”ޤަތުލްޢާއްމު މެދުކަނޑާލުމުގެ އެއްބަސްވުން އޮތީ ”ނާޒުކު ފައްތަރެއްގައި“، އަލުން ފަށާފާނެ“

ހައްދުފަހަނައަޅާފައިވާ އިސްރާއިލުން ޣައްޒާއަށް ދެމުންދިޔަ ހަމަލާ ހުއްޓާލުމަށް އެއްބަސްވެފައިވާ އެއްބަސްވުމުގެ ފުރަތަމަ މަރުހަލާ ނިމުމަކާ ގާތްވެފައިވާ ކަމަށާ، އެއާއެކު އަލުން ޤަތުލްޢާއްމު ފެށުމުގެ ބިރު އޮތްކަމަށް ގަތަރުގެ ބޮޑުވަޒީރު ޝައިޚް މުޙައްމަދު ބިން ޢަބްދުއްރަޙްމާން އާލް ޘާނީ ހޮނިހިރު ދުވަހު ވިދާޅުވެއްޖެއެވެ.

އެގޮތުން އެމަނިކުފާނު ވިދާޅުވީ، ގަތުލްއާއްމު މެދުކަނޑާލުމުގެ އެއްބަސްވުމުގެ ދެވަނަ މަރުހަލާ ފެށުމަށް އަދިވެސް ކުރިއެރުމެއް ލިބިފައިނުވާތީ، މިއީ "ނާޒުކު ދަނޑިވަޅެއް" ކަމަށެވެ.

އަދި އެއްބަސްވުމުގައި ހިމެނޭ އިސްރާއީލުގެ ރަހީނުންގެ ތެރެއިން މިހާރު ހަމާސްޖާޢަތުގެ ބާރުގެ ދަށުގައި މިހާރުވަނީ އެންމެ ރަހީނެއްގެ ހަށިގަނޑު ކަމަށްވެސް އެމަނިކުފާނު ފާހަގަކުރެއްވިއެވެ.

ދޯހާ ފޯރަމްގައި ވާހަކަފުޅު ދައްކަވަމުން ޝައިޚް މުޙައްމަދު އިތުރަށް ވިދާޅުވީ، އެމެރިކާ އިސްކޮށް ބައިނަލްއަޤްވާމީ މެދުވެރިން ދަނީ ދެވަނަ މަރުހަލާއަށް ކުރިއަށް ދެވޭނެ ގޮތެއް ހޯދުމަށް މަސައްކަތް ކުރަމުން ކަމަށެވެ.

"އަޅުގަނޑުމެން މި ކޮށްފައިވަނީ ހަމައެކަނި ޕޯޒްއެއް, މެދުކެނޑުމެއް. މިއީ އަދިވެސް ފުރިހަމަ ހަމަލާ ހުއްޓާލުމެއް ކަމަށް އަޅުގަނޑުމެންނަކަށް ނުބެލެވޭނެ." އެމަނިކުފާނު ވިދާޅުވިއެވެ.

އެއްކޮށް ހަމަލާ ހުއްޓާލުމަކަށް އިސްރާއީލުގެ ސިފައިން މުޅިން ޣައްޒާއިން ފައިބައި، ޣައްޒާގައި ހަމަޖެހުން ގާއިމުވެ، މިނިވަންކަމާއެކު ދަތުރުފަތުރު ކުރުމުގެ ފުރުސަތު ލިބުން ހިމެނޭ ކަމަށް އެމަނިކުފާނު ވިދާޅުވިއެވެ. ނަމަވެސް މި ޝަރުޠުތައް އަދި ފުރިހަމަވެފައިނުވާ ކަމަށް އެމަނިކުފާނު ފާހަގަކުރެއްވިއެވެ.

ދެ އަހަރަށްވުރެ ގިނަ ދުވަހު ހިނގި މި ޤަތުލްއާއްމުގެ އެންމެ ބޮޑެތި ހަމަލާތައް ހުއްޓުމަކަށް އައި ނަމަވެސް، ޣައްޒާގެ ސިއްޙީ އޮފިޝަލުން ބުނާ ގޮތުގައި މިދިޔަ އޮކްޓޯބަރު މަހުން ފެށިގެން އިސްރާއީލުގެ ހަމަލާތަކުގައި 360 އަށްވުރެ ގިނަ ފަލަސްތީނު މީހުން ވަނީ ޝަހީދުވެފައެވެ. އެންމެ ފަހުގެ ހަމަލާގައި، ޣައްޒާ ސިޓީގެ ހުޅަނގު އުތުރުގައި އިސްރާއީލުން ދިން ވައިގެ ހަމަލާއެއްގައި ދެ ފަލަސްތީނު މީހުން ޝަހީދުވި ކަމަށް ޝިފާ ހޮސްޕިޓަލުން ރިޕޯޓުކުރިއެވެ.