ޕޮމްޕެއޯގެ ދަތުރުކުރާ ގައުމުތައް އިންޑިއާއާއި އެއްގަލަކަށް އެރުވިއްޖެނަމަ އިންޑިއާ ކަނޑުގެ ކޮންޓްރޯލް އިންޑިއާއަށް ލިބިދާނެ: ސްވާމީ

29 Oct 2020 | 13:34

އެމެރިކާގެ ސެކްރެޓަރީ އޮފް ސްޓޭޓް އިންޑިއާ ކަނޑުގެ ގައުމުތަކަށް ކުރައްވަމުންގެންދަވާ ދަތުރުފުޅުގެ ސަބަބުން އިންޑިއާ ކަނޑުގެ ކޮންޓްރޯލް އިންޑިއާއަށް ލިބިދާނެކަމަށް އެގައުމުގެ ވެރިކަންކުރާ ބީޖޭޕީގެ އިސް ލީޑަރެއްކަމަށްވާ ޑރ.ސުބްރަމާނިއަމް ސްވާމީ ވިދާޅުވެއްޖެއެވެ.

އޭނާ މިހެން ވިދާޅުވީ ޕޮމްޕެއޯގެ ދަތުރުފުޅާއި ބެހޭގޮތުން އިންޑިއާގެ ޓީވީ ޗެނަލެއްކަމަށްވާ ނިއުސްއެކްސްއަށް އިިއްޔެ ދެއްވި އިންޓަރވިއުއެއްގައެވެ.

ސްވާމީ ވިދާޅުވީ ޕޮމްޕެއޯ މިވަގުތު ހުންނެވީ ސްރީލަންކާގައި ކަމަށާއި، އެއަށްފަހު ދިވެހިރާއްޖެއާ އިންޑޮނީޝިޔާއަށް ކަމަށެވެ. އަދި މި ގައުމުތައް އިންޑިއާއާއި އެއްގަލަކަށް އެރުވިއްޖެނަމަ، މުޅި އިންޑިއާ ކަނޑު އެގައުމުން ކޮންޓްރޯލް ކުރެވޭނެކަމަށް އޭނާ ފާހަގަކުރެއްވިއެވެ.

ފާހަގަކޮށްލެވޭ ގޮތުގައި ސެކްރެޓަރީ ޕޮމްޕެއޯގެ ދަތުރުފުޅަކީ ޗައިނާއާއި ދެކޮޅަށް މަަސައްކަތްކުރާނެ އިންޑޯ-ޕެސިފިކް ކޯލިޝަނެއް އުފެއްދުމަށްޓަކައި ކުރާ ދަތުރެއްކަމަށް މުރާސިލުން ވަނީ ސިފަކޮށްފައެވެ. އަދި މިކަމަށް ބާރުލިބިދޭފަދަ ވާހަކަތަކެއް އޭނާ ވަނީ އިންޑިއާ، ރާއްޖެ އަދި ސްރީލަންކާގައިވެސް ދައްކަވާފައެވެ.

Advertisement

ކޮމެންޓް