ރިސޯޓުތަކުން މުވައްޒަފުންނަށް ސާވިސް ޗާޖު ދިވެހި ރުފިޔާއަށް މާރުކޮށްގެން ދިނުން ހުއްޓުވުމަށް ހުށަހަޅާފައިވާ ބިލް ކޮމިޓީ މަރުހަލާގައި ލަސްވާތީ އެ މަސައްކަތް އަވަސް ކޮށްދެއްވުމަށް ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް (ކުޑޫ) މަޖިލީހުގެ ރައީސަށް ސިޓީއަކުން އެދިވަޑައިގެންފިއެވެ.
މި ބިލަކީ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު މިދިޔަ އަހަރުގެ ޑިސެމްބަރުގައި ވަޒީފާއާ ބެހޭ ޤާނޫނުގެ 52 ވަނަ މާއްދާ އިޞްލާޙުކުރުމަށް ހުށަހެޅުއްވި ބިލެކެވެ. އެ އިޞްލާޙުގައި ބުނެފައިވަނީ ސާވިސް ޗާޖުގެ ފައިސާ މުވައްޒަފުންނަށް ދޭންޖެހޭނީ އެ ފައިސާ ލިބުނު ކަރަންސީއަކުން ކަމަށެވެ. ނަމަވެސް, ކޮމިޓީ މަރުހަލާގައި މި ބިލް އޮންނަތާ ގިނަ ދުވަސްތަކެއް ވެފައިވެއެވެ.
ގަލޮޅު އުތުރު ދާއިރާގެ މެންބަރު (ކުޑޫ) މަޖިލީހުގެ ރައީސް ޢަބްދުއްރަޙީމް ޢަބްދުﷲ އަށް ފޮނުއްވި ސިޓީގައި ފާހަގަކުރައްވާފައިވަނީ ބައެއް ރިސޯޓުތަކުން ސާވިސް ޗާޖު ދެމުންދަނީ ރުފިޔާއިން ކަމަށާއި އެކަމުގެ ސަބަބުން ފަތުރުވެރިކަމުގެ ދާއިރާގެ އެތައް މުވައްޒަފުންނަކަށް ލިބެންޖެހޭ ޙައްޤު ފުރިހަމައަށް ނުލިބޭ ކަމަށެވެ. އެހެންވެ ވީ އެންމެ އަވަހަކަށް ކޮމިޓީ މަރުހަލާ ނިންމައި ތަޅުމުން ގޮތެއް ކަނޑައެޅުމަށް އޭނާ ވަނީ އެދިވަޑައިގެންފައެވެ.
މި ބިލުގައި އައުޓްސޯސް ކޮށްގެން ޚިދުމަތް ދޭ ތަންތަނުގެ މުވައްޒަފުންނާ ގުޅޭ މާއްދާއެއް ވެސް ހިމެނެއެވެ. އެގޮތުން ރިސޯޓާއި ގެސްޓް ހައުސް އަދި ހޮޓާތަކުގައި އެހެން ކުންފުންޏެއް މެދުވެރިކޮށް ފަތުރުވެރިންނަށް ސީދާ ޚިދުމަތް ދޭ މުވައްޒަފުންނަށް ވެސް ސާވިސް ޗާޖު ލިބެންޖެހޭ ގޮތަށް ހެދުމަށް ބިލުގައި ހުށަހަޅާފައިވެއެވެ.
ރާއްޖޭގެ ރިސޯޓުތަކުގައި ވޯޓާ ސްޕޯޓްސް ޑައިވް ސެންޓަރު އަދި ސުވެނިއާ ފިހާރަ ފަދަ ތަންތަން ހިންގުމަށް ތިންވަނަ ފަރާތްތަކާ ހަވާލުކުރުމަކީ ޢާންމު ކަމެކެވެ. އެފަދަ ތަންތަނުގެ މުވައްޒަފުންނަށް މިހާރު ރިސޯޓުގެ ސާވިސް ޗާޖެއް ނުލިބެއެވެ.
މި ބިލުގެ ބޭނުމެއް ކަމަށް މައުރޫފް ވިދާޅުވެފައިވަނީ ބޭރު ފައިސާއިން ނަގާ ސާވިސް ޗާޖު ރުފިޔާއަށް މާރުކޮށްގެން ބެހުމުން މުވައްޒަފުންނަށް ލިބެންޖެހޭ ފައިދާ ގެއްލޭތީ އެ ޙައްޤު ފުރިހަމައަށް ކަށަވަރުކޮށްދިނުމެވެ.
Advertisement
This content is created and paid for by advertisers and does not involve Voice Journalists
