ނިއުގެ އެސިސްޓަންޓް ކޯޗަށް ހަމަލާދިން މައްސަލައިގައި ސުޒެއިރު 10 މެޗަށް ސަސްޕެންޑްކޮށް ޖޫރިމަނާކޮށްފި

ދިރާގު ދިވެހި ޕްރިމިއަރ ލީގުގައި ނިއު ރޭޑިއަންޓް ސްޕޯޓްސް ކްލަބުގެ އެސިސްޓަންޓް ކޯޗަށް ހަމަލާދިން މައްސަލައިގައި، މާޒިޔާ ސްޕޯޓްސް އެންޑް ރެކްރިއޭޝަންގެ އެސިސްޓަންޓް ކޯޗު އަހުމަދު ސުޒެއިރު 10 މެޗަށް ސަސްޕެންޑްކޮށް، 15،000 ރުފިޔާއިން ޖޫރިމަނާ ކުރުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފިއެވެ.

މި މަހުގެ 17 ވަނަ ދުވަހުގެރޭ ޤައުމީ ފުޓްބޯޅަ ދަނޑުގައި ނިއު ރޭޑިއަންޓާއި މާޒިޔާ ބައްދަލުކުރި ފޯރިގަދަ ލީގު މެޗުން 3-2 އިން ނިއު ރޭޑިއަންޓް މޮޅުވި މި މެޗުގެ 77 ވަނަ މިނެޓުގައި ދެ ޓީމުގެ ބެންޗު ކައިރީގައި ހިނގައިދިޔަ ހަމަނުޖެހުމެއްގެ ތެރެއިން، ސުޒެއިރު ވަނީ ނިއުގެ އެސިސްޓަންޓް ކޯޗު ލޫސިއާނޯ ސީކުއެއިރާ ބާބޯސާގެ މޫނުމަތީގައި ޖަހައި ބޮޑެތި އަނިޔާތަކެއް ދީފައެވެ.

މި ހަމަލާގެ ސަބަބުން ލޫސިއާނޯގެ އަނގަމަތި ވަރަށް ބޮޑަށް ފަޅައިގެން ގޮސްފައިވާއިރު، އެ މަންޒަރު ފެންނަ ވީޑިއޯތައް ސޯޝަލް މީޑިއާގައި އާންމުވެ ގިނަ ބައެއްގެ ފާޑުކިޔުން ވަނީ އަމާޒުވެފައެވެ. މި ޢަމަލާ ގުޅިގެން މެޗުގެ ރެފްރީ ވަނީ ވަގުތުން ސުޒެއިރަށް ރަތްކާޑު ދައްކައި، ދަނޑުން ފޮނުވާލާފައެވެ.

މި މައްސަލާގައި އެފްއޭއެމުން ނެރުނު ބަޔާނެއްގައި ބުނި ގޮތުގައި، އެ އެސޯސިއޭޝަނުގެ ޑިސިޕްލިނަރީ އެންޑް އެތިކްސް ކޯޑުގެ 34 ވަނަ މާއްދާގެ ދަށުން ސުޒެއިރަށް ފިޔަވަޅު އަޅާފައިވާ ކަމަށެވެ.

އެގޮތުން 10 މެޗުގެ ސަސްޕެންޝަނެއް ދިނުމުގެ އިތުރުން، 15،000 ރުފިޔާއިން ޖޫރިމަނާ ކޮށް، ކުރިއަށް އޮތް 15 ދުވަހުގެ ތެރޭގައި އެ ފައިސާ އެފްއޭއެމަށް ދައްކައި ޚަލާޞްކުރަން ވަނީ އަންގާފައެވެ.

އަދި ޑިސިޕްލިނަރީ ކޮމިޓީގެ މި ނިންމުން އިސްތިއުނާފު ކުރަން ބޭނުންވާނަމަ، ލިޔުމުން 3 ދުވަހުގެ ތެރޭގައި އެކަން އެންގުމަށް ވެސް ވަނީ އަންގާފައެވެ.