ވެނެޒުއޭލާގެ 50 މިލިއަން ފީފާ ތެޔޮ އެމެރިކާއާ ހަވާލުކުރަން ޓްރަމްޕް އަންގައިފި

އެމެރިކާގެ ދަތިކުރުމުގެ ފިޔަވަޅުތަކުގެ ދަށުގައި އޮތް ވެނެޒުއޭލާގެ 30 އާއި 50 މިލިއަނާ ދެމެދުގެ އަދަދެއްގެ ތެޔޮ ފީފާ އެމެރިކާއާ ހަވާލުކުރަން ނިންމާފައިވާކަން އެމެރިކާގެ ރައީސް ޑޮނަލްޑް ޓްރަމްޕް އިޢުލާން ކޮށްފިއެވެ.

ރައީސް ޓްރަމްޕްގެ ސޯޝަލް މީޑިއާ ޕްލެޓްފޯމް 'ޓްރޫތް ސޯޝަލް' ގައި އޭނާ ބުނެފައިވާގޮތުން، ވެނެޒުއޭލާގެ އެކްސްޕޯޓަށް އެމެރިކާއިން އަޅާފައިވާ ހުރަސްތަކުގެ ސަބަބުން ގުދަންކޮށްފައި ހުރި މި ތެޔޮތައް ވިއްކާނީ ބާޒާރުގެ އަގުގައި ކަމަށެވެ. އަދި އެއިން ލިބޭ އާމްދަނީ ބޭނުންކުރާނީ ވެނެޒުއޭލާ އާއި އެމެރިކާގެ ”ރައްޔިތުންގެ ލާބައަށްކަން“ ކަށަވަރު ކުރުމަށްޓަކައި، އެ ފައިސާ ކޮންޓްރޯލް ކުރާނީވެސް ސީދާ އޭނާ ކަމަށް ޓްރަމްޕް ބުނެފައިވެއެވެ.

މި މަސައްކަތް ވަގުތުން ފެށުމަށް އެމެރިކާގެ އެނާޖީ ސެކްރެޓަރީ ކްރިސް ރައިޓަށް މިހާރު އަމުރުކޮށްފައިވާ ކަމަށް ޓްރަމްޕް ބުންޏެވެ.

"މި ތެޔޮ ގެންދާނީ ސްޓޯރޭޖް އުޅަނދުފަހަރުގައި، އެމެރިކާގެ ބަނދަރުތަކަށް ސީދާ ބޭލުމަށްޓަކައި،" ޓްރަމްޕް ބުނެފައިވެއެވެ.

ޓްރަމްޕްގެ މި އިޢުލާނަކީ ވެނެޒުއޭލާގެ ތެޔޮ ރިޒާވް "އަތުލައިގަތުމަށާއި" އެ ޤައުމުގެ ހީނަރުވެފައިވާ ހަކަތައިގެ ސިނާޢަތް ”އަލުން އާރާސްތުކުރާނެކަމަށް“ ބުނެ ވެފައިވާ ވަޢުދުގެ ދަށުން ނިންމި ނިންމުމެއް ކަމަށް އޭނާ ބުނެއެވެ. މީގެ އިތުރުން ޓްރަމްޕް ވަނީ ވެނެޒުއޭލާގެ އިންފްރާސްޓްރަކްޗާ މަރާމާތުކުރުމަށް އެމެރިކާގެ ތެޔޮ ކުންފުނިތަކުން ބިލިއަނުން ޑޮލަރު އިންވެސްޓް ކުރާނެ ކަމަށް ބުނެފައެވެ.

މިކަމާ ގުޅޭގޮތުން މަޝްވަރާ ކުރުމަށް އެމެރިކާގެ ބޮޑެތި ތެޔޮ ކުންފުނިތައް ކަމަށްވާ ޗެވްރޮން، އެކްސަން މޮބިލް އަދި ކޮނޯކޯފިލިޕްސްގެ މަންދޫބުން ކުރިއަށް އޮތް ހުކުރު ދުވަހު ރައީސް ޓްރަމްޕާ ބައްދަލުކުރުމަށް ވަނީ ހަމަޖެހިފައިވާ ކަމަށް މީޑިއާ ރިޕޯޓް ބުނެއެވެ.

ހަކަތައިގެ ދާއިރާގެ މާހިރުން ފާހަގަކުރާ ގޮތުގައި 50 މިލިއަން ފީފާ ތެލަކީ ދުނިޔޭގެ ބާޒާރަށް ބަލާއިރު ނިސްބަތުން ކުޑަ މިންވަރެކެވެ. ދުނިޔޭގައި ދުވާލަކު 100 މިލިއަނަށްވުރެ ގިނަ ފީފާ ތެޔޮ ބޭނުންކުރާއިރު، އެމެރިކާއިން އެކަނިވެސް ދުވާލަކު 14 މިލިއަން ފީފާ ތެޔޮ އުފައްދައެވެ.

ޔުނިވަރސިޓީ އޮފް ވޮޝިންގޓަންގެ ތަޖުރިބާކާރެއް ކަމަށްވާ ސްކޮޓް މޮންޓްގޮމެރީ ބުނީ، ތެލުން ލިބޭ އާމްދަނީ ޓްރަމްޕްގެ ސަރުކާރުން ބަހާނެ ގޮތަކާ މެދު ކަންބޮޑުވުން އެބައޮތް ކަމަށެވެ. އަދި ވެނެޒުއޭލާގެ ތެޔޮ އުފެއްދުން ކުރީގެ މިންވަރަށް ގެންދިއުމަށްޓަކައި ގާތްގަނޑަކަށް 110 ބިލިއަން ޑޮލަރުގެ އިންވެސްޓްމަންޓް ބޭނުންވާނެ ކަމަށް އަންދާޒާކުރެވެއެވެ.

ވެނެޒުއޭލާއަކީ ދުނިޔޭގައި އެންމެ ބޮޑު ތެޔޮ ރިޒާވް އޮތް ޤައުމު ކަމަށްވީ ނަމަވެސް، އެމެރިކާގެ ފިޔަވަޅުތަކާއި، ކޮރަޕްޝަނާއި، ބެލެހެއްޓުން ދަށްވުމުގެ ސަބަބުން އެ ޤައުމުގެ ތެޔޮ އުފައްދާ މިންވަރު ވަނީ ވަރަށް ބޮޑަށް ދަށަށް ގޮސްފައެވެ. މިހާރު އެ ޤައުމުން އުފައްދަނީ ދުނިޔޭގެ ބާޒާރަށް ސަޕްލައިކުރާ ތެލުގެ 1 އިންސައްތައަށްވުރެ ކުޑަ މިންވަރެކެވެ.