޭނަން. ނަމަވެސް އަންނަ ހަފުތާ ވެގެންދާނީ އެމީހުންނަށް ވަރަށް ނުރައްކާތެރި ހަފުތާއަކަށް. އެއީ އަންނަ ހަފުތާގައި އަހަރެމެން އެ ގައުމުގެ ކަރަންޓު އުފައްދާ މަރުކަޒުތަކާއި ބްރިޖުތަކާއި ހަލާކުކޮށްލާނެތީ. އެމީހުން މަޝްވަރާގެ މޭޒަށް ނައިސްފިނަމަ ހުރިހާ ކަރަންޓު މަރުކަޒުތަކަކާއި ބްރިޖުތައް ގޮއްވާލާނަން،" ޓްރަމްޕް އިތުރަށް ބުންޏެވެ.

މީގެ އިތުރުން، ހޯރްމުޒް ކަނޑުއޮޅިން ދަތުރުކުރާ މުދާ އުފުލާ ބޯޓުފަހަރުން 20 އިންސައްތައިގެ ފީއެއް ނެގުމަށް ކުރިން ގެންގުޅުއްވި ޚިޔާލު ޓްރަމްޕް ވަނީ ދޫކޮށްލާފައެވެ. އޭގެ ބަދަލުގައި ގަލްފުގެ ގައުމުތަކާއެކު ވިޔަފާރިއާއި އިންވެސްޓްމަންޓްގެ އެއްބަސްވުންތައް އެކުލަވާލުމަށް ވަނީ ނިންމާފައެވެ.

ޓްރަމްޕްގެ 'ޓްރޫތު ސޯޝަލް' ގައި ބުނީ، މިއީ މެދުއިރުމަތީގެ ލީޑަރުންނާއެކު ކުރެވުނު ވަރަށް ކާމިޔާބު މަޝްވަރާތަކަކަށްފަހު ނިންމި ނިންމުމެއް ކަމަށެވެ. އަދި މި އިންވެސްޓްމަންޓްތަކަކީ އެމެރިކާއަށާއި އެ ގައުމުތަކުގެ މުސްތަގުބަލަށްވެސް ވަރަށް ފައިދާހުރި ބޮޑެތި އިންވެސްޓްމަންޓްތަކަކަށް ވާނެ ކަމަށެވެ.

ޓްރަމްޕް ގަބޫލުކުރާ ގޮތުގައި އީރާނަށް މިހާރު އޮތް ހަމައެކަނި ގޮތަކީ އެމެރިކާއާއެކު އެއްބަސްވުމަކަށް އައުމެވެ. އަދި މި ބަސްދީގަތުމުގެ އެއް ގަޑިއިރު ކުރިންވެސް އެމެރިކާގެ މަންދޫބުން އީރާނުގެ އޮފިޝަލުންނާ މުއާމަލާތް ކޮށްފައިވާ ކަމަށް އޭނާ ބުންޏެވެ.

"އެމީހުން ބޭނުންވަނީ އެއްބަސްވުމަކަށް އަންނަން. އަވަހަށް އެއްބަސްވުމަކަށް އައުން ބުއްދިވެރިވާނެ، އެހެންނޫނީ ސަލާމަތްވާނެ އެކަކުވެސް ނުހުންނާނެ،" ޓްރަމްޕް ބުންޏެވެ.