ގޯލްޑަން ފުޓްސަލް ޗެލެންޖު 2024: ފިނޭ އަތުން ހަނިމާދޫ އަށް ފަސޭހަ މޮޅެއް

ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް، ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024 ގެ ހދ. އަތޮޅު ބުރުގެ ގުރޫޕް އެކެއްގައި ފިނޭ އާއި ހަނިމާދޫ ވާދަކުރި މެޗު ފަސޭހަކަމާއި 4-0 ގެ ނަތީޖާއަކުން ކާމިޔާބުކޮށް ހަނިމާދޫ އިން ފެށުން ރަނގަޅުކޮށްފި އެވެ.

މިއަހަރުގެ މުބާރާތުގައި ހދ. އަތޮޅުން 11 ޓީމު ބައިވެރިވެފައިވާއިރު، މިއަތޮޅުގެ އަތޮޅުބުރު ކުރިއަށް ގެންދިއުމަށް ހަމަޖެހިފައިވަނީ ތިން ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން އެންމެ ރަގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭއިރު، ތިންވަނައަށް ދާ ޓީމު ތަކުގެތެރެއިން އެންމެ ރަނގަޅު ނަތީޖާއެއް ހޯދާ ދެޓީމަށް ވެސް ކުއާޓާ ފައިނަލުން ފުރުސަތު ލިބޭނެއެވެ. އަދި އަތޮޅު ބުރުގެ ފައިނަލަށް ހޮވޭ ދެޓީމަށް މުބާރާތުގެ ޒޯނު ބުރުން ފުރުސަތު ލިބިގެންދާނެ އެވެ.

މެޗުގެ ފުރަތަަމަ ހާފުގައި ހަނިމާދޫ ޓީމުން ގިނަވަގު ބޯޅަ ހިފަހައްޓައިގެން މޮޅަށް ކުޅެ ލަނޑުޖަހާނެ ގިނަ ފުރުސަތުތަކެއް ތަނަވަސްކުރި އިރު، މިހާފުގައި އެޓީމުން ވަނީ ދެލަނޑުގެ ލީޑެއް ނަގާފައެވެ. އަދި ދެވަނަ ހާފުގައި އެޓީމުން އިތުރު ދެލަނޑު ކާމިޔާބު ކުރި އިރު، މިމެޗުގައި އެޓީމުގެ އާލިފް އިބްރާހިމް، ހުޒާމް އަބްދުއް ރަހީމް، އަބޫބަކުރު ސިއްދީގު ގެ އިތުރުން ނައުފަލް އަބްދުއް ރައޫފް މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. އަދި މިމެޗުގެ މޭން އޮފް ދަ މެޗަކަށް ހޮވިފައިވަނީ ހަނިމާދޫ ޓީމުގެ ކެޕްޓަން އާލިފް އިބްރާހިމް އެވެ.

މިގުރޫޕްގައި ހަނިމާދޫ އަދި ފިނޭގެ އިތުރުން ދެން ހިމެނެނީ މަކުނުދޫ އަދި ވައިކަރަދޫ އެވެ. އަދި ހަނިމާދޫގެ ދެވަނަ މެޗުގައި މިމަހުގެ 20 ވަނަ ދުވަހުގެ ރޭ އެޓީމުން ނުކުންނާނީ ވައިކަރަދުއާއި ދެކޮޅަށެވެ. އަދި ހަމަ އެރޭ ފިނޭ އިން ނުކުންނާނީ މަކުނުދޫ އާއި ދެކޮޅަށެވެ.