އޭއައި ބޭނުންކޮށްގެން ހެދި އައިވީއެފްއަކުން ސައުދީގައި ފުރަތަމަ ފަހަރަށް ކުއްޖަކު އުފަންވެއްޖެ

ސައުދީ އަރަބިއްޔާގެ ސިއްހީ ދާއިރާއަށް އާޓިފިޝަލް އިންޓެލިޖެންސް (އޭއައި) ތައާރަފުކުރުމަށް ކުރަމުންދާ މަސައްކަތުގެ ދަށުން، އޭއައި ޓެކްނޮލޮޖީ ބޭނުންކޮށްގެން ހެދި އައިވީއެފް ފަރުވާއަކަށްފަހު އެ ގައުމުގައި ފުރަތަމަ ފަހަރަށް ކުއްޖަކު އުފަންވެއްޖެއެވެ.

މި ތާރީޚީ ކާމިޔާބީ އިއުލާނުކޮށްފައިވަނީ "ގްލޯބަލް ފާޓިލިޓީ" ގެ ދަށުން ހިންގާ "ބުނޫން ނެޓްވޯކް އޮފް ފާޓިލިޓީ އެންޑް ވިމެންސް ހެލްތު ސެންޓަރ" އިންނެވެ. މިއީ ސައުދީ އަރަބިއްޔާއިން 2026 ވަނަ އަހަރަކީ "އާޓިފިޝަލް އިންޓެލިޖެންސްގެ އަހަރު" ގެ ގޮތުގައި ކަނޑައަޅާފައިވާ ދަނޑިވަޅެއްގައި ލިބުނު ބޮޑު ކުރިއެރުމެކެވެ.

މި ފަރުވާގައި ބޭނުންކޮށްފައިވަނީ "ވިޓްރޫވިއަން އެމްޑީ" ނަމަކަށް ކިޔާ އޭއައި ސޮފްޓްވެއަރއެކެވެ. މި ސޮފްޓްވެއަރ މެދުވެރިކޮށް ދަރިމައިވުމުގެ މައްސަލަ ހުންނަ ފިރިހެނުންގެ ދަރިފަނި ނުވަތަ ސްޕާމްގެ ސިއްހަތު ދެނެގަނެ، އޭގެ ތެރެއިން އެންމެ ދަރިމައިވުމުގެ ފުރުސަތު ބޮޑު ސެލްތައް ދެނެގަނެއެވެ. މީގެ ކުރިން މިކަން ކުރަނީ އެމްބްރިއޮލޮޖިސްޓުން ލޮލުން ބަލައިގެން ކަމަށްވާއިރު، އޭއައިގެ ސަބަބުން މީގެ ސައްހަކަން އިތުރުވެ، ނަތީޖާ ރަނގަޅުވުމުގެ ފުރުސަތު ބޮޑުވެގެންދެއެވެ.

މި ޓެކްނޮލޮޖީގެ އެހީގައި އުފަންވި ފުރަތަމަ ކުއްޖާއަކީ ދަރިމައިވުމުގައި ދަތިތަކެއް ހުރި ދެމަފިރިއަކަށް ލިބުނު ފުރަތަމަ ދަރިފުޅެވެ. އެ ދެމަފިރިންގެ ތެރެއިން ފިރިހެން މީހާގެ ދަރިފަނީގެ "ޑީއެންއޭ ފްރެގްމެންޓޭޝަން" މަތިވުމުގެ ސަބަބުން މީގެ ކުރިން ވަނީ ދަރިމައިވުމަށް ހުރަސްތަކެއް ކުރިމަތިވެފައެވެ. ނަމަވެސް އޭއައި ބޭނުންކޮށްގެން އެންމެ ފެންވަރު ރަނގަޅު ދަރިފަނި ހޮވުމުގެ ސަބަބުން ފަރުވާ ކާމިޔާބުވެ، ސިއްހަތު ރަނގަޅު ކުއްޖަކު ވަނީ އުފަންވެފައެވެ.

ގްލޯބަލް ފާޓިލިޓީގެ ސީއީއޯ މަޖްދު އަބޫ ޒަންތު ވިދާޅުވީ، އައިވީއެފް ލެބޯޓްރީތަކުގައި އޭއައި ބޭނުންކުރުމަކީ މިހާރު ހަމައެކަނި އިޚްތިޔާރީ ކަމެއް ނޫން ކަމަށާއި، އެއީ ފަރުވާގެ ފެންވަރު މަތިކުރުމަށް ކޮންމެހެން ބޭނުންތެރި ކަމެއް ކަމަށެވެ. މީގެ ސަބަބުން ފަރުވާ ފޭލްވާ މިންވަރު މަދުވެ، ބަލިމީހުންގެ ވަގުތާއި ޚަރަދު ސަލާމަތްވާނެ ކަމަށް އޭނާ ފާހަގަކުރެއްވިއެވެ.

ބުނޫން ސެންޓަރުގެ މެޑިކަލް ޑައިރެކްޓަރ ޑރ. އަބްދުލްއަޒީޒް އަލްޝަހްރާނީ ވިދާޅުވި ގޮތުގައި، މި އައު އީޖާދަކީ ސައުދީގެ "ވިޜަން 2030" އާ އެއްގޮތްވާ ގޮތުގެ މަތިން ސިއްހީ ދާއިރާ ތަރައްގީކުރުމަށް ކުރެވޭ މުހިންމު މަސައްކަތެކެވެ.

ބުނޫން ނެޓްވޯކުން މިހާރުވެސް އަހަރަކު 5,000 އަށްވުރެ ގިނަ އައިވީއެފް ފަރުވާ ދެމުންދާއިރު، ރިޔާޟް، ޖިއްދާ އަދި އަލް އަހްސާގައި މި ފަރުވާދޭ މަރުކަޒުތައް ހުރެއެވެ. އަދި ކުރިއަށް އޮތް ތަނުގައި އަބްހާ އާއި މަދީނާއަށް މި ޚިދުމަތް ފުޅާކުރުމުގެ އިތުރުން، ރިޔާޟްގައި އެންމެ ޒަމާނީ ވަސީލަތްތަކާއެކު ބޮޑު މަރުކަޒެއް ހުޅުވުމަށް ދަނީ ތައްޔާރުވަމުންނެވެ.