ލަންކާގެ ޖޫނިއާ ސާފިން ޗެމްޕިއަން ބަލިކޮށް، ރާއްޖޭގެ އާލިޔާ ޗެމްޕިއަންކަން ހޯދައިފި

ސްރީލަންކާގެ ސަރފިންގ ފެޑެރޭޝަނުން އިންތިޒާމުކޮށްގެން ބޭއްވި "ސަރފިންގ ފެޑެރޭޝަން އޮފް ސްރީލަންކާ އިންޓަރނޭޝަނަލް އޯޕަން ސަރފިންގ ޗެމްޕިއަންޝިޕް" ގެ 18 އަހަރުން ދަށުގެ އަންހެން ކުދިންގެ ބައިން ރާއްޖޭގެ އާލިޔާ ލަތީފް ޗެމްޕިއަންކަން ހޯދައިފިއެވެ.

ސްރީލަންކާގެ މަޝްހޫރު އަރުގަމް ބޭ މެއިން ޕޮއިންޓުގައި މި ސެޕްޓެމްބަރު މަހުގެ 10 އިން 12 އަށް ކުރިއަށްދިޔަ މި މުބާރާތުގައި އާލިޔާ ވާދަކޮށްފައިވަނީ 18 އަހަރުން ދަށުގެ އަންހެން ކުދިންގެ އޯޕަން ކެޓަގަރީގައެވެ. މި ކެޓަގަރީން އެއްވަނަ ހޯދުމަށް އާލިޔާ ކުރި ދަތުރުގައި، އޭނާ ވަނީ އޭނާއަށްވުރެ އުމުރުން ދެގުނަ ދޮށީ އަދި ތަޖުރިބާކާރު ރާޅާއެޅުންތެރިންނާ ވާދަކޮށް، އެންެން ހައިރާންކޮށްލާފައެވެ.

މި މުބާރާތުގެ ތެރެއިން އާލިޔާ ދައްކުވައިދިން ހުނަރާއެކު ގިނަ ބައެއްގެ ސަމާލުކަން އޭނާއަށް ހުއްޓުނެވެ. މިއީ މިފަދަ މުބާރާތެއްގައި އާލިޔާގެ ފުރަތަމަ ތަޖުރިބާއެވެ.

ބައިނަލްއަޤުވާމީ މައިދާނެއްގައި ރާއްޖެ ތަމްސީލުކޮށް އާލިޔާ ހޯދި މި ކާމިޔާބީއަކީ ރާއްޖޭގެ ރާޅާއެޅުމުގެ ތާރީޚުގައި، ޚާއްޞަކޮށް އަންހެން ރާޅާއެޅުންތެރިންގެ މެދުގައި ފާހަގަކޮށްލެވޭނެ މުހިންމު ކުރިއެރުމެކެވެ. މުބާރާތުގެ އިންތިޒާމުކުރި ފަރާތްތަކުންނާއި ކުޅިވަރަށް ލޯބިކުރާ ފަރާތްތަކުން އަންނަނީ އާލިޔާގެ މި ކާމިޔާބީ ފާހަގަކޮށް އޭނާއަށް ތަހުނިޔާ ކިޔަމުންނެވެ.