ރަޝިޔާގެ ތެލުގެ ދަތިކަމަށް ހައްލެއް ހޯދުމަށް އިންޑިއާއިން ތެޔޮ ގަންނަން ފަށައިފި

ޔޫކްރެއިނުން ރަޝިޔާގެ ހަކަތަ އުފައްދާ މަރުކަޒުތަކަށް ދެމުންދާ ހަމަލާތަކުގެ ސަބަބުންނާއި ހޫނު މޫސުމުގައި ތެލަށް އޮތް ޑިމާންޑް ބޮޑުވުމުގެ ސަބަބުން ރަޝިޔާއަށް ކުރިމަތިވެފައިވާ ތެލުގެ ދަތިކަން ހައްލުކުރުމަށްޓަކައި، ކަނޑުމަގުން އިންޑިއާއިން ތެޔޮ އެތެރެކުރަން ރަޝިޔާއިން ފަށައިފިއެވެ. ރޮއިޓަސް ނިއުސް އެޖެންސީއިން މިކަން ރިޕޯޓްކޮށްފައިވަނީ ދެ މަސްދަރަކާ ހަވާލާދީ އެވެ.

މިހާރުވެސް އިންޑިއާއިން މަދުވެގެން 60,000 މެޓްރިކް ޓަނުގެ ތެޔޮ ރަޝިޔާއަށް ފޮނުވާފައިވާ ކަމަށް ރޮއިޓަރސްއިން ބުނެއެވެ. އަދި ކޮންމެ ބޯޓެއްގައި 30,000 އާއި 40,000 އާ ދެމެދުގެ އަދަދަކަށް ތެޔޮ ހިފައިގެން ދަތުރުކުރާ ދެ ޓޭންކަރު މިހާރުވެސް ރަޝިޔާއަށް މިސްރާބު ޖަހާފައިވާ ކަމަށް ބުނެއެވެ.

މަޢުލޫމާތު ލިބޭގޮތުގައި ރަޝިޔާއިން ރާވަމުންދަނީ އެކި ޤައުމުތަކުން މަހަކު 400,000 މެޓްރިކް ޓަނުގެ ތެޔޮ އެތެރެކުރުމަށެވެ. މީގެ ތެރޭގައި އަވަށްޓެރި ބެލަރޫސްވެސް ހިމެނެއެވެ. ހޫނު މޫސުމުގައި ރަޝިޔާގައި ދުވާލެއްގެ މައްޗަށް މަދުވެގެން 110,000 ޓަނުގެ ތެޔޮ ބޭނުންކުރެއެވެ.

ރަޝިޔާގެ ރައީސް ވްލަޑިމިއަރ ޕުޓިން ވެސް ވަނީ ޔޫކްރެއިނުގެ ޑްރޯން ހަމަލާތަކުގެ ސަބަބުން ބައެއް ސަރަޙައްދުތަކަށް ތެލުގެ ދަތިކަން ކުރިމަތިވެފައިވާކަން ޤަބޫލުކުރައްވައި، ސަރުކާރުން އެކަން ޙައްލުކުރުމަށް މަސައްކަތް ކުރަމުންދާ ކަމަށް ވިދާޅުވެފައެވެ. މިގޮތުން ތެޔޮ އެތެރެކުރުމަށް ލުއިތަކެއް ދިނުމަށް ރަޝިޔާގެ ޕާލިމަންޓުން ވަނީ ޓެކްސް ޤާނޫނަށް ބަދަލުތަކެއްވެސް ގެނެސްފައެވެ.

ފާހަގަކޮށްލެވޭ ގޮތުގައި، އިންޑިއާއަކީ ރަޝިޔާގެ ސާފުނުކުރާ ތެޔޮ އެންމެ ގިނައިން ގަންނަ އެއް ޤައުމެވެ. ޖޫން މަހުގެ ތެރޭގައި އިންޑިއާއިން ރަޝިޔާއިން އެތެރެކުރި ސާފުނުކުރާ ތެލުގެ މިންވަރު ވަނީ ރެކޯޑް އަދަދަކަށް މަތިވެފައެވެ.