އިސާމްގެ ހެޓްރިކާއެކު ރާޔާ އަތުން ކޯރާ ކޯރާއަށް ތަފާތުބޮޑު މޮޅެއް

ރާއްޖޭގައި ބާއްވާ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު "އިންފިނިޓީ ޕްރޯ ރާބަދި ޗެލެންޖް 2025" ގުރޫޕް ސީގައި މިރޭ ކުޅުނު ދެވަނަ މެޗުގައި 11-2 ގެ ތަފާތުބޮޑު ނަތީޖާއަކުން ރާޔާ ބަލިކޮށް ކޯރާ ކޯރާ އިން މުބާރާތުގެ ކުއާޓާ ފައިނަލުގެ ޖާގައެއް ކަށަވަރުކޮށްފިއެވެ.

މުބާރާތުގައި އެންމެ ފަހުގެ ޗެންޕިއަން ކޯރާ ކޯރާ ކުޅުނު ފުރަތަމަ މެޗުގައި ފަސޭހަކަމާއެކު 7-1 ގެ ނަތީޖާއަކުން އަލައިލާ ކޮތައިފަރު އަތުން މޮޅުވެފައިވާއިރު، ރާޔާގެ ފުރަތަމަ މެޗުގައި އެޓީމުން ވަނީ 4-1 ގެ ނަތީޖާއަކުން އެމެރަލްޑް ފާރުފުށި ބަލިކޮށްފައެވެ.

މެޗުގެ ފުރަތަމަ ހާފުގައި ކޯރާ ކޯރާގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ހަތް ލަނޑުގެ ބޮޑު ލީޑަކާއެކު 1-8 ގެ ތަފާތުބޮޑު ނަތީޖާއަކުން ކޯރާ ކޯރާ ކުރީގައި އޮވެގެންނެވެ.

މެޗުގެ ދެވަނަ ހާފުގައި ރާޔާ އިން އެޓީމުގެ ކުޅުން ރަނގަޅުކުރި ނަމަވެސް މިހާފުގައި ކޯރާ ކޯރާ އިން އިތުރު ތިން ލަނޑު ކާމިޔާބުކުރިއިރު، ރާޔާއަށް މިހާފުގައި ވެސް ކާމިޔާބުކުރެވުނީ އެންމެ ލަނޑެކެވެ.

އެގޮތުން މިމެޗުގައި ކޯރާ ކޯރާގެ މުހައްމަދު އިސާމް ތިން ލަނޑު ކާމިޔާބުކޮށް ހެޓްރިކް ހެދިއިރު، އެޓީމުގެ ރައުލް ނިޔާޒް އަދި އަހުމަދު ޒަމީމް މިއިން ކޮންމެ ކުޅުންތެރިއަކު ވަނީ މިމެޗުގައި ދެލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ އާދަމް ތައުފީގު، މުހައްމަދު އިސާމް، އަލީ މިޒްޔާން އަދި އަލީ ސަމާލް މިއިން ކޮންމެ ކުޅުންތެރިއަކު ވަނީ މިމެޗުަގއި އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ރާޔާގެ ދެލަނޑަކީ ކޯރާ ކޯރާގެ ރައުލް ނިޔާޒު އަދި އާދަމް ތައުފީގު އަތުން ބައިކޮޅަށް ވަން ދެލަނޑެވެ. އަދި މިމެޗުގެ މޮޅު ކުންތެރިއަކަށް ހޮވުނީ ކޯރާ ކޯރާގެ މުހައްމަދު އިސާމް އެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ދެމެޗުން ވެސް މޮޅުވެ ހަ ޕޮއިންޓާއެކު ގުރޫޕްގެ އެއްވަނައިގައި. އޮތީ ކޯރާ ކޯރާ މޯލްޑިވްސް އެވެ. އަދި މިމެޗުން ބަލިވި ރާޔާ އިން ގުރޫޕް ސްޓޭޖުގައި ކުޅުނު ދެމެޗުން ހޯދި ތިން ޕޮއިންޓާއެކު އެޓީމު މިވަގުތު އޮތީ ގުރޫޕްގެ ދެވަނައިގައެވެ.

25 އެޕްރީލް 2025 އިން 10 މެއި 2025 ގެ ނިޔަލަށް ކުރިއަށް ގެންދާ މިމުބާރާތުގައި، މި އަހަރުގެ ޖުމްލަ 15 ރިސޯޓަކުން ވާދަކުރާއިރު މުބާރާތް ކުރިއަށް ގެންދިއުމަށް ހަމަޖެހިފައި ވަނީ ބައިވެރިވި 15 ޓީމު ހަތަރު ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ކުއާޓާ ފައިނަލަށް ހޮވޭގޮތަށެވެ.

މީގެ އިތުރުން މިއަހަރުގެ މުބާރާތުގެ ޓައިޓަލް ސްޕޮންސާއަކީ އިންފިނިޓީ ޕްރޯއެވެ. އަދި ޑިޖިޓަލް ޕާޓްނަރަކަށް ދިރާގު ހަމަޖައްސާފައިވާއިރު، މީޑިއާ ޕާޓްނަރަކީ ވޮއިސް ސްޕޯޓްސް އެވެ.