މީމުތާ ފުޓްސަލް ޗެލެންޖް 2025 ގެ ޗެންޕިއަންކަން ތިމަރަފުށިން ހޯދައިފި

މީމުތާ ފުޓްސަލް ޗެލެންޖް 2025 ގެ ފައިނަލުގައި ބުދަ ދުވަހުގެ ރޭ ތިމަރަފުއްޓާއި އޮމަދޫ ކުޅުނު މެޗު ވާދަވެރި ކުޅުމަކަށްފަހު 1-0 ގެ ނަތީޖާއަކުން ކާމިޔާބުކޮށް ތިމަރަފުށިން މުބާރާތުގެ ޗެންޕިއަންކަން ހޯފައިފިއެވެ.

ތިމަރަފުށި މުބާރާތުގެ ފައިނަލުން ޖާގަހޯދީ ސެމީފައިނަލް ފުރަތަމަ މެޗުގައި 2-0 ގެ ނަތީޖާއަކުން ވޭމަންޑޫ ބަލިކުރުމަށްފަހު އެވެ. އަދި އޮމަދޫ ފައިނަލުން ޖާގަ ހޯދީ ސެމީފައިނަލްގެ ދެވަނަ މެޗުގައި 4-2 ގެ ނަތީޖާއަކުން ކިނބިދޫ ބަލިކުރުމަށްފަހު އެވެ.

ހުޅުމާލޭ ރެހެންދި ފުޓްސަލް ގުރައުން ދެއްގައި ކުޅެވުނު ފައިނަލް މެޗުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެެވެ. ނަމަވެސް ދެޓީމަށް ލިބުނު ފުރުސަތުތަކުގެ ބޭނުން ނުކުރެވި މެޗު ނިމެންދަނިކޮށް ތިމަރަފުށިން މެޗުގެ ލީޑުހޯދީ މެޗުގެ އެންމެ ފަހު މިނެޓުގައި އެޓީމަށް ލިބުނު ޕެނަލްޓީއެއްގައެވެ.

މި ޕެނަލްޓީ އެޓީމަށް ކާމިޔާބުކޮށްދިނީ އަހުމަދު ވިސާމް އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ތިމަރަފުށި ކުރީގައި އޮވެގެންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ތިމަރަފުށީގެ އަހުމަދު ވިސާމް އެވެ.

2 މާރިޗު 2025 އިން 12 މާރިޗު 2025 ގެ ނިޔަލަށް ކުރިއަށްގެންދިޔަ މިމުބާރާތަކީ ޓޯނަމެންޓް އެމްވީގެ ފަރާތުން އިންތިޒާމުކޮށް މާލެ ސަރަހައްދުގައި ދިރިއުޅޭ މ އަދި ތ އަތޮޅުގެ ޒުވާނުންނަށް އަމާޒުކޮށްގެން ކުރިއަށް ގެންދިޔަ މުބާރާތެކެވެ. އަދި މިމުބާރާތުގައި މިއަހަރު ޖުމްލަ އަށް ޓީމަކުން ވާދަކުރިއިރު، އޭގެ ތެރޭގައި ހިމެނެނީ ތ. އަތޮޅު ގާދިއްފުށި، އޮމަދޫ، ވިލިފުށި، ކިނބިދޫ، ހިރިލަންދޫ އަދި ވޭމަންޑޫގެ އިތުރުން މ. ކޮޅުފުށި އެވެ.

މީގެ އިތުރުން މުބާރާތް ކުރިއަށް ގެންގޮސްފައިވަނީ ބައިވެރިވި އަށް ޓީމު ދެގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމަށް މުބާރާތުގެ ސެމީފައިނަލުން ވަނީ ފުރުސަތު ލިބިފައެވެ.