ޗެންޕިއަން ރަށްގުޑުވާ ކަޓުވާލުމަށްފަހު ހޭވައްލާ ފައިނަލަށް

ރ.އަތޮޅު ކިނޮޅަސްގައި މިހާރު ކުރިއަށްދާ "23 ވަނަ ޖަމިއްޔަތުލް އިއްތިހާދު ވޮލީބޯޅަ ޓޯނަމަންޓް 2024" ގެ ލީގުބުގެ ފަހު މެޗުގައި އެންމެ ފަހުގެ ޗެމްޕިއަން ރަށްގުޑުވާ ސީދާ ތިން ސެޓުން ބަލިކޮށް ލީގުބުގެ އެއްވަނަ ޓީމުގެ ގޮތުގައި ހޭވައްލާ އިން މުބާރާތްގެ ފައިނަލުން ޖާގަ ހޯދައިފި އެވެ.

ހޭވައްލާ އިން މުބާރާތުގައި ކުޅުނު ފުރަތަަމަ މެޗުގައި ތިން ސެޓު އެއް ސެޓުން ބޭރިއަންސް އަތުން މޮޅުވިއިރު، ދެވަނަ މެޗުގައި އެޓީމު ވަނީ ކޯކޯ އަތުން ތިން ސެޓު ދެ ސެޓުން ބަލިވެފައެވެ. އަދި މުބާރަތުގެ އެންމެ ފަހުގެ ޗެމްޕިއަން ރަށްގުޑުވާ އިން ފުރަތަަމަ މެޗުގައި ތިން ސެޓު ދެ ސެޓުން ކޯކޯ ބަލިކުރި އިރު، ދެވަނަ މެޗުގައި ބޭރިއަންސް އަތުން އެޓީމު ވަނީ ސީދާ ތިން ސެޓުން ބަލިވެފައެވެ.

މިމެޗުގެ ފުރަތަމަ ސެޓުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު މި ސެޓު ހޭވައްލާ އިން ކާމިޔާބުކުރީ 23-25 އިންނެވެ. އަދި ދެވަނަ ސެޓް 21-25 އިން ކާމިޔާބުކުރި އިރު ތިންވަނަ ސެޓްގައި ދެޓީމުގެ ފަރާތުން ވަނީ ވަަރަށް ވާދަވެރި ކުޅުމެއް ފެށިގެން ގޮސްފައެވެ. އަދި މިސެޓް ހޭވައްލާ އިން ކާމިޔާބުކުރީ 27-29 އިންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ހޭވައްލާ ޓީމުގެ ސެޓަރު ހުސެއިން ރަޒާން އެވެ.

މިމެޗުގެ ނަތީޖާއެކު ތިން މެޗުން ހޭވައްލާ އަށް 7 ޕޮއިންޓް ލިބިފައިވާއިރު، ދެވަނަ ލިބުނީ ތިން މެޗުން 6 ޕޮއިންޓް ހޯދި ބޭރިއަންސް އަށެވެ. އަދި ތިން ޕޮއިންޓާއެކު ތިންވަނަ ލިބުނީ ކޯކޯ އަށެވެ. މީގެ އިތުރުން ލީގުބުގެ ފުލަށް ދިޔައީ ތިން މެޗުން ދެ ޕޮއިންޓާއެކު އެންމެ ފަހުގެ ޗެމްޕިއަން ރަށްގުޑުވާ އެވެ.

26 ޖެނުއަރީ 2024 އިން 03 ފެބުރުއަރީ 2024 ގެ ނިޔަލަށް ކުރިޔަށް ގެންދިއުމަށް ހަމަޖެހިފައިވާ މިއަހަރުގެ މުބާރާތުގައި ހަތަރު ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންގޮސްފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްފަހަރު ކުޅެ އެންމެ ގިނަ ޕޮއިންޓް ހޯދާ ޓީމަކަށް މުބާރާތުގެ ފައިނަލުން ޖާގަ ލިބޭގޮތަށެވެ. އަދި ފައިނަލުގެ ދެވަނަ ޖާގަ ލިބޭނީ ލީގު ބުރުގެ ދެވަނަ ބޭރިއަންސް އާއި ތިންވަނަ ކޯކޯގެ މެދުގައި މާދަމާ ރޭ ކުޅެވޭ ޕްލޭއޮފް މެޗުން މޮޅުވާން ޓީމަކަށެވެ.