ތޮއްޑޫ ބަލިކޮށް ލީގު ބުރުގެ ދެވަނަ ޓީމުގެ ގޮތުގައި މަތިވެރި ފައިނަލަށް

ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް "ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024" ގެ އއ. އަތޮޅުގެ އަތޮޅު ބުރުގައި ހޯމަ ދުވަހުގެ ރޭ 6-2 ގެ ނަތީޖާއަކުން ތޮއްޑޫ ބަލިކޮށް ލީގު ބުރުގެ ދެވަނަ ޓީމުގެ ގޮތުގައި މަތިވެރިން ފައިނަލުގެ ޖާގައެއް ކަށަވަރުކޮށްފި އެވެ.

ހުޅުމާލޭ ރެހެންދި އެއް ނަންބަރު ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފުގައި މަތިވެރިން ވަނީ ތިން ލަނޑުގެ ލީޑެއް ނަގާފައެވެ. އަދި ދެވަނަ ހާފުގައިި އެޓީމުން އިތުރު ތިން ލަނޑު ކާމިޔާބުކުރިއިރު މިހާފުގައި ތޮއްޑޫ އިން ވެސް ވަނީ ދެލަނޑު ކާމިޔާބުކޮށްފައެވެ.

މިމެޗުގައި މަތިވެރީގެ މުހައްމަދު ޝަފުރާޒު، އަލީ އަލްސަންގެ އިތުރުން އަހުމަދު ފިރާޝް މިއިން ކޮންމެ ކުޅުންތެރިއެއް ވަނީ ދެލަނޑު ކާމިޔާބުކޮށްފައެވެ. އަދި ތޮއްޑޫ ޓީމުގެ ލަނޑުތައް ކާމިޔާބުކޮށްދިނީ އެޓީމުގެ އަލީ އިޒްމީލް އަހުމަދު އަދި ހުޒާމް ހަމީދު އެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ މަތިވެރީގެ އަލީ އަލްސަން އެވެ.

މިމެޗުން ލިބުނު ތިން ޕޮއިންޓާއެކު ކުޅުނު ތިން މެޗުން ހަ ޕޮއިންޓް ހަމަކޮށް މަތިވެރިން ފައިނަލުގެ ޖާގައެއް ހޯދިއިރު، ތޮއްޑޫ އިން މުބާރާތް ނިންމާލީ ކުޅުނު ތިން މެޗުން ލިބުނު ތިން ޕޮއިންޓާއެކު ލީގު ބުރުގެ ތިންވަނައިގައެވެ.

ގޯލްޑަން ފުޓްސަލް ޗެލެންޖު 2024 ގައި ޖުމްލަ 129 ޓީމަކުން މިއަހަރު ބައިވެރިވެފައިވާއިރު، މުބާރާތުގައި 320 މެޗު ކުޅުމަށް ވަނީ ހަމަޖެހިފައެވެ. އަދި މިއަހަރުގެ މުބާރާތުގައި އއ. އަތޮޅުން 4 ޓީމު ބައިވެރިވެފައިވާއިރު، މިއަތޮޅުގެ އަތޮޅުބުރު ކުރިއަށް ގެންގޮސްފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއް މެޗު ކުޅެ އެންމެ ގިނަ ޕޮއިންޓް ހޯދާ ދެޓީމު ފައިނަލަށް ހޮވޭގޮތަށެވެ. އެގޮތުން މިއަހަރުގެ މުބާރާތުގެ އއ.އަތޮޅުގެ އަތޮޅު ބުރުގެ ފައިނަލުން ޖާގަ ހޯދީ ބޮޑުފޮޅުދޫ އަދި މަތިވެރި އެވެ.