ޗައިނާގެ އެންމެ ބޮޑެތި ބްރޭންޑްތަކުގެ ނަމުގައި "އަލީ" ހިމެނެނީ ކީއްވެ؟

އިންޓަނެޓުން ވިޔަފާރިކުރާ ގިނަ ބަޔަކަށް އެންމެ ފަރިތަ ބައެއް ނަންތަކަކީ އަލީބާބާ އަލީއެކްސްޕްރެސް އަލީޕޭ ފަދަ ނަންތަކެވެ. މި ހުރިހާ ނަމެއްގައިވެސް "އަލީ" ހިމެނޭކަން ފާހަގަވެފައިވާނެއެވެ. މިއީ ހަމަ އިއްތިފާގެއް ނޫނެވެ. މި ހުރިހާ ބްރޭންޑެއްގެ ފެށުމަކީވެސް އެއް ވާހަކައެކެވެ.

1999 ވަނަ އަހަރު ޖެކް މާ (މާ ޔޫން) އެނާގެ 17 ރައްޓެހިންނާ އެކު ޗައިނާގެ ހެންޒޯގައި ހުރި އެޕާޓްމެންޓެއްގައި އަލީބާބާ ޑޮޓް ކޮމް އުފެއްދެވީ ވިޔަފާރިތައް ގުޅުވައިދޭ ޕްލެޓްފޯމެއްގެ ގޮތުގައެވެ.

މި ނަން ނެގީ ޢަރަބި ފޯކްލޯ ވާހަކަ "ދަ ތައުސެންޑް އެންޑް ވަން ނައިޓްސް" ގައި ހިމެނޭ ޢަލީ ބާބާ ކެރެކްޓަރުންނެވެ. އެ ވާހަކައިގައި ޢަލީ ބާބާ އަކީ ފަޤީރު ދަރު ކެނޑުންތެރިއެއް ކަމަށާއި ވަގުންގެ ހޮހޮޅައެއްގެ ސިއްރު ހޯދައި "އޯޕަން ސެސަމީ" މި ޢިބާރާތުން އެ ހޮހޮޅައަށް ވަންނަ ވާހަކައެވެ.

ޖެކް މާ ސެން ފްރެންސިސްކޯގެ ކެފީ ޝޮޕެއްގައި އިންނެވި ދުވަހެއްގައި ވެއިޓްރެސް ކައިރީ "އަލީ ބާބާ" އެނގޭތޯ އެއްސެވީމާ އޭނާ ވަގުތުން ޖަވާބުދިނީ "އޯޕަން ސެސަމީ" މިހެންނެވެ. ދެން ޖެކް މާ މަގުމައްޗަށް ނުކުމެ އިންޑިއާ ޖަރުމަނު ޓޯކިޔޯ އަދި ޗައިނާގެ މީހުން ކައިރީ އެ ނަމާ ބެހޭ ގޮތުން ސުވާލުކުރިއެވެ. އެ އެންމެންނަށްވެސް ޢަލީ ބާބާ އެނގެއެވެ. އެހެންކަމުން ދުނިޔޭގެ ކޮންމެ ޤައުމެއްގެ ބަޔަކަށްވެސް ފަސޭހައިން ކިޔައި ފަސޭހައިން ހަނދާން ހުންނާނެ ނަމެއް ހޯދުމުގެ ވިސްނުމުގައި ޖެކް މާ "އަލީ ބާބާ" ޚިޔާރުކުރީއެވެ.

ޖެކް މާ ސީއެންއެންއަށް ދެއްވި އިންޓަވިއުއެއްގައި ބުނީ "ޢަލީ ބާބާ އަކީ ވަގެއް ނޫނެވެ. ޢަލީ ބާބާ އަކީ ހެޔޮ ވިސްނުންތެރި ވިޔަފާރިވެރިއެކެވެ. އޭނާ އެ އަވަށުގެ މީހުންނަށް އެހީވިއެވެ.". އެ ނަމުގެ ފަލްސަފާ އަކީ ކުދި އަދި މެދު ފަންތީގެ ވިޔަފާރިތަކަށް ފުރުޞަތުގެ ދޮރު ހުޅުވައިދިނުމެވެ.

ދެން "އަލީ" ޖެހި ހުރިހާ ބްރޭންޑެއް އައީ މި އެއް ޢާއިލާގެ ތެރެއިންނެވެ. 2004 ވަނަ އަހަރު އޮންލައިން ޕޭމެންޓް ޕްލެޓްފޯމެއްގެ ގޮތުގައި އަލީޕޭ ލޯންޗުކުރެވުނެވެ. ހަމަ އެ އަހަރު ގަންނަ ފަރާތާއި ވިއްކާ ފަރާތް ގުޅުވައިދޭ އިންސްޓެންޓް މެސެޖިން ސޮފްޓްވެއާ "އަލީ ވޭންގްވޭންގް" ތަޢާރަފްކުރެވުނެވެ. 2007 ވަނަ އަހަރު އޮންލައިން މާކެޓިން ޕްލެޓްފޯމެއްގެ ގޮތުގައި "އަލީ މާމާ" ލޯންޗުކުރެވުނެވެ. 2009 ވަނަ އަހަރު ކްލައުޑް ކޮމްޕިއުޓިން ޚިދުމަތެއްގެ ގޮތުގައި "އަލީ ކްލައުޑް" ފެށުނެވެ. އަދި 2010 ވަނަ އަހަރު ބައިނަލްއަޤުވާމީ ފެންވަރުގައި ރީޓެއިލް ވިޔަފާރި ކުރެވޭ ޕްލެޓްފޯމެއްގެ ގޮތުގައި "އަލީ އެކްސްޕްރެސް" ތަޢާރަފްވީއެވެ.

މި ހުރިހާ ނަމެއްގައިވެސް "އަލީ" ހިމެނެނީ ވަރަށް ވިސްނުންތެރި ބްރޭންޑިން ސްޓްރެޓެޖީއެއްގެ ދަށުންނެވެ. އަލީބާބާ ގްރޫޕުން ގެންގުޅެނީ "މާސްޓާ ބްރޭންޑް" ގެ އުޞޫލެކެވެ. މައި ބްރޭންޑް ކަމަށްވާ އަލީބާބާގެ އަގު ވަޢުދު އަދި ފަލްސަފާ ދަށުގައި ހުންނަ ހުރިހާ ބްރޭންޑަކަށް ވާރުތަވާ ގޮތަށެވެ. އެހެންކަމުން އަލީޕޭ އަލީއެކްސްޕްރެސް އަލީކްލައުޑް ފަދަ ބްރޭންޑެއް ފެންނައިރު ކަސްޓަމަރުންނަށް ވަގުތުން އެނގެނީ އެއީ އަލީބާބާ ގްރޫޕުގެ ބައެއް ކަމެވެ. ޖެކް މާ ބުނީ "އަލީ މާމާ" ގެ ނަންވެސް ރެޖިސްޓާ ކުރީ ކޮންމެވެސް ބަޔަކު "ކައިވެންޏެއް" ކުރަން ބޭނުންވެދާނެތީ ކަމަށެވެ.

މިހާރު އަލީބާބާ ގްރޫޕަކީ ދުނިޔޭގެ އެންމެ ބޮޑެތި ޓެކް ކުންފުނިތަކުގެ ތެރޭގައި ހިމެނޭ ބިޔަ ކުންފުންޏެކެވެ. 2026 ވަނަ މާލީ އަހަރުގައި އެ ކުންފުނީގެ އާމްދަނީ 148 ބިލިއަން ޑޮލަރަށް އެރީއެވެ. ޓާއޮބާއޮ އާއި ޓީމޯލްގައި އެކަނިވެސް 800 މިލިއަނަށް ވުރެ ގިނަ މީހުން މަހެއްގެ ތެރޭގައި ބޭނުންކުރާ އިރު އެ ކުންފުނީގެ ފުޅާ ނެޓްވޯކުގައި އަލީޕޭ ކެއިނިއާއޮ ލޮޖިސްޓިކްސް އަދި އަލީކްލައުޑް ހިމެނެއެވެ.

ސެން ފްރެންސިސްކޯގެ ކެފީ ޝޮޕެއްގައި ވެއިޓްރެސް ކައިރީ ކުރި ސުވާލަކުން އުފެދުނު ނަމެއް މިއަދު ދުނިޔޭގެ ކޮންމެ ކޮންމެ ގެއެއްގެ ފޯނުގައިވެސް ފެންނަ ނަމަކަށް ވެފައިވެއެވެ. "އަލީ" ގެ ބާރަކީ ވާހަކައެއްގެ ބާރެވެ. ދުނިޔޭގެ ކޮންމެ ތަނެއްގެ ކޮންމެ މީހަކަށްވެސް ކިޔާލެވޭ ހަނދާން ހުންނަ އަދި ކޮންމެ ބަހެއްގައިވެސް ދުލަށް ފަސޭހަ ނަމެއް ޚިޔާރުކުރީ ތިބާގެ ވިޔަފާރީގެ ދޮރު ދުނިޔެއަށް ހުޅުވައިލެވޭނީ އޭރުން ކަމުގައި ޖެކް މާ ޤަބޫލުކުރީތީއެވެ.