ވަރުގަދަ ސްކޮޑަކާއެކު އެމްޖީ ފުޓްބޯޅަ ޓީމު, މުބާރާތަށް ނުކުންނަނީ ތަށި ދިފާއުކުރަން

"ކާށިދޫ ކައުންސިލް ފުޓްބޯޅަ ޗެލެންޖު 2025"ގެ ކުޅުން މާދަމާ ފެށުމަށް ހަމަޖެހިފައިވާއިރު، މުބާރާތުގެ އެންމެ ފަހުގެ ޗެންޕިއަން އެމްޖީ ފުޓްބޯޅަ ޓީމު މުބާރާތާއި ކުރިމަތިލަނީ ތަށި ދިފާއުކުރުމަށް ކަމަށް އެ ޓީމުން ބުނެފިއެވެ.

އެމްޖީ ފުޓްބޯޅަ ޓީމުގެ ފަރާތުން އޮފިޝަލަކު ވޮއިސް ސްޕޯޓްސްއަށް މައުލޫމާތު ދިންގޮތުގައި މިއަހަރުގެ މުބާރާތަށް ތައްޔާރުވުމުގެ ގޮތުން ވަރުގަދަ ސްކޮޑެއް އެކުލަވާލުމަށްފަހު ދުރާލައި އެޓީމުން ފަރިތަކުރުންތައް ފަށާފައިވާކަމަށެވެ.

"ޓީމުގެ ތައްޔާރީތަކާއި މެދު ވަރަށް ހިތްހަމަޖެހޭ އަދި މިފަހަރުގެ ސްކޮޑުގައި ހިމެނޭ ކުޅުންތެރިންނާއި މެދު ވަރަށް ބޮޑު ޔަގީންކަމެއް އެބައޮތް".. އޮފިޝަލް ބުންޏެވެ.

އެގޮތުން މިދިޔަ އަހަރު އެޓީމުން ޗެންޕިއަންކަން ހޯދީ ޓީމުގައި ހިމެނުނު މުހިންމު ބައެއް ކުޅުންތެރިންނާއެކު އިތުރު 13 ކުޅުންތެރިޔަކު މުޅިން އަލަށް އެޓީމުގެ ސްކޮޑުގައި ވަނީ ހިމަނާފައެވެ.

އޭގެތެރޭގައި ޖޫނިއާ ޤައުމީ ޓީމަށާއި ފުރަތަމަ ޑިވިޝަނުގެ ކުލަބުތަކަށް ކުޅެ އަދި މިހާރު ވެސް ފުޓްސަލްގެ އިތުރުން ފުޓްބޯޅައިގައި ވެސް ވިދުންގަދަ ދެ ތަރިން ކަމަށްވާ ޝަނާން ރަޝީދުގެ އިތުރުން ޔޫސުފް ޝާއިފް ޓީމުގައި ހިމެނޭއިރު، މިދިޔަ އަހަރުގެ ގޯލްޑަން ފުޓްސަލް ޗެލެންޖް ކާށިދޫއަށް ކާމިޔާބުކޮށްދިން ޓީމުގައި ހިމެނޭ ހަ ކުޅުންތެރިއެއްގެ އިތުރުން ތަޖުރިބާކާރު ކުޅުންތެރިޔާ އިބްރާހިމް ހަލީމް ވެސް މިފަހަރު ފެނިގެންދާނީ އެމްޖީ ފުޓްބޯޅަ ޓީމުންނެވެ.

24 ޖުލައި 2025 އިން 03 އޮގަސްޓް 2025 ގެ ނިޔަލަށް ކުރިއަށް ގެންދިއުމަށް ހަމަޖެހިފައިވާ މިމުބާރާތުގައި މިއަހަރު އަށް ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމެޖެހިފައިވަނީ ބައިވެރިވި އަށް ޓީމު ދެ ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖައެއް ހޯދާ ދެޓީމު ސެމީ ފައިނަލަށް ހޮވޭއިރު، މުބާރާތުގެ ސެމީ ފައިނަލް ދެމެޗު ކުޅުމަށް ހަމަޖެހިފައިވަނީ ޖުލައި 31 އަދި އޮގަސްޓް އެއްވަނަ ދުވަހު އެވެ. އަދި ފައިނަލް މެޗު ކުޅުމަށް ހަމަޖެހިފައިވަނީ އޮގަސްޓް ތިންވަނަ ދުވަހު އެވެ.

މީގެ އިތުރުން މިއަހަރުގެ މުބާރާތުގެ ޗެންޕިއަން ޓީމަށް 40،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ކާށިދޫ ކައުންސިލްގެ ފަރާތުން ވަނީ ކަޑައަޅާފައެވެ.