ފަހަތުން އަރައި ތިމަރަފުއްޓާއި އެއްވަރުކޮށް ގުރޫޕްގެ ދެވަނަ ޓީމުގެ ގޮތުގައި ކިނބިދޫ ސެމީއަށް

މިހާރު ކުރިއަށްދާ މީމުތާ ފުޓްސަލް ޗެލެންޖް 2025 ގެ ގުރޫޕް އޭގައި ހުކުރު ދުވަހުގެ ރޭ ކުޅެވުނު ދެވަނަ މެޗުގައި ތިމަރަފުށިން ދެލަނޑުގެ ލީޑެއް ހޯދާފައިވަނިކޮށް ފަހަތުން އަރައި 2-2 ގެ ނަތީޖާއަކުން މެޗު އެއްވަރުކޮށް ކިނބިދޫ އިން ގުރޫޕްގެ ދެވަނަ ޓީމުގެ ގޮތުގައި މުބާރާތުގެ ސެމީފައިނަލުން ޖާގައެއް ކަށަވަރުކޮށްފިއެވެ.

މުބާރާތުގައި ތިމަަރަފުށިން ކުޅުނު ފުރަތަމަ މެޗުގައި 6-2 ގެ ނަތީޖާއަކުން ވިިލިފުށި އަތުން މޮޅުވިއިރު ދެވަނަ މެޗުގައި އަތުން އެޓީމު މޮޅުވީ 3-2 ގެ ނަތީޖާއަކުންނެވެ. އަދި ކިނބިދޫގެ ފުރަތަމަ މެޗުގައި ހިރިލަންދުއާއި ވާދަކޮށް 5-5 ގެ ނަތީޖާއަކުން ދެޓީމު އެއްވަރުވިއިރު، ދެވަނަ މެޗުގައި އެޓީމުން ވަނީ 10-2 ފަރާތުބޮޑު ނަތީޖާއަކުން ވިލުފުށި ބަލިކޮށްފައެވެ.

ހުޅުމާލޭ ރެހެންދި ފުޓްސަލް ގުރައުން ދެއްގައި ކުޅެވުނު މިމެޗުގެ ފުރަތަމަ ހާފުގައި މޮޅަށް ކުޅެ ތިމަރަފުށިން މެޗު ޑޮމިނޭޓްކުރިއިރު، އެޓީމުން މެޗުގެ ލީޑުހޯދީ ފުރަތަމަ ހާފުގެ ފަސްވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ހަސަން ޒައިން މުއާޒް އެވެ.

ތިމަރަފުށިން ލީޑު ފުޅާކުރި ލަނޑު ފުރަތަމަ ހާފުގެ 12 ވަނަ މިނެޓުގައި ކާމިޔާބުކޮށްދިނީ އަލީ ސަޖަން އެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ތިމަރަފުށި ކުރީގައި އޮވެގެންނެވެ.

މެޗުގެ ދެވަނަ ހާފުގައި ކިނބިދޫ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރިގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފު ފެށިގެން ފަސްވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އަލީ ހަމްދޫން ހުސެއިން އެވެ.

ކިނބިދޫ އިން މެޗުގެ ނަތީޖާ އެއްވަރުކުރި ލަނޑު ފަހުހާފުގެ 35 ވަނަ މިނެޓުގައި ކާމިޔާބުކޮށްދިނީ އެޓީމުގެ އަހުމަދު ހަމްދާން ހުސެއިން އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ކިނބިދޫގެ އިބްރާހިމް އިމްރާހު އެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ތިން މެޗުން ލިބުނު ހަތް ޕޮއިންޓާއެކު ގުރޫޕްގެ އެއްވަނަ ތިމަރަފުށިން ހޯދިއިރު، މިމެޗުން ލިބުނު އެއް ޕޮއިންޓާއެކު ތިން މެޗުން ފަސް ޕޮއިންޓް ހަމަކޮށް ގުރޫޕްގެ ދެވަނަ ޓީމުގެ ގޮތުގައި ކިނބިދޫ އިން ވެސް ވަނީ ސެމީފައިނަލުން ޖާގަ ހޯދާފައެވެ.

މުބާރާތުގެ ސެމީފައިނަލުގެ ފުރަތަމަ މެޗުގައި މިމަހުގެ 10 ވަނަ ދުވަހުގެ ރޭ 22:10 ގައި ތިމަރަފުށިން ނުކުންނާނީ ގުރޫޕް ބީގެ ދެވަނަ ހޯދި ވޭމަންޑޫ އާއި ދެކޮޅަށެވެ. އަދި ހަމައެރޭ 23:10 ގައި ކުޅޭ ސެމީގެ ދެވަނަ މެޗުގައި ކިނބިދޫ އިން ނުކުންނާނީ ގުރޫޕް ބީގެ އެއްވަނަ އޮމަދޫ އާއި ދެކޮޅަށެވެ.

މާރިޗު 2025 އިން 12 މާރިޗު 2025 ގެ ނިޔަލަށް ކުރިއަށްދާ މިމުބާރާތުގައި މިއަހަރު އަށް ޓީމަކުން ވާދަކުރަމުން އަންނައިރު، މުބާރާތް ކުރިއަށްދަނީ ބައިވެރިވި އަށް ޓީމު ދެގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމަށް މުބާރާތުގެ ސެމީފައިނަލުން ވަނީ ފުރުސަތު ލިބިފައެވެ.