ސްޓެލްކޯ މަހިބަދޫ އިންޓަ އޮފީސް ވޮލީ މުބާރާތް: ބަލިނުވެ އެލީޓް ސެމީއަށް، އޭއީސީއަށް ތިންވަނަ މޮޅު

އދ. މަހިބަދޫގައި މިހާރު ކުރިއަށްދާ ސްޓެލްކޯ މަހިބަދޫ އިންޓަ އޮފީސް ވޮލީބޯޅަ މުބާރާތުގައި، ކުޅުނު އެއްވެސް މެޗަކުން ބަލިނުވެ ހޮސްޕިޓަލްގެ އެލީޓް ޓީމު ސެމީ ފައިނަލުގެ ޖާގައެއް ކަށަވަރުކޮށްފިއެވެ. އަދި އދ. އޭއީސީ ޓީމުން ވަނީ ތިންވަނަ މޮޅު ހޯދައި މުބާރާތުގައި މުހިންމު މޮޅެއް ހޯދާފައެވެ.

މުބާރާތުގެ 27 ވަނަ މެޗުގައި ބައްދަލުކުރީ ސްކާލެޓް އަދި އދ. އޭއީސީ އެވެ. ވާދަވެރި ކުޅުމަކަށްފަހު ސީދާ ދެ ސެޓުން މި މެޗު ކާމިޔާބުކުރީ އދ. އޭއީސީ އެވެ.

މި މެޗުގެ ފުރަތަމަ ސެޓު 18-9 އިން އޭއީސީ ގެންދިޔައިރު، ދެވަނަ ސެޓު އެ ޓީމުން ކާމިޔާބުކުރީ 18-15 ގެ ނަތީޖާއަކުންނެވެ.

މި މެޗުގެ މޮޅު ކުޅުންތެރިޔާގެ މަގާމު ހޯދީ އދ. އޭއީސީގެ ޖާޒީ ނަންބަރު 20، އާއިޝަތު އިލްމާ އެވެ.

މުބާރާތުގެ 28 ވަނަ މެޗުގައި ބައްދަލުކުރީ ހޮސްޕިޓަލުގެ ދެ ޓީމު ކަމަށްވާ އެލީޓް އަދި ޑިވާސް އެވެ. މި މެޗު ވަރަށް ފަސޭހަކަމާއެކު ސީދާ ދެ ސެޓުން ކާމިޔާބުކުރީ އެލީޓް ޓީމެވެ.

ފުރަތަމަ ސެޓު އެލީޓުން 18-1 ގެ ބޮޑު ތަފާތަކުން ގެންދިޔައިރު، ދެވަނަ ސެޓު އެ ޓީމުން ކާމިޔާބުކުރީ 18-8 އިންނެވެ.

މޮޅު ކުޅުމެއް ފެނިގެންދިޔަ މި މެޗުގެ މޮޅު ކުޅުންތެރިޔަކަށް ހޮވުނީ ހޮސްޕިޓަލް އެލީޓް ޓީމުގެ ޖާޒީ ނަންބަރު 7، ހައްވާ ޝާމަތު އެވެ.

މި މެޗުތަކަށްފަހު މުބާރާތުގެ ޕޮއިންޓް ތާވަލަށް ބަލާއިރު، ގްރޫޕް 'އޭ' ގެ އެއްވަނައިގައި އޮތީ އެއްވެސް މެޗަކުން ބަލިނުވެ މަހިބަދޫ ކައުންސިލްގެ ވޮރިއާޒް ޓީމެވެ. މި ގްރޫޕުގެ ދެވަނައިގައި އޮތީ އދ. އޭއީސީ އެވެ.

ގްރޫޕް 'ބީ' ގެ އެއްވަނަ އެއްވެސް މެޗަކުން ބަލިނުވެ ހޮސްޕިޓަލްގެ އެލީޓް ޓީމު ހޯދާފައިވާއިރު، މި ގްރޫޕުގެ ދެވަނަ ލިބެނީ ވިކިންގްސް އަށެވެ.

މަހިބަދޫގެ މުއައްސަސާތަކުގެ މެދުގައި އެކުވެރިކަން އާލާކުރުމުގެ މަގުސަދުގައި ކުރިއަށްގެންދާ މި މުބާރާތުގެ ފޯރި މިހާރު ވަނީ ވަރަށް ގަދަވެފައެވެ.