ދިވެހިރާއްޖޭގެ ރަށެއްގައި ރުޤްޔާކުރުމުގެ ނަމުގައި ތިން ކުޑަކުދިންނާއި އަންހެނަކަށް އަނިޔާކުރި ދެ މީހަކު ހައްޔަރުކޮށްފިއެވެ.
ފުލުހުން ބުނީ ނޯތު ޕޮލިސް ޑިވިޜަންގައި ހިމެނޭ ރަށެއްގައި އަންހެނަކާ އޭނާގެ ތިން ދަރިންނަށް ޖިސްމާނީ އަނިޔާކޮށް، އަންހެންމީހާއާއި އޭނާގެ ދަރިފުޅަށް ޖިންސީ ގޯނާކޮށްފައިވާ ކަމަށް ތުހުމަތުކުރެވޭ މައްސަލައެއް ހުށައެޅިފައިވާ ކަމަށެވެ.
މި މައްސަލައިގެ ތުހުމަތުގައި މިހާތަނަށް ކޯޓު އަމުރެއްގެ ދަށުން ދެމީހަކު ވަނީ ހައްޔަރުކޮށްފައެވެ. މި މައްސަލައިގައި ހައްޔަރުކޮށްފައިވަނީ 24 އަހަރާއި 39 އަހަރުގެ ދެ ދިވެހި ފިރިހެނުންނެވެ. އެގޮތުން 39 އަހަރުގެ މީހާ ހައްޔަރުކޮށްފައިވަނީ މިމަހުގެ 25 ވަނަ ދުވަހުގެ ރޭގަނޑު 22:30 ގައެވެ.
އަދި 24 އަހަރުގެ މީހާ ހައްޔަރުކޮށްފައިވަނީ ނޮވެމްބަރ 26ގެ ހެނދުނު 09:51 ގައެވެ.
މި މައްސަލަ ފުލުހުން ދަނީ ސީރިއަސް މައްސަލައެއްގެ ގޮތުގައި ބަލަމުންނެވެ.
Advertisement
This content is created and paid for by advertisers and does not involve Voice Journalists
