ކޮވިޑް-19ގެ ބަލިމަޑުކަން މިހާ ބޮޑުވެފައިވާ ދުވަސްވަރެއްގައި ގިނަ ބަޔަކު ތަންތަނަށް އެއްވެ ހެދުމަކީ ޒިންމާދާރުކަމެއް ނޫންކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ހެންވޭރު އާޓިފިޝަލް ބީޗް ސަރަހައްދުގައި ހުންނަ ކެފޭ ޓިއޯލޯ އަދި އެސްބީއައި ބިލްޑިންގގައި ރޯވި އަލިފާންގަނޑު ކޮންޓްރޯލްކުރުމަށް އެމްއެންޑީއެފްއިން ކުރަމުންދިޔަ މަސައްކަތް ބެއްލެވުމަށް އެ ސަރަހައްދަށް ވަޑައިގަތުމަށްފަހު މީޑިޔާތަކާއި ވާހަކަދައްކަވަމުންނެވެ.
ރައީސް ޞާލިހް ވިދާޅުވީ މި އަލިފާންގަނޑުގެ 95 އިންސައްތަ މިހާރު ނިއްވާލެވިފައިވާ ކަމަށާއި، މި ހާދިސާގައި އަލިފާންގަނޑު އެންމެ ފުރަތަމަ ރޯވީ ކެފޭގައި ކަމަށެވެ. ރައީސް ޞާލިހް ވިދާޅުވީ އެ ސަރަހައްދުގައި އުޅޭ މީހުން ފިޔަވައި އެހެން ފަރާތްތަކުން ގެއަށް ދިއުމަށް އެދިލައްވާ ކަމަށެވެ. އަދި މި ހާދިސާގައި މިހާތަނަށް އެއްވެސް މީހަކަށް ގެއްލުމެއް ލިބިފައި ނުވާކަމަށް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ އެޗްޕީއޭގެ އެންގުމާއި ޚިލާފަށް އަމަލުކުރާ ފަރާތްތައް އެބައުޅޭ ކަމަށާއި، އެގޮތުން މިއަދުވެސް އިސް ފަރާތްތަކަކުން މާސްކް ނާޅައި ގިނަ ބަޔަކު އެއްކޮށް މިއަދުވެސް ހަރަކާތެއް ބާއްވާފައިވާ ކަމަށެވެ. އަދި އެކަމާއި މެދު ހިތާމަކުރައްވާކަމަށް ރައީސް ވިދާޅުވިއެވެ. އެމަނިކުފާނު ވިދާޅުވީ މުޒާހަރާ ކުރުމާއި ހިޔާލު ފާޅުކުރުމުގެ ކަންކަން އޮންނާނެކަމަށާއި އެކަމަކީ ސަރުކާރުން ހުއްޓުވާނެ ކަމެއް ނޫންމަމަށެވެ. އެކަމަކު މިހާރު އޮތް ހާލަތުން އެއްވެ، އުޅުމަކީ ޒިންމާދާރު ގޮތެއް ނޫންކަމަށް ވިދާޅުވިއެވެ.
އެމަނިކުފާނު އިތުރަށް ވިދާޅުވީ އެޗްޕީއޭގެ އެއްވުމާއި ޚިލާފްވާ ހުރިހާ ފަރާތްތަކާއި މެދު ގާނޫނުގައިވާ ގޮތުގެ މަތިން ފިޔަވަޅު އަޅާނެ ކަމަށެވެ. އަދި ބަލަމުން މިގެންދަނީ ލޮކްޑައުނަކަށް ނުގޮސް ވޭތޯކަމަށް ރައީސް ޞާލިހް ވިދާޅުވިއެވެ.
ފޮޓޯ: ވަގުތު
Advertisement
This content is created and paid for by advertisers and does not involve Voice Journalists
