”އުނދަގޫކަމާ އެކު އަޅައަޅައިގަނެގެން ޤުރްއާން ކިޔަވާ މީހާއަށް ދެ ދަރުމަ ހުއްޓެވެ“

ކީރިތި ޤުރްއާނަކީ ކޮންމެ ހެޔޮކަމަކާއި ބާއްޖަވެރިކަމެއްގެ އަސްލުކަމާއި، އެ ފޮތް އުނދަގޫކަމާ އެކު އަޅައަޅައިގަނެގެން ކިޔަވާ މީހާއަށް ދެ ދަރުމަ ލިބޭނެކަން މިއަދުގެ ހުކުރު ޚުޠުބާގައި ބުނެފިއެވެ.

ރާއްޖޭގެ އެކިކޮޅުތަކުގައި މިއަދު އިއްވި ޚުޠުބާ ޚާއްޞަކޮށްފައިވަނީ ކީރިތި ޤުރްއާން ކިޔެވުމުގެ މާތްކަމާއި އޭގެ ފައިދާތަކުގެ މައްޗަށެވެ.

ޚުޠުބާގައި ބުނި ގޮތުގައި، ކީރިތި ޤުރްއާނަކީ އެންމެ މަތިވެރި އަދި އެންމެ ބަރަކާތްތެރި ފޮތެވެ. އެ ފޮތުގެ އުޞޫލުތަކުގައި ހިފަހައްޓައި، އޭގެ މާނަތަކާ މެދު ފިކުރުކޮށް، ކިޔެވުމުގައި ދެމިހުންނަ މީހަކީ ގެއްލުމެއް ނުވާނޭ ފަދަ ފައިދާހުރި ވިޔަފާރިއެއްގައި ދެމިހުރި މީހެކެވެ. މާތް الله ވަޙީކުރައްވާފައިވާ ބަސްފުޅަކުން މިކަން ސާބިތުކޮށްދެއްވަމުން ޚުޠުބާގައި ވިދާޅުވީ، اللهގެ ފޮތް ކިޔަވައި، ނަމާދު ޤާއިމުކޮށް، ސިއްރާއި ފާޅުގައި ހޭދަކުރާ މީހުންނަކީ އުުއްމީދުކުރާ ފަދަ ކާމިޔާބު ވިޔަފާރިއެއްގެ އަހުލުވެރިން ކަމަށެވެ.

ޤުރްއާން ކިޔެވުމުގެ މާތްކަމާ ގުޅޭގޮތުން ޚުޠުބާގައި އިތުރަށް ބަޔާންކުރީ، އެ ފޮތުން ކިޔަވާ ކޮންމެ އަކުރަކަށް ދިހަ ހެޔޮކަމުގެ ދަރުމަ ލިބޭނެ ކަމެވެ. ކީރިތި ރަސޫލާ ﷺ ގެ ޙަދީޘްފުޅެއްގައިވާ ފަދައިން، "އަލިފް، ލާމް، މީމް" އަކީ އެއް އަކުރެއް ނޫން ކަމަށާއި، އޭގެއިން ކޮންމެ އަކުރަކީ ވަކި އަކުރެއްގެ ގޮތުގައި ބެލެވި ދިހަ ހެޔޮކަން ލިބިގެންދާނެއެވެ.

ޚުޠުބާގައި ފާހަގަކުރި އެންމެ މުހިންމު އެއް ކަމަކީ، ޤުރްއާން ކިޔެވުމުގައި ތަފާތު ފަންތީގެ މީހުންނަށް ލިބޭ މަތިވެރި މަޤާމެވެ. އެގޮތުން، ޤުރްއާން ކިޔެވުމުގައި ކުޅަދާނަ މާހިރުން މަލާއިކަތްބޭކަލުންނާ އެކު ވާނެއިރު، އުނދަގޫކަމާ އެކު އަޅައަޅައިގަނެގެން ކިޔަވާ މީހާއަށް ދެ ދަރުމަ ލިބޭނެކަން ކީރިތި ރަސޫލާ ﷺ ގެ ޙަދީޘްފުޅުން ހާމަވެއެވެ. އިމާމް ނަވަވީގެ ބަސްފުޅާ ޙަވާލާދީ ޚުޠުބާގައި ވިދާޅުވީ، ޤުރްއާނުގެ މާހިރަކީ އެއްވެސް އުނދަގުލަކާ ނުލައި ފަރިތަކަމާއެކު ކިޔަވާ މީހާ ކަމަށެވެ.

ކީރިތި ރަސޫލާ ﷺ ޙަދީޘްކުރައްވައިފައި ވެއެވެ. (اَلْمَاهِرُ بِالْقُرْآنِ مَعَ السَّفَرَةِ الْكِرَامِ الْبَرَرَةِ، وَالَّذِيْ يَقْرَأُ الْقُرْآنَ وَيَتَتَعْتَعُ فِيْهِ، وَهُوَ عَلَيْهِ شَاقٌّ، لَهُ أَجْرَانِ) މާނައީ: "ހުނަރުވެރިކަމާ އެކު ޤުރްއާން ކިޔަވާ މީހާ ވާހުށީ اللهُ سُبْحَانَهُ وَتَعَالَى، އެކަލާނގެ ޚަލްޤުތަކުންގެ ގާތަށް ވަޙީއާއިގެން ފޮނުއްވާ މަތިވެރިވެގެންވާ މަލާއިކަތުންނާ އެކުގައެވެ. އަދި އުނދަގޫކަމާ އެކު އަޅައަޅައިގަނެގެން ޤުރްއާން ކިޔަވާ މީހާއަށް، ދެ ދަރުމަ ހުށްޓެވެ."

މީގެ އިތުރުން، ޤުރްއާން ކިޔަވާ މީހުންގެ ވަށައިގެން މަލާއިކަތްބޭކަލުން ޙާޟިރުވެ، އެބައިމީހުންނަށް ހެޔޮ ދުޢާކުރައްވައި، ޝައިޠާނާގެ ވަސްވާސްތަކުން ރައްކާތެރިކޮށްދެއްވާނެ ކަމަށްވެސް ޚުޠުބާގައި ބުންޏެވެ. އަދި ޤުރްއާނަކީ ހިތްތަކަށް ޝިފާއެއް ކަމަށާއި، އެ ފޮތް ކިޔެވުމުން ނަފުސާނީ އަދި ޖިސްމާނީ ދުޅަހެޔޮކަން ލިބި، އިންސާނާގެ ހިތްވަރު އާލާކޮށްދޭކަން އިމާމް އިބުނުލް ޤައްޔިމްގެ ބަސްފުޅުތަކުން މިސާލު ދައްކައި ބަޔާންކުރިއެވެ.

ޚުޠުބާ ނިންމާލަމުން، ހުރިހައި މުސްލިމުންނަށް ގޮވާލާފައިވަނީ اللهގެ ފޮތާ މެދު ތަޤުވާވެރިވުމަށެވެ. ހުރިހާ ހެޔޮކަމެއް ވަނީ އެ ފޮތުގައި ހިފެހެއްޓުމުގައި ކަމަށާއި، ޤުރްއާނުގެ އަމުރުތަކާ ޚިލާފުވުމަކީ ހުރިހާ ނުބައިކަމެއްގެ އަސްލުކަން ހަނދާންކޮށްދީ ނަޞޭޙަތްތެރިވެފައިވެއެވެ.