ފަސޭހަކަމާއި އެކު ހުޅުދުއްފާރު ބަލިކޮށް ދުވާފަރު ފައިނަލަށް

ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް "ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024" ގެ ރ. އަތޮޅު، އަތޮޅު ބުރުގެ ސެމީފައިނަލްގެ ދެވަނަ މެޗުގައި ފަސޭހަކަމާއި އެކު 7-1 ގެ ނަތީޖާއަކުން ހުޅުދުއްފާރު ބަލިކޮށް ދުވާފަރު ފައިނަލުން ޖާގަ ހޯދައިފި އެވެ.

ދުވާފަރުން ސެމީގެ ފުރުސަތު ހޯދީ ރ.އަތޮޅު ގުރޫޕް އެކެއްގެ އެއްވަނަ ޓީމުގެ ގޮތުގައެވެ. މުބާރާތުގައި އެޓީމުން ކުޅުނު ފުރަތަމަ މެޗުގައި 4-0 ގެ ނަތީޖާއަކުން އަލިފުށި އަތުން މޮޅުވިއިރު ދެވަނަ މެޗުގައި މަޑުއްވަރީ އަތުން އެޓީމު 6-0 ގެ ތަފާތުބޮޑު ނަތީޖާއަކުންނެވެ. އަދި ގުރޫޕްގެ ފަހު މެޗުގައި މީދޫ އަތުން 2-0 ގެ ނަތީޖާއަކުން މޮޅުވިއިރު، ކުޅުނު ތިން މެޗުގައި ބައިކޮޅަށް ލަނޑެއް ވަނަނުދީ އެޓީމުން ވަނީ 12 ލަނޑު ކާމިޔާބުކޮށްފައެވެ.

ހުޅުދުއްފާރު ސެމީ ފައިނަލުން ޖާގަ ހޯދީ ގްރޫޕް ދޭއްގެ ދެވަނަ ޓީމުގެ ގޮތުގައެވެ. އެޓީމު ގުރޫޕް ސްޓޭޖުގައި ކުޅުނު ފުރަތަަމަ މެޗުގައި 3-1 ގެ ނަތީޖާއަކުން އިނގުރައިދޫ އަތުން ބަލިވިއިރު، ގުރޫޕްގެ ފަހު މެޗުގައި ފައިނު އާއި ވާދަކުރި މެޗު އެޓީމު ވަނީ 1-1 ގެ ނަތީޖާއަކުން އެއްވަރުކޮށްފައެވެ. މިއާއެކު ގުރޫޕްގެ ދެވަނަ އެޓީމަށް ލިބުނީ ލަނޑުގެ ތަފާތުންނެވެ.

ހުޅުމާލޭ ރެހެންދި އެއް ނަންބަރު ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފުގައި 3-0 ގެ ނަތީޖާއަކުން ދުވާފަރު ކުރީގައި އޮވެގެން ނިމުނުއިރު، ދެވަނަ ހާފުގައިި އެޓީމުން ވަނީ އިތުރު ހަތަރު ލަނޑު ކާމިޔާބުކޮށްފައެވެ. އަދި މިމެޗުގައި ހުޅުދުއްފާރުން ކަމިޔާބުކުރި ހަމައެކަނި ލަނޑު ދެވަނަ ހާފުގެ 37 ވަނަ މިނެޓުގައި ކާމިޔާބުކޮށްދިނީ އެޓީމުގެ ހުސެއިން ޝަމްމާޚް އެވެ.

މިމެޗުގައި ދުވާފަރުގެ އިސްމާއިލް އީސާ (މެސީ) އަދި މުހައްމަދު އިޝާމް މިއިން ކޮންމެ ކުޅުންތެރިއެއް ތިން ލަނޑު ކާމިޔާބުކޮށް ހެޓްރިކް ހެދި އިރު އެޓީމުގެ އަނެއް ލަނޑު ކާމިޔާބުކޮށްދިނީ އަހުމަދު އީރަސް އެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ދުވާފަރު ޓީމުގެ އިސްމާއިލް އީސާ (މެސީ) އެވެ.

މުބާރާތުގެ ފައިނަލްގައި ފެބުރުއަރީ މަހުގެ އެއްވަނަ ދުވަހުގެ ރޭ 23:00 ގައި ދުވާފަރުން ނުކުންނާނީ އަލިފުއްޓާއި ދެކޮޅަށެވެ.

މިއަހަރުގެ މުބާރާތުގައި ޖުމްލަ 129 ޓީމު ބައިވެރިވެފައިވާއިރު، މުބާރާތުގައި 320 މެޗު ކުޅުމަށް ވަނީ ހަމަޖެހިފައެވެ. އަދި މިއަހަރުގެ މުބާރާތުގައި ރ. އަތޮޅުން 7 ޓީމު ބައިވެރިވެފައިވާއިރު، މިއަތޮޅުގެ އަތޮޅު ބުރު ކުރިއަށް ގެންގޮސްފައިވަނީ ބައިވެރިވި 7 ޓީމު ދެ ގްރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން އެންމެ ރަގަޅު ނަތީޖާއެއް ހޯދި ދެޓީމަށް ސެމީ ފައިނަލުގައި ވާދަކުރިއިރު، ފައިނަލުގައި ވާދަކުރާ ދުވާފަރުގެ އިތުރުން އަލިފުއްޓަށް މުބާރަތުގެ ޒޯން ބުރުން ވަނީ ފުރުސަތު ލިބިފައެވެ.