މިއަހަރުގެ ފުރަތަމަ ހަމަސްދުވަހުގެ ތެރޭގައި އެކަނިވެސް މާލެ، ބްރިޖް އަދި ހައިވޭގައި ހާހަކަށްވުރެ ގިނަ އެކްސިޑެންޓް ހިނގައިގެން ރިޕޯޓްކޮށްފައިވާކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.

މޯލްޑިވްސް ޕޮލިސް ސާވިސްއިން އާއްމުކުރި ތަފާސްހިސާބަށް ބަލާއިރު، ފުރަތަމަ ހަ މަސްަދުވަހުމާލެ، ބްރިޖް ހައިވޭގައި 1101 އެކްސިޑެންޓު ހިނގައިގެން ރިޕޯޓްކޮށްފައިވާކަމަށެވެ. އެންމއެ ފާހަގަކޮށްލެވެނީ މި އެކްސިޑެންޓްތަކުގައި 61 މީހަކަށް ސީރިއަސް އަނިޔާތައް ލިބުމެވެ. މި ތަފާސްހިސާބަށް ބަލާއިރު، 121 މީހުންނަށް ވަނީ އަނިޔާވެފައެވެ. އަދި 1107 އުޅަނދަށް ވަނީ އެކިވަރުގެ ގެއްލުންތައް ލިބިފައެވެ. 

އަހަރުގެ ފުރަތަމަ ހަމަސްދުވަހު ބްރިޖާއި ހައިވޭގައި 190 އެކްސިޑެންޓް ހިނގާފައިވާއިރު، މާލޭގައި 911 އެކްސިޑެންޓް ވަނީ ހިނގާފައެވެ. މީގެ ތެރެއިން ގިނަ އެކްސިޑެންޓްތައް ހިނގާފައިވަނީ ދުވާލުގަޑީގައެވެ. އެގޮތުން ދުވާލުގަޑީގައި 745 އެކްސިޑެންޓް ހިނގިއިރު، ރޭގަނޑު ވަނީ 356 އެކްސިޑެންޓް ހިނގާފައެވެ. އެންމެގިނައިން އެކްސިޑެންޓް ހިނގާފައިވަނީ ކާރާއި ސައިކަލް ޖެހިގެންނެވެ. ދެން އެންމެ ގިނައީ ދެސައިކަލް ޖެހިެގންނެވެ.

މިއަހަރުގެ ފުރަތަމަ ހަމަސްަދުވަހު ރެކޯޑް އަދަދަކަށް އެކްސިޑެންޓް ހިނގާފައިވާއިރު، ރޭ މާލޭ ބޮޑުތަކުރުފާނުމަގު މައި ބަސްޓާމިނަލްކައިރީ ވަނީ ނުރައްކާތެރި އެކްސިޑެންޓެއް ހިނގައި ޒުވާނަކު ނިޔާވެފައެވެ.