ޣައްޒާ ގަތުލުއާއްމު ވަގުތުން ހުއްޓާލުމާއި ބެހޭ ގަރާރު އެމެރިކާއިން އަނެއްކާވެސް ވީޓޯ ކޮށްފި

ނިރުބަވެރި ޔަހޫދީން ޣައްޒާގައި ހިންގަމުންދާ އުދުވާން ވަގުތުން ވަގުތަށް ހުއްޓާލުމަށް ގޮވާލައި، އދ ގެ ސަލާމަތީ މަޖިލީހަށް ހުށަހެޅި ގަރާރެއް އެމެރިކާއިން ވީޓޯ ކޮށްފިއެވެ.

މި ގަރާރާއި އެއްކޮޅަށް އެ މަޖިލީހުގެ 15 މެމްބަރު ގައުމުތަކުގެ ތެރެއިން 14 މެމްބަރުން ވޯޓް ދިންއިރު، އެމެރިކާއިން ވީޓޯ ބާރު ބޭނުންކުރުމާއިއެކު، ސަލާމަތީ މަޖިލީހުން މި ގަރާރު ފާސްކުރުމަށް ވަނީ ހުރަސް އެޅިފައެވެ.

އެމެރިކާއިން ބުނި ގޮތުގައި، އެމީހުން މި ގަރާރު ވީޓޯ ކުރީ، އޭގައި ހައްޔަރުކޮށްފައި ތިބި މީހުން ދޫކޮށްލާނެކަމަށް ބަޔާންކޮށްފައި ނެތުމުންނެވެ. އެހެންނަމަވެސް އަލް ޖަޒީރާއިން ރިޕޯޓް ކުރާގޮތުގައި، މި ގަރާރުގައި ހައްޔަރުކޮށްފައި ތިބި މީހުން ދޫކޮށްލުމަށް ވެސް ވަނީ ގޮވާލާފައެވެ.

އެމެރިކާގެ ސެކްރެޓަރީ އޮފް ސްޓޭޓް، އެންތަނީ ބްލިންކެން، ޣައްޒާގެ ގަތުލުއާއްމު ހުއްޓާލުމާއި ގުޅޭ މަޝްވަރާތައް ކުރެއްވުމަށް ކަމަށް ވިދާޅުވެ ދަތުރުފުޅުތައް ކުރައްވަމުންދާއިރު، މިއީ ޣައްޒާގައި ހައްދުފަހަނައަޅާފައިވާ ޔަހޫދީ ފައުޖުން ހިންގަމުންދާ އުދުވާން ހުއްޓާލުމާއި ގުޅޭގޮތުން އދ އަށް ހުށަހެޅި ގަރާރު އެމެރިކާއިން ވީޓޯ ކުރި 4 ވަނަ ފަހަރެވެ.

އެމެރިކާ އަކީ އިސްރާއީލުގެ އެންމެ ބޮޑު އެހީތެރިޔާއަށް ވާއިރު، އެގައުމުން އަންނަނީ އިސްރާއީލަށް ކޮންމެ އަހަރަކުވެސް އަސްކަރީ އެހީގެ ގޮތުގައި 3.8 ބިލިއަން ޑޮލަރު ފޯރުކޮށްދެމުންނެވެ. ހަމައެއާއިއެކު، ޣައްޒާއަށް ޔަހޫދީން އަރައިގެންފަހުން އެމެރިކާގެ ރައީސް، ޖޯ ބައިޑެންގެ ސަރުކާރުން އިސްރާއީލަށް 14 ބިލިއަން ޑޮލަރު ފޯރުކޮށްދީފައިވެއެވެ.