31 ރަށެއްގައި، މަކިޓާ ޕަވަރ ޓޫލްސް ވިއްކަދޭނެ އޭޖެންޓުން އެސްޓީއޯއިން ހޯދަނީ!

އެސްޓީއޯ އިން ވިއްކާ މަކިޓާ ޕަވަރ ޓޫލްސް، ރާއްޖޭގެ ރަށްރަށުގައި ވިއްކައިދިނުމުގެ މަސައްކަތް ކޮށްދޭނެ އޭޖެންޓުން ހޯދުމަށް އިއުލާން ކޮށްފިއެވެ.

އެސްޓީއޯއިން ކުރި އިއުލާނުގައި ބުނީ، އެޖެންޓުން ނެގުމަށް މިވަގުތު ހަމަޖެހިފައިވަނީ ތިރީގައިވާ ރަށްތަކުން ކަމަށެވެ.

ހއ. ދިއްދޫ

ށ. ފުނަދޫ، މިލަންދޫ

ނ. ވެލިދޫ، މަނަދޫ

ރ. ދުވާފަރު، މީދޫ، އަލިފުށި، އުނގޫފާރު

ބ. ތުޅާދޫ

ޅ. ނައިފަރު، ހިންނަވަރު

ކ. ކާށިދޫ، ހިންމަފުށި، ގުޅި، ތުލުސްދޫ

އއ. ރަސްދޫ، ތޮއްޑޫ

އދ. މަހިބަދޫ، މާމިގިލި

ވ. ކެޔޮދޫ

މ. މުލަށް، ދިއްގަރު، މުލި

ފ. ނިލަންދޫ

ދ. ކުޑަހުވަދޫ، މީދޫ

ތ. ތިމަރަފުށި، ވިލުފުށި

ލ. އިސްދޫ، މާވަށް

އެސް.ޓީ.އޯ އިން ވިއްކާ މަކިޓާ ޕަވަރ ޓޫލްސްގެ ބާވަތްތައް ވިއްކުމަށް ކޮންމެ ރަށަކުން ދެ އޭޖެންޓުން ނަގާނެ ކަމަށް އެސްޓީއޯ އިން ބުނެއެވެ.

އަދި އޭޖެންޓުގެ ގޮތުގައި އައްޔަންކުރެވޭނީ ވިޔަފާރި ރަޖިސްޓްރީ ކުރުމާއިބެހޭ ޤާނޫނުގެ ދަށުން މިނިސްޓްރީ އޮފް އިކޮނޮމިކް ޑިވެލޮޕްމެންޓްގައި ރަޖިސްޓްރީ ކޮށްފައިވާ ޖެނެރަލް ކޮންސްޓްރަކްޝަން މުދާ ވިއްކާ، އަދި ހާޑްވެއަރ ޝޯވރޫމެއް ނުވަތަ ފިހާރައެއް ހުންނަ ފަރާތްތައް ކަމަށްވެސް ބުނެފައިވެއެވެ.

އެހެންކަމުން އެޖެންޓަކަށް ވުމަށް އެދިލައްވާ ފަރާތްތަކުން، 14 މާރޗް 2024 ވާ ބުރާސްފަތި ދުވަހުގެ 16:00 ގެ ކުރިން [email protected] އަށް އީމެއިލް މެދުވެރިކޮށް އެޕްލިކޭޝަންފޯމް ހުށަހެޅުމަށް ވަނީ އެދިފައެވެ.

މީގެ އިތުރުން، އެސްޓީއޯއިން ބުނީ، އެޖެންޓަކަށް ވުމަށް އެދި ހުށަހަޅާ ފޯމް އެސްޓީއޯ މަކިޓާ ޝޯރޫމް (ސީޓްރެކް ބިލްޑިނގް) އިން އަދި އެސްޓީއޯގެ ވެބްސައިޓް އިންވެސް ޑައުންލޯޑް ކުރެވޭނެ ކަމަށެވެ.

ފޯމް ހުށަހަޅާއިރު، އެޖެންޓަކަށް ވުމަށް އެދޭ ރަށުގެ ނަމާއި ވިޔަފާރި ރަޖިސްޓްރީގެ ކޮޕީއެއް ހުށަހަޅަން ޖެހެއެވެ.

މިކަމާއި ގުޅޭ އިތުރު އިތުރު މައުލޫމާތު ސާފުކުރެއްވުމަށް، މަކިޓާ ހޮޓްލައިން 7980240 އަށް ގުޅަން އެސްޓީއޯ އިން އެދެއެވެ.