މިނިސްޓްރީ އޮފް ހަޔަރ އެޑިއުކޭޝަނުގެ ބޭނުމަށް ބަޔަކާ އެޕްލިކޭޝަނެއް ހަދަން ހަވާލުކޮށް އެއް މިލިއަނަށް ވުރެ ގިނަ ރުފިޔާ ހޭދަކުރިއިރު، އެ އެޕްލިކެޗަން ވުޖޫދުގައިވެސް ނެތްކަމަށް އެ މިނިސްޓްރީގެ އޮޑިޓުން ހާމަވެއްޖެއެވެ.

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާގެ 2023 ވަނަ އަހަރުގެ މާލީ ބަޔާނުގެ އޮޑިޓް ރިޕޯޓުގައިވާ ގޮތުން، އެ ވުޒާރާއިން ކުރިއަށްގެންދިޔަ ސޮފްޓްވެއާރ ޑިވެލޮޕްމަންޓް ޕްރޮޖެކްޓަކަށް 1.1 މިލިޔަނަށްވުރެ ގިނަ ރުފިޔާ ޚަރަދުކޮށްފައިވީ ނަމަވެސް، އެ މަސައްކަތުގެ އެއްވެސް މިންވަރެއް ނިންމާފައެއް ނުވެއެވެ.

މި މައްސަލައަކީ ދައުލަތުގެ މާލިއްޔަތު ގަވާއިދުގެ 6.01 ވަނަ މާއްދާގެ (ނ) އާ ޚިލާފަށް ހިނގާފައިވާ ކަމެއްކަމަށް އޮޑިޓަރ ޖެނެރަލްގެ އޮފީހުން ނެރުއްވި ރިޕޯޓުގައި ބަޔާންކޮށްފައިވެއެވެ. އޮޑިޓް ރިޕޯޓުގައިވާ ތަފުސީލުތަކަށް ބަލާއިރު، މަތީ ތަޢުލީމާ ބެހޭ ވުޒާރާއާއި އެ ވުޒާރާގެ ދަށުން ހިންގާ މުއައްސަސާތައް ބޭނުންކުރުމަށް އެޕްލިކޭޝަނެއް ހެދުމަށްޓަކައި، ކުންފުންޏަކާ ހަވާލުކޮށްގެން ސޮފްޓްވެއާރ ޑިވެލޮޕްމަންޓް މަސައްކަތެއް ކުރިއަށް ދިޔައެވެ.

މި މަސައްކަތް ކުރިއަށް ގެންދިއުމަށްޓަކައި 2021 ވަނަ އަހަރުގައި ސޮއިކޮށް، އެ މަސައްކަތް 12 ފަހަރެއްގެ މަތިން އިތުރުކޮށްދީފައިވެއެވެ. އެގޮތުން އެކި ފަހަރު މަތިން މުއްދަތު އިތުރުކުރުމަށްފަހު، އެންމެ ފަހުން މަސައްކަތް ނިންމުމަށް ދީފައިވާ މުއްދަތަކީ 23 އޮކްޓޫބަރު 2022 އެވެ.

މުއްދަތު އިތުރުކޮށްދިން ނަމަވެސް، އެއްބަސްވުމުގައިވާ 12 މޮޑިއުލްގެ ތެރެއިން އެއްވެސް މޮޑިއުލެއްގެ މަސައްކަތް ފުރިހަމައަށް ނިންމާފައިނުވާކަން އޮޑިޓްގައި ވަނީ ފާހަގަކޮށްފައެވެ. މި ޕްރޮޖެކްޓުގެ މުހިންމު ލިޔެކިޔުންތަކުގެ ތެރޭގައި ހިމެނޭ ތަފުޞީލީ މަސައްކަތު ޕްލޭންތަކާއި، މަސައްކަތް ކުރިއަށްދިޔަ މިންވަރުގެ ރިޕޯޓުތަކުގެ އިތުރުން މަސައްކަތް ޓްރެކްކުރާ ލޮގްތަކާއި ޑިވެލޮޕަރުންގެ ޓައިމްޝީޓުތަކާއި ޓެކްނިކަލް ޑެލިވަރަބަލްތައް ހެދިކަމުގެ ލިޔެކިޔުންތައް ވެސް ބަލަހައްޓާފައެއް ނުވެއެވެ. އެހެންކަމުން، މި ސިސްޓަމް ބޭނުންކުރަން ފެށިފައި ނުވުމުގެ ސަބަބުން ސިސްޓަމުން ލިބެންޖެހޭ އެއްވެސް މަންފާއެއް ވުޒާރާއަށް ލިބިފައިނުވާކަން ކަށަވަރުވެއެވެ.

އޮޑިޓަރ ޖެނެރަލް އޮފީހުން ނެރެފައިވާ ޚަރަދުގެ ތަފްސީލް

މި ސޮފްޓްވެއާރ ޑިވެލޮޕްމަންޓް ޕްރޮޖެކްޓަށް 2021 އިން 2023 ވަނަ އަހަރުގެ ނިޔަލަށް ޖުމުލަ 1,181,763 ރުފިޔާ ވަނީ ޚަރަދުކޮށްފައެވެ. މިކަމާ ގުޅިގެން އޮޑިޓަރ ޖެނެރަލް އޮފީހުން ވަނީ މިފަދަ މައްސަލަތައް ބެލުމަށް މިނިސްޓަރު ކަނޑައަޅާފައިވާ އިންތިޒާމުގެ ތެރެއިން މި މައްސަލަ ބަލައި މިކަމުގައި އިހުމާލުވާ ފަރާތެއްވާނަމަ އެ ފަރާތްތަކާއިމެދު ފިޔަވަޅު އެޅުމަށް އެދި އިދާރާތަކަށް އަންގާފައެވެ.