ޓްރަމްޕް މިހާރު ބުނަނީ އީރާނުގައި މީހުން މެރުން ހުއްޓާލައިފި ކަމަށް

އިރާނުގެ ސަރުކާރާ ދެކޮޅަށް ކުރިއަށްދާ މުޒާހަރާތަކުގެ ބައިވެރިން މެރުން ހުއްޓާލާފައިވާ ކަމުގެ ޔަގީންކަން ލިބިފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.

ބުދަ ދުވަހު ނޫސްވެރިންނާ ވާހަކަދައްކަމުން ރައީސް ޓްރަމްޕް ބުނީ، އިރާނުގެ "ވަރަށް މުހިންމު މަސްދަރުތަކަކުން" މައުލޫމާތު ލިބިފައިވާ ގޮތުގައި މުޒާހަރާގެ ބައިވެރިން މެރުން މިހާރު ވަނީ ހުއްޓާލާފައެވެ.

އަދި މަރުގެ އަދަބު ދިނުމަށް ރާވާފައިވާ ކަންކަން ވެސް މަޑުޖައްސާލާފައިވާ ކަމަށް ޓްރަމްޕް ފާހަގަކުރިއެވެ. މިއީ އިރާނަށް ހަމަލާދޭނެ ކަމަށް ބުނެ ކުރިން ދިން އިންޒާރުތަކަށް ފަހު، ޓްރަމްޕްގެ ރޫހު ކޮންމެވެސް ވަރަކަށް ބަދަލުވެފައިވާ ކަމުގެ ނިޝާނެއް ކަމަށް މަޝްރަހު ދިރާސާކުރާ ފަރާތްތަކުން ބުނެއެވެ.

މި މައުޟޫއުގައި ފޮކްސް ނިއުސްއަށް ދެއްވި އިންޓަވިއުއެއްގައި އީރާނުގެ ފޮރިން މިނިސްޓަރު އަރަގްޗީ ވިދާޅުވީ، މުޒާހަރާގެ ބައިވެރިން ދަންޖެއްސުމުގެ އެއްވެސް ވިސްނުމެއް ނެތް ކަމަށެވެ. އަދި ޖެނުއަރީ 8 ވަނަ ދުވަހުން ފެށިގެން މުޅި ގައުމަށް ފެތުރިފައިވާ ހަމަނުޖެހުންތަކަށްފަހު، މިހާރު ގައުމުގެ މަޝްރަހު އޮތީ ސަރުކާރުގެ ފުރިހަމަ ކޮންޓްރޯލްގެ ދަށުގައި ކަމަށްވެސް އޭނާ ވިދާޅުވިއެވެ.

އެމެރިކާއިން އީރާނަށް ހަމަލާދީފިނަމަ، ބަދަލުގައި އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދޭނެ ކަމަށް އީރާނުން އިންޒާރު ވަނީ އިންޒާރުދީފައެވެ.

އެގޮތުން އީރާނުގެ ރިވޮލިއުޝަނަރީ ގާޑްސް (އައި.އާރު.ޖީ.ސީ) ގެ ކޮމާންޑަރު މުހައްމަދު ފާކްޕޫރު ވިދާޅުވީ، އިސްރާއީލާއި އެމެރިކާ އަޑީގައި އޮވެގެން އީރާނުގައި ހިންގާ ހަމަނުޖެހުންތަކަށް ވަރުގަދަ ރައްދެއް ދިނުމަށް އެގައުމު އޮތީ ތައްޔާރަށް ކަމަށެވެ.

އީރާނުގައި ހިނގަމުންދާ ހަމަނުޖެހުންތަކުގައި މިހާތަނަށް 2,400 އަށްވުރެ ގިނަ މުޒާހަރާގެ ބައިވެރިން މަރުވެފައިވާ ކަމަށް އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނާއިރު، އަމްނެސްޓީ އިންޓަނޭޝަނަލުން ބުނެފައިވަނީ އީރާނުގެ ސަލާމަތީ ބާރުތަކުން އާންމުންނާ ދެކޮޅަށް އިންތިހާއަށް ބާރުގެ ބޭނުންކޮށް، ގިނަ އަދަދެއްގެ ބަޔަކު މަރާލާފައިވާ ކަމުގެ ހެކި ލިބިފައިވާ ކަމަށެވެ.

އީރާނުގެ ތެރޭގައި މުވާސަލާތީ ހިދުމަތްތައް މެދުކަނޑާލާފައި އޮތުމުގެ ސަބަބުން، މަރުވި މީހުންގެ ސީދާ އަދަދު ކަށަވަރުކުރުމަށް ވަނީ ދަތިތަކާ ކުރިމަތިވެފައެވެ.